[وليد التميمي]

بسم الله الرحمن الرحيم ،،،

من بعض النقل مايلي :


يوم أمس قمت أنا و مجموعة من الزملاء بالقيام بتجربة كشفت مدى تعامل رجل الأمن مع المظاهر و إليكم مقادير الطبخة ؟؟؟ قصدي التجربة

1 - سيارة من نوع سياحي << أحنا أستخدمنا كرسيدا GL موديل 1995

2 - سيارة كشخة مرة << أحنا أستخدمنا فياجرا كوبية مستأجرة من مبارك لتأجير السيارات

3 - أربع لفات تضليلة خفيفة ، و أربع لفات تضليلة كاتم

4 - واحد يعرف يضلل و محترف ،،، ، طريقة الطبخ ؟؟؟ يووه قصدي طريقة القيام بالتجربة أول شيء :

قمنا بتضليل السيارات ، الكرسيدا ضللناها خفيف

الأربع أبواب و القزازة الخلفية من اللي يسمونها 0/2 و ضللنا الفياجرا البابين و القزازة الخلفية و الأمامية كاتم من اللي يسمونها LimoDark

مشينا ورا بعض إلى مواقف اليورومارشية الخلفية ، و قفنا الفياجرا هناك و طلعنا كلنا في الكرسيدا

و جلسنا نلف << لا تفهمون غلط يعني ندور وماخلينا شارع أو مدخل إلا ودخلنا فيه المهم صادف أن الإشارة وقفتنا في أول الصف عند تقاطع التخصصي مع الثلاثين

شوي وجاك عمنا في الله اللي موقف دبابه عند الأشارة و معاه دفتر تحضير قصدي مخالفات

أول ما جا قدام السيارة بلمحة خاطفة من عينة قام وشك رقم السيارة ووقف عند القزازة حقت السواق

طبعاً اللي يسوق واحد من أخويانا و شكله جنتل محترم ، المهم قال له " الكلمة المشهورة " رخصة و إستمارة لو سمحت

قام خوينا و بكل أدب و أعطاه الرخصة و الإستمارة أخذه العسكري وقال أطلع يمين و وقف لو سمحت وقفنا يمين

و نزل له خوينا و هاتك يا ترجي ويابن الحلال وما أدري أيش و ياللحية الغانمة المهم سوى له معلقة مدح في ها الجندي اللي ما يسوى ، شوي وينتفض عليه

الجندي يقول له السيارة ما هي بأسمك وين التفويض قال له خوينا صاحب السيارة معي ، و تعبان ما يقدر

يسوق ،، ونادا خويناعلى صاحب السيارة

نزل صاحب السيارة و نشب فيه العسكري ليييييييه مضلل ؟؟؟؟ << يلعن أم الجريمة اللي هزت المجتمع

المهم العسكري قال إلا تفك القزاز الأمامي و بدا يكتب في المخالفة وفي لحظة غير متوقعة مر من جنبنا

VXR أسود و مكتم أسود ، أشرنا عليه و قلنا للعسكري ، يا أبو محمد شف هذا و را ما توقفه قام رد و قال : خلي الدرعا ترعى

يعني شلون ، قال ما لك دخل في غيرك فك التضليلة و توكل ، يالله بسرعة

و قام عطانا الورقة الصفراء المشئومة ، و خلى

الرخصة و الأستمارة معه الين نخلص من التقشيع المهم فكينا تضليلتنا و مشينا ,, صاروخ إلى مواقف

اليورومارشيه وقفنا الكرسيدا و ركبنا الفياجرا ، طبعاً السواق

اللي هو خوينا قام و فكر بفكرة مجنونة قال ياشباب خلينا نحبكها زين وتوقعوا أيش سوى

المهم زي ما قلت فوق ، بأن خوينا اللي كان يسوق ، فكر بفكرة مجنونة ، و قال خلنا نحبك اللعبة زين

قلنا ويش بتسوي يعني ، تبي تلبس بشت قال لا ،،، بس قم يا فلان ، و فك اللوحات

قلنا ليش ؟؟ قال أول شيء اللوحات ما هي مميزة << خبرة في التشخيص ثاني شيء ، ما قد شفت أحد مكتم إلا وهو فاك اللوحات ، و خلنا نصير درعى و نرعى

المهم فكينا اللوحات ،، و مشينا لنفس الإشارة ،، و نرز الموتر عند العسكري مسكرين على اللي بيدخلون يمين

و نطالع في العسكري ،، الشيء الوحيد اللي سواه ،، أنه طالع يبي يشوف اللوحة ما شاف شيء

و رجع للزاوية حقه , و تفتح الإشارة و نمشي .. و نروح و نديور و نرجع لخوينا .. كنا متقصدين نخليه يشوف السيارة ,, بس وراه فجأه صار ثقيل و لا كأننا واقفين عنده

عرفنا أن الرجال تجيه أم الركب عند أشياء زي هذي ،، يعني يطبق المثل اللي يقول العمر يا شامان

وفي نفس الوقت بالنسبة لنا كنا نحس نفسنا نقول له أسد علي و في الحروب نعامة < ما أدري ليش طرى على بالي المثل هذا

كان ودنا نستمر في الطبخة هذي إلى آخر اليوم ،، بس كان فيه عندنا أكثر من مشكلة

و أحنا داخل السيارة نمشي و نقول : اللهم سلم سلم ،، ما نشوف شي من قوة التضليل ة وخايفين على الموتر ،، لأن مبارك ما عنده تأمين على السيارات

ثاني شي ، لو طحنا بواحد من الضباط اللي مسوين فيها حبة ونص ، و أكثرهم غرضه أنه يتعرف على صاحب السيارة ،

و أكتشف أن السيارة أيجار و أن أكشخ واحد فينا موظف بنك و الباقي يدورون على وظيفة بناكل هوى

وفي الأخير مرينا على خوينا العسكري اللي عند الأشارة و نزل خوينا القزازة حق الراكب و صوت على العسكري : يا أبو محمد

طالع فينا : زي اللي مشكك أنه قد شافهم ،، بس ما هو متأكد

رد وقال : سم قهرني وراه ما قال : سم طال عمرك قال له خوينا اللي يسوق : ما عرفتنا يا أبو محمد ،

العسكري : لا ، تعرفني أنت ؟؟

قال خوينا : أنا اللي قبل شوي على كرسيدا بيضاء ،،

وهذيك التضليلة اللي فكيناها شفها باقي على الزفلت العسكري وبكل ثقل : طيب و المطلوب طيح وجه خوينا الله يطيح وجهه .

قال له خوينا : لا بس حبينا نوريك بأننا " درعى و نرعى زي غيرنا "

ترى راس ما لها إيجار ، و قوة قلب ،، سلام ومشينا و خليناه ،، وبصراحة فيه مواقف كثيرة تصادفنا بس اللي يقهرك أنهم على الضعيف يكونون لوحة عليها جميع الأنضمة اللي تخليك آخر الشهر تدفع راتبك في تسديد المخالفات

و على القوي يكونون نفس اللوحة بس يقلبوها و تلقى مكتوب فيها و بالنيون " سم طال عمرك ، تفضل " الرسالة اللي ودي أوجهها لرجال الأمن

" إذا كان عندك جدار متسخ ، و تبي تنظفه أبدأ فيه من فوق ، لأنك لو بديت من تحت و جا مطر الوسخ اللي فوق ينزل على اللي تحت ، و يروح تعبك هدر " يمكنكم الحصول على مزيد من المعلومات لدى : مواقف ماكدونالدز العزيزية بندة - شارع التخصصي مواقف اليورومارشيه - شارع التخصصي شارع التحلية - عند أي كوفي شوب كل ما عليك هو الترزز هناك و تشوف العجايب سلام