[الصباخ]

العتش




الوقت: الساعة 11:14م ، يعني بعد صلاة العشاء بساعات .
المكان: محطة العتش .
التاريخ: 22/5/1428هـ ، الموافق 8/6/2007م .
اليوم: الجمعة ليلة السبت ، وبكرة تبدأ اختبارات المدارس النهائية .
الاتجاه: من بريدة إلى الرياض .
الحالة: مستانس ، لأني متغدي اليوم الظهر عند المستشار ، [وأمس مغرب الخميس متقهوي أنا والجني العبد والمستشار "هالنقطة وضعت بناءً على طلب الجني العبد ] .

الوصف: طبعاً أنا طلعت من بريدة بعد صلاة العشاء ، مشيت مايقارب 200 كم ، ووصلت إلى محطة العتش ، قلت بنفسي لعلي أسوي ثلاث أشياء في وقت واحد:
- أعبئ بنزين .
- أشتري ماء .
- أقضي حاجتي البسيطة في دورة المياه .
اتجهت إلى المحطة أولاً وعبيت بنزين ، همن رحت للبقالة وشريت ماء ، وبعدين رحت لدورات المياه لقضاء حاجتي البسيطة .
دخلت دورات المياه وبحثت لي عن حمام نظيف ودخلته ، طبعاً أنا حسران بطبيعة الحال ، قضيت حاجتي ولله الحمد والمنة "الواحد إذا صار حسران همن قضى الحاجة ، يحس بشعور جميل جداً " ، المهم يوم رفعت راسي إلا وأشوف كلام بصراحة استغربت لوجوده في دورة المياه .

العبارة: [ألتفت في الخلف] .

طبعاً لا شعورياً ألتفت في الخلف على حسب الكلام المسجل أمامي ، ويوم ألتفت في الخلف شفت هالعبارة .

العبارة: [ليش تلتفت ياحمار] .

بصراحة استغربت من وقاحة كاتب هالكلام ، وبنفس الوقت جلست أضحك عليه .

وكان فوق هالعبارة فيه ملصق على شكل نصيحة ، بصراحة أعجبن .

بصراحة أعجبتن هالنصيحة جداً .

فتحت باب الحمام ، وغسلت ورحت لسيارتي ، وشغلتها ويممت وجهي اتجاه الرياض .


أترك المساحة الباقية لكم ولتعليقاتكم .

شكراً لكم .

ودمتم سالمين ،،