[نجديــــة]

السلام عليكم ورحمة الله وبركاته

كنّا ومازلنا معكم على الهــواء مباشــرة داخل ملاهــي ((الأسرة - العقاب - الأسكان))*أختر مابين الأقواس* كشخة ملاهّينا له 3 أسماء
هنــــــاك بجـــانب السفينــة العملاقة التي حتى الآن لم أصدق أني ركبت بآخــر شيء وهي مسرعة وأصفق وأصفر وأزغرد ..
تعرفون فاتنا عرس عبدنّه وحبينا نعوضة بهالطلعة من شان نراضي بريداوية أم الهبال .. مير أنه من تالي بس تشرة شكله كبرت تعرفون عبدّنه هي قعدته
نرجع إليكم من جديد وآسفين على الخلل الفني اللي حصل .. !!
الآن نرى من فوق وبين أشجار الملاهي المغطية الممرات بالخضار والفواكة المتساقطة .. شخص ماء يمشي ويبدو أنها :@متفائلة@
عاد يقولون أنّ اللي عازمنا هي الآنسة : BU7OOR
واللي مدّهرة ومتوكلة بالعزيمة الأخت :@متفائلة@
بمناسبة عرس ولد سماحة الأم :بريداوية أم الهبال ..!
فلذلك ماندري من هو العازم الصدقي للأسف الشديد .. يبيلنا كونان يحل هالمعادلة >>كملي بلا خفة دم
أحــم عفواً .. تلك الفرشة التي ملئت من مالذ وطاب من المؤكلات وألتفاف البنات عليها
حيث أنها شرقت بالقهوة من شدة كرمهم إذ كل دقيقة منكب فنجال من الرجاجة والضحك .. ياخزياهـ مير من راعية الفرشة ولا هيّن

أحم .. كانت الآنسة بحور في تمام الساعة الثالثة إلّا ربعاً Afternoon قد أجرت أتصالاً معي لتؤكد ذهابها للملاهي
>>خبرت أحد يعزم ولا يحضر >>تبي تذبحن البنت شكله
وقالت لي مترجية أن أحضر عصراً عشان يمدينا نشبع من بعض
بس هيهات هيهات ياصديقتي العزيزة فلست أنا التي أتحكم بسيارة أخي قد يطاوعني وقد يرفض طلبي ولاّ كان جيت من الظهر لعين تكرم مدينة >>هي تسذاتا
وعند ركوبي السيارة بعد صلاة المغرب بنص ساعة تقريباً أتصلت على بحور وقالت أنها لم تحظر بعد
>>مير أشوني ماجيت من العصر تسان أرتز بلحالي فرقعين عاد الملاهي اللي تفتح النفس

وصلنا أنا وبحور جميع تقريباً .. أتصلنا على @متفائلة@ ودلتنا على المكان *ذكرته سابقاً*
أنظري سطر 2 لتتعرفي عليه
ذهبنا إلى هناك ونحن نبحث بعيوننا عن بنات من دون أمهات *سفهاء* >>تسيف أني أكره هالكلمه
حتى وقعت عيني على *ح ـلوهـ بطلتي* فعرفتهن في الحال .. تقدمت أولاً وتبعتني بحور
وألقينا السلام عليهن ثم بدأنا بالمطخ والمطيخ وأخذنا مكاننا من الفرشة ..
عرفونا بألقابهن وأسمائهن .. لكني حتى الآن لم أرى @متفائلة @
لم ألبث أن رأيتها وخلفها ثنتين من البنات .. وأقتربت منّا وعرفتنا بهن
هذي المشرفة الفاضلة >>الصيدة
1- بنت الشماسية
بسراحة لم أتوقعها كذا .. كانت هادية وحبوبة مرررره وعسوووله والأبتسامة مافارقت وجهها ياحبيلها
كنت في السابق أيام العلاقة الماسنجريّة ظننت بأنها *هيبه مــره* وبعد *مزّاحة شوي*
ومن النوع اللي إذا تكلمت مسكة المجلس >>حشى
بس والله صدق أنصدمت يوم شفتها طلعت عكس كل تخيلاتي ..وش أقول وش أخلي
أبد أبد ماتوقعتها بالحبابه ذي .. ماشاء الله بالموت سمعت صوتها غصب تفرض أحترامها
مهب مثلي أنا وبعض الناس >>ما أقصد أحد
ماأسكتنا أبد حتى اللهم ياكافي نشف ريقي عجزت أطلب ماء من القرق .. !
كلمة أخيرهـ لبنت الشماسيــة ::
* أحبــــــــــــــــــــــــــــــــــــــــــ ك *
مغازل عيني عينك
,,
2- و طبعي كذا
هذي طال عمركم من ضيوفي في الطلعة السابقة وهـ بس .. تسيف أني أحبّهـ
حتى صديقتي من طلعنا من الملاهي المرهـ اللي راحت ماأسكتت عنه
عاد من قدك ياطبعي كذا صديقتي نداوي جزتيله >>دني بذاك
,,
والبنات اللي بالفرشة هنّ :
3- نيـــران
ياناس وش أقو وش أخلي ,, هالبنت ماخلت لنا شيء أنا وبحور
ماتسمعين ألّا أصواتنا وكل اللي بالفرشة مستمعين الله يخلف علينا
مستلمين تعارف على بعض
تعرفين فلانه .. تعرفين علانه
بس والله أيضاً ذي ماتوقعته كيذا أبد ..
كنت أحس أن نيران فتاة *متشائمة* .. دايم الحزن ساكن به ... ماتضحك ولا حتى تبتسم
بس اللي بالملاهي غيرررررر ... نعجز نحكي من الضحك .. منسمه هي وبسراحه أشد وحده دخلت قلبي وتعمقت بين الأضلاع والشرايين .. وهـ بس
شسمه سلميلي على أختك الصغنونه
,,
4- قطرات
فتاة لم أتشرف بمعرفتها في النت سابقاً .. لكني تعرفت عليها في الواقع
فتاة قمة في الأحترام والهدوء تجبرك على التبسم كل مانظرتي إلى روحها السامية
ونظراتها الخجلى ... تسيف أني ودّي أصير مثلك أنتي وبنت الشماسية بالهداوة ماشاء الله
,,
5- حكااكة بريدة +6- ملفعة بناة الحارة
>>باين من الأسماء أنهن الله يخلف بس >> وش عنده الرزينة
بسراحة منسمات.. عليهن طلعات يرجن الواحد الله ياخذ بليسهن
حبوبات .. بس هبلنبي الله يهديهن من حيني نعمه يوم ركبت بجنبهن بالسفينه
متعنقطات فرقعين أشوى أنهن ماطارن .. وهـ بس وش أقول عنهن ياحبيلهن
,,
7- بريداوية أم الهبال
تقريباً مهنا بعد عنهن بالرجة بس تصدقون أول ماشفته مادريت أنه هي
شكله هـادية بس يوم تواسينا وتعرفنا وتبداء بالضحط والهبال طلعت على طبيعته ..
عاد أنا قلت :الحين صدقت أنك أم الهبال ... ياحبيله مهسترة
وكل شوي تدمع ولهة على بنته عبدنة
,,
8- اللمسة الأخيــرة + 9- بريداوية بحتة :
ياحسافتهن ماقعدن معنا ألّا شوي وراحن يلعبن عيالهن
بس قسم أنهن مقلعات .. تجدع عليس الوحدة كلمة تشققين من الضحك
عرفونا بانفسهن وسولفن شوي قصدي ضحكونا ثم قامن
وهـ بس كل اللي من طرف متفائلة يهبلون
,,
10 - ح ـلوهـ بطلتي
هذي طال عمركم أول طلعة لي مع بنات المنتدى كانت هي من ظمن الحاظرات
من قعدت لم أسمع صوتها عكس ذيك الطلعه
بس للاسف مشت بسرعة
,,
11- فخر بريدة :
عاد هذي صديقتي بدار البيان .. وهـ بس
ياحبيله ..أحبه أمووت عليه .. تقريباً شخصيته مثل قطرات
فخورة أحبـــك
,,
12- جبر الخواطر + 13بسمة تحدي 14- ونورة 11
وصلو آخر شيء وبسرعة على جيتهن طرنا نلعب بالسفينة واللعبة ذيك اللي تدور تدوخ
ماعرفتهن والله زين بس باين أنهن بنات أجاويد
>>دني بذاك
,,
15-تالي حياتي موت:
بسراحة مفاجئة جيتك وأحلى مفاجئة أنه صارت تقربلي
يقطع أبليس النت .. وهـ بس باين عليه أنه راعية سواليف مرره
بس حسافة جلست تقريبا ثلث ساعة واستاذنت
,,
16- @متفائلة@
شهادتي به مجروحه .. أموت بذيك الأنسانه
المعذرة يعجز القلم عن التسطير
,,
17- بحــور:
آهـ فآهـ ياأعز صديقة لم أصدق عيناي حينما رأيتك
أشتقت لك يالدوبا >>عاد من الأشتياق كل بين فترة وفترة نسلم على بعض تقل مهبل
ولنا طلعة ثانية أن شاء الله مع ندواي
,,
18- نجديــــــــــــــــــــــــــــــــــــــة:
عاد ذي أحسن الحضور ولا يختلف بشهادتة أثنين

بس أبقولكم موقف مضحك
بينما كنت متحمسة مع السواليف مع البنات ومع نيران خاصة
ظربتني بحور وقالت :الساعة عشر ياخزياهـ من ربي مارحنا نصلي
وأستاذنا من البنات وطيرااان لم عبياتنا وطول الطريق ماأسكتنا كل وحده
تسولف تقل تبي تطير الثانية .. ماهنا وحدهـ ماحشينا فيها بالطريق >>أتسذب عاد وحنا نلبس عباياتنا عجزنا نصلي من القرق كل
شوي أقول هذي آخر سالفه شفتي وشفتي وهي تقول زيي أسمعين بس ابقولك كيذا
يوم أخر شيء قلنا خلاص أمر نكبر للصلاة
قالت وحدة من اللي جالسين حول مكاننا وحنا نصلي : هيش هيش أنتن جايات من عفيف ولا من وين ؟ مو منّا القبله
يــــــــــــــاخزيــاة ألتفتو كل اللي حولنــا علينا وأنا هماي واقفه طحت من الضحك
وبحور زيي وعجزنا نصلي مرة ثانيه .. قالت :الله يصلحكن منّا القبله
قالت بحور:معليش حنا من عفيف
قالت:بس ولو كان سألتوا
يوم جينا نبي نكبر قالت المرهـ:تييمنو شوي (ميلو لناحية اليمين) أمر نميل ..قالت:أيوهـ كيذا
عاد يوم قضينا مصلين قالت المره:هاهـ عساكن بس دعيتولي
ههههههههههههههههههههههههههههههههههههههه
ياخزياهـ كل ماتذكرت الموقف متنا من الضحك

,,

هذي رحلتنا الخفيفة والسريعة ولا أخفيكم أنها من أشد الطلعات أستمتاعاً
بالرغم أني لم أكن متحمسة لها أبداً أبداً .. حتى أني لم أجزم إلّا يوم الأربعاء
والحمدلله أني جزمت

والله يابنات أدري أني مافصّلت الرحلة وآسفة على التأخيــر وركاكة الأسلوب
أعتــذر أشــد الأعتــذار من بنــات الرحله وخاصة @ متفائلة@

أحبــــــــــــــــــــكـ يامنتــداي الــغــالــي .. عجـــزت ألقــى أحسن منــك :
-أن قلتي عضوات مثل صديقات الواقع وأحسن ..
-أن قلتي مواضيع تفتح النفس
-أن قلتي مشرفات قمة بالتواضع والهداوة
بس باقي وحدة >>دني بذاك>>أمزح
وهـ بس وهـ بس
وشسمه إلى بنات الرياض : تـــراي الأسبــوع الجاي من الأربعاء للجمعة الثانية عندكم بالرياض بإذن الله وحوله وقوته ..
شوفولنا طلعة هماهـ .. أنا وبنات خالي بلقيس والطقة ...


::لفتــــة ::
نحن الآن في بداية الأجازة الصيفية تقريباً
أحببت تنبيهكم فقط .. أن عمر الأنسان ماهي إلا دقائق وثواني
وأيام لاتعود وليالي لاتتكرر حاولي أستغلالها بما ينفع
وأتركن عنكن طلعات الملاهي

موفقين


,,