[برجس]

[c] تحذير رسمي :

ينصح الراعي الرسمي لهذا الموضوع .. مؤسسة برجس وشركاءه للمقاولات وتنظيف الخزانات .. جميع قراء هذا الموضوع بقطع الاتصال من أجل الحفاظ على إشتراكاتهم وفواتيرهم .

:D:D
:D

** ***** **

[/c]




مدخل بايكه : المحشش إنسان مثلنا ياكل ويشرب لكن الشيطان أغواه وصار مهب كويس

إنتبهوا لا احد يركب محششين معه وهو مسافر على خط طويل – نصيحه من مجرب –


في يوم من الايام كنت ماسك خط الرياض- القصيم متجه للقصيم، ابروح اشتري تمر

تخبرون انا اكبر اخواني وابوي معتمد علي بالصغيره والكبيره، وماله غناة عن .

وقفت عند محطة بنزين وفللّت الموتر همن رحت للبقاله وشريت فصفص وعصير سنتوب وكيكتين .
عصير سنتوب بالذات لاني كنت مقبل على ليل موحش وهالعصير اذا شفطته بالشفاط يطلع صوت وابيه يجسرن خاصه وان موتري مافيه رادو والمسجل خربان .
المهم عقب ماشريت الاغراض < = = اللي يسمعه يقول شاري كراتين من محلات بيع الجمله!! وكل الدعوى كيس فصفص وعصير وكيكتين
وقفت عند البنشر وكان راعيه يماني سلمت عليه : هلا عبده رد : انا ماني عبده أنا قاسم
قلت : يابن الحلال عبده والا قاسم نفس الحروف لا تدقق – احسب اليمانيين كلهم اساميهم عبده - :D

شيكت على الكفرات والقى بلف الكفر اللي وراء الايسر ماعليه غطاء . رحت لليماني وسالته عندك غطاء بلف؟ قال : روح دور في العلبه عند مكينة الهواء . رحت ودورت واشوا لقيت غطاء واخذته وركبته على بلف الكفر < = = ياحبه للتفاصيل الدقيقه

استعنت بالله واستعديت للانطلاق عقب ماركبت الموتر وربطت حزام الامان وشغلت المكيف ... يالله من فضلك الهواء البارد يهفهف على جبهتي تسني بزر واقف بحوض ددسن وابوه يمشي ستين < = = الله من زين التشبيه :D

طلعت من المحطه بعد ان تفقدت امور موتري ومسكت الخط بكل انسيابيه وراحه < = = ترفق ياراعي ال BMW :D

كنت اتمنى يكون معي احد الشباب يوسع صدري ونسولف على بعض علشان نقطع الخط الطويل
لكن المشكله كل ربعي اعتذروا . اللي يقول مشغول مع اهلي ابشتري لهم دفاتر ومساطر وتجليده من المكتبه !! والثاني يقول : عند جدتي موعد بالمستشفى . والثالث قال : انا ما احب السفر بالليل !!! اللي يسمعه يقول نبي نسافر على بعارين

اما الرابع فطقه بالوجه بكل صراحه لا تخلو من الوقاحه وقال : اذا رحت معك وش ابستفيد؟؟!! ولد اللذينا مهب رايح الا لشي يستفيد من وراه!!
وين الصداقه؟!! وين الاخوه؟؟!! وين التعاطف بين الاصدقاء؟؟!!
يعني الصديق مايعرف صديقه الا اذا بغى سلف دراهم!! < = = ياكثر هالنمونه بالمجتمع .. تحس كل كل الناس طفارى وملحطين وعليهم اقساط وديون !!!

المهم ماودي استرسل بالكلام
مسكت الخط وأنا اهيجن على روحي واذا مليت من الهيجنه ركزت نظري على الخط وسندت ظهري على المرتبه ومديت ايديني على الطاره وتخيلت نفسي العب لعبة الدرايفر اللي بالبلايستيشن وياما دعست بنزين بقوه وياما حورفت بالموتر يمين ويسار :D

ياشين البلاستيشن اذا جت على كبر تخلي الواحد ينسى روحه ويندمج
أجل مره من المرات وعقب جولة درايفر عنيفه طلعت من البيت ابروح اجيب لاهلي خبز تميس للعشاء وصامولي لفسحة اخواني باتسر .. وانا امشي بالموتر قزيت برميل زباله – تكرمون – واقوم اشطفه بالصدام ومير يتدربى هنااااااااااك
اشوا انه بحاره مهب حارتنا والا لو كان بحارتنا كان طلع جارنا وذبحن .. لان البرميل عند بيته ساحبه عند بابه تقل ملك ابوه!! ويخلينا نجدع زبايلنا بالارض ونخيس الجيران والحاره كله .. عاد هذا جار ؟؟؟!!!!! اترك الاجابه لكم

وااااااااااوك .. والله يا انا شطيت عن الموضوع بقووووه
وش رأيكم اكمل لكم الباقي بعدين ، وانزله جزء ثاني؟ < = = انت بديت علشان تقضي :D

تدرون ابكمل وتحملوا طول الموضوع ..

وانا ماسك الخط وقبل صلاة المغرب بساعه شفت من بعيد زول واقف على جنب الخط، يوم قربت منه واثره شاب طاقن بنت البكار ومعه كيس بيده اليسرى
آشرلي بيده يبيني اوقف

لحظتها اختلطت براسي الاسئله والافكار
اوقف له؟ والا ما اوقف؟
يمكن يكون متعطل؟ طيب وين سيارته؟
اخاف يكون معه شي هاه والا هاه ؟
كل هالاشياء دارت في راسي في ثواني معدوده .. عندها اشتغل عرق الانسانيه وقررت اوقف واشيله معي واكسب اجره، خصوصا وان الموتر وسيع وفاضي مامعي احد
وعلى ماقال القايل سو خير واجدعه بالبحر
جدعت الموتر عقب ماتعديته ووقفت بعيد عنه ثم ولعت الفليشر < = = يقاله نظامي
الا والله خايف من راعي تريله هندي مانام له ثلاثة ايام ويهفن انا ومويتري وهاللي واقفن علشانه

جاء الشاب يركض وانا اشوفه بالمرآيه لين أقبل على الموتر وقرب عند باب الراكب .. فتحت القزازه وبكل لطافه وحنان ورقه التفت عليه انتظاراً لقدومه ، تخبرون مسوي خير ولازم ارسم على وجهي ملامح الحنان والعطف على الاخرين :يسمع بالحب:
على التفاتتي فتح الباب وقال : هلا بالشيخ
بسم الله الرحمن الرحيم

وش اشوف ؟؟!!
واحد له شنب كبر عقالي .. الظاهر ان شنبه طالعن وهو ببطن امه
اتوقع ان وجهه طالع في شنبه مهب شنبه طالع في وجهه
من الروعه بغيت اعشق الموتر بالاول واحط رجلي .. لكن تذكرت اني ابسوي خير وابي الاجر < = = ايه هين ، قل مايمديك
رديت عليه عقب مابلعت ريقي : هلا بك يالطيب .. سم أي خدمه؟ وبيني وبين نفسي اقول ليته يطلب سلف دراهم ولا يقول وصلني معك .
اللي كنت خايف منه ماقاله بل سواه .. بمعنى انه جدع روحه على المرتبه وصك الباب
طننننننننننننننن < = = موسيقى تصويريه معناها اني ورطت :D

اقعد به يابرجس الحين .. هذا اللي يسافر بلحاله .. خل السنتوب ينفعك :D

قعدت ثلاث دقايق وانا واقف بمحلي عجزت رجليني يتحركن ولايهونن ايديني

ماوعيت الا على كلمه قالها : هييييييه وراك واقف؟

فزيت والتفت عليه بابتسامه صفراء ظاهرها : حياك الله ، وباطنها : ودي ارجفك مع الباب
بصعوبه بالغه دست الكلتش وعشقت الموتر ومشيت
المشكله اننا مقبلين على ليل وليلي يبي يصير ليلين مع هالشبهه

مدري ليش اشباهه ذكرتن بعضو كشخه .. سبحان الله نفس الملامح نفس التقاطيع :D

استمرينا ربع ساعه نمشي وكنت خلالها أقرآ آية الكرسي والمعوذات وبعض الادعيه اللي حافظهن ، أما هو فكان يتعبث بالاشرطه ويفتح الدرج ويصكه لين لمح عصير السنتوب واخذه وحط الشفاط وبدأ يشفط ويطلع صوت < = = هالصوت هو اللي كنت امني نفسي اسمعه يوم شريت العصير .. ياخساررره
اصلا أنا ما ابي عصير السنتوب لانه انتهت مهمته وما عاد لوجوده قيمه < = = ايه هين

ثم اخذ الكيكتين وجرعهن بكل وحشيه .. وأنا لازلت ساكت ومركز نظري على الخط حتى الالتفات له ما التفت
هو وصل لمرحلة تقشيم الفصفص وانا وصلت لمرحلة الانتهاء من الادعية والاذكار .. عندها قلت بيني وبين نفسي مبدهاش ... لحد كده وكفايه .. أنا حخرق من طوري < = = صرت تسني ممثل مصري بمسلسله مالغه وتافهه ولاتضيف أي شي لعقول المشاهدين .
يقولون ان الصدمات النفسيه تجعل المرء يخرج اشياء مال امها داعي، وتجعله يتقمص شخصيه غير شخصيته الحقيقيه . وهذا بالضبط ما حصل معي
عاد هو استفزن اكثر يوم بدأ يقشم الفصفص ويتفل القشام على الطبلون والقير خصوصا واني مغسل الموتر قبل امشي وملمع الطبلون
هذا اللي قهرن وخلان أتجرأ وابدأ معه الحديث والكلام


التفت عليه بابتسامه - غير الاوله - وقلت : حياك يالطيب .. رد وهو منهمك بالفصفص : هلا
قلت : عسى ماشر وين موترك ؟ ضحك ضحكه هستيريه وقال : اصلاً ماعندي موتر
قلت : اجل وش جابك بذاك المكان؟ قال: هذا راعي تريله موصلن ، يوم وصلنا للمحل اللي شلتني منه وقف وسطرن كف وقال: اقلب وجهك وانزل
قلت عقب ماكتمت ضحكتي : ولييييش؟ قال : لاني قعدت أعضض مراتب موتره
افااااا ... الدعوى فيها تعضيض مراتب ... الله يستر من التوالي

وانت منين جاي؟ قال : من الدمام رايح له قبل يومين رحت مع شباب من حارتنا بدون ما أدفع قطه يوم وصلنا قعدوا ينكتون ويضحكون علي ويستهترون بي وبغوا يغرقونن بالبحر .
قلت ابرفع معنوياته : حاشاك عن الضحك والاستهتار .. عاد انا حبيت اني انفخ فيه زود : واضح انك شاب محترم وولد حمايل .
توقف عن تقشيم الفصفص والتفت على بوجه ملؤه الحزن وبخاطر مكسور وقال : اهلي ميتين وأنا عشت عند عمي لين كبرت ثم طردني .. قالي : البيت يتعذرك !! بحجة اني كبرت وصرت أتكشف على بناته .. صرت ادوج بالشوارع .. وتعرفت على شلل وسكنت عند بعضهم بالملاحق .

بعد جملته هذي حسيت بغصه بحلقي وشعور بالحقد على عمه اللي ماقدر يربي هاليتيم لين يكبر ويستقل بنفسه !!
لو يدري عظم اجر من يكفل اليتيم كان تطلبه يجلس عنده بالبيت ، الظاهر ان تعليم عمه شوي او انه ماسمع حديث المصطفى صلى الله عليه وسلم في الحديث الذي معناه : " أنا وكافل اليتيم كهاتين واشار باصبعيه .. " او كما قال صلى الله عليه وسلم

هالخاطره مرت على ذهني يوم سمعت كلامه .

حبيت اخرجه من هالموضوع وقلت : عندك نكته؟.. رد وهو منزل راسه : لا ... كنت مصمم على اخراجه من تذكر هالماسآه وحبيت استخف دمي شوي : أنا عندي نكته .. اسمعها

يقولك فيه محشش داخل الحمام، طقت عليه امه الباب وسالته : تبي تطول؟ رد وقال : لا أبلف يسار :D :D ... ومن زود تمثيل الدور كعيييت ضحكه طويله وقعدت اخبّط ايديني بالدركسون ... التفت لمي وناظرن بنظرة استحقار وحسيت انه بينه وبين نفسه يقول : انطم انت ووجهك

عقب هالحوار ركدت انفاسي الثائره والخائفه في نفس الوقت منه، وتطمنت انه انسان بسيط وعلى نياته .
عاد أنا أذبحن عند هالنمونه ... ادورهم دوره
والله يالخط الطويل ان يصير تسنه شربة ماء مع السواليف :D

قربت وقت صلاة المغرب ووقفت على يمين الخط وسالته : انت متوضيء؟ قال : لا
قلت : مهب مشكله تعفّر بالتراب وتيمم .. قال: صل انت وأنا ابحتريك بالموتر ..
ضاق صدري من رده .. طيب ليش ماتصلي؟ قال : أصلي بعدين

ياجماعه شبابنا ضيعوا الصلاة، وصارت مالها قيمه في حياتهم!!! تلقى الناس بالمساجد يصلون والآيات تتلى وبعض الشباب الله يهديهم واقفين بالشوارع يسولفون !! والا تلقاهم قاعدين عند البقالات يتفرجون على اللي رايح واللي جاي!!

لو كل واحد منا مر على هالمجموعات وجدع له كلمه ونصحهم صلوا ياشباب .. تسان صلح حال مجتمعنا ... لكن الشكوى على الله صارت شعيرة الامر بالمعروف والنهي عن المنكر في عرف البعض لقافه وتدخل بشئون الغير ، بل اصبح الناصحون والمنكرون قله في المجتمع، ومن ينكر تجده باستحياء وكانه هو الذي مرتكب الذنب!!
نسأل الله السلامه والعفو والعافيه من كل ذنب .

نرجع لخوينا ..

عقب ماقال اصلي بعدين حسيت انه فيه شيء ومهب طبيعي < = = بدري

بصراحه منب مخليه يقعد بالموتر بلحاله اخاف يسرق الاشرطه وخصوصا انهن نسخ اصليه
رحت وراء الموتر بمسافه بعيده وخليته بقبلتي علشان اقدر اشوف هالسمرمدي قدامي ويصير تحت نظري اخاف اخليه وراي ويجي يدحجن مع ظهري او يغولن وانا ساجد .
اللي يشوفن بحالتي هذي وانا مبعد عن الموتر يقول هذا يصور الموتر مهب يصلي :D

صليت همن مسكنا الخط مره ثانيه وتقل الرجال ركد ولا له حس ، يوم التفت له واثره نيم ..

امحق خوي .. ماش ما اعجبن الوضع .. الرفيق اللي مايسولف معك ويقرق مايبغى ولا بريال

قلت هين يابن اللذينا .. والله ما اخليك تهنأ بالنوم .. وأدوس على الموتر لين وصلت السرعه 180 وافتح دريشته بسرعه لين شخفه الهواء مع خشته .. ويصحى تقل مكبوبن عليه ماء بارد وبكل برود يصك الدريشه

قلت خل استخدم معه طريقه ثانيه

وعلى نفس سرعتي وانا ماسك المسار الاوسط حذفت الموتر يمين ومير يطيح راسه على القير ويقوم متوحش

ومير اناظره واقول معليش كنت اتقادى بين عيون القطط واشوف انا حريف وادخل بينهن من دون ما آطاهن والا لا :D

عقب هالحركه تقل صحى وطار النوم منه، قال : ماحولنا محطه قريبه ؟ قلت : فيه محطه ومقهى عقب 40 كيلو
قال : اغديك توقف علشان أسمد راسي بحجرشيشه .
قلت : اسمحلي يالحبيب انا منب ادخل هالاماكن .

قال : ليييش شايفنا داخلين غرزة مخدرات؟!!
قلت : مهب المقصد .. لكن الوالده محلفتن ما ادخل هالاماكن < = = عجزت اصرفه :D

قال : اجل وقف عند المحطه عطشان ابي ماء . قلت : زين .
وقفت عند المحطه يوم جيت ابنزل سالته : اجيبلك مع الماء ببس؟ قال : لا .. أنا مقاطع المنتوجات الامريكيه من زمان ... ابن اللذينا يبي يقاطع على حسابي تسنه يبي يدفع قرش ..

طلع الولد رهيب ، والله انه أحسن من بعض الناس اللي يقللون من قيمة المقاطعه وآثارها على المصانع الامريكيه وأقتصادهم .

مسكنا الخط مره ثانيه وفجأه التفت علي وقال : ما تبي أسوق بدالك؟ :D

قلت : مايجي منك قصور الله يسلمك .. انا نشيط ولا تعبت

تذكرت ان قدامنا نقطة تفتيش


[c] [/c]


ومع هالشبهه اكيد يبون يوقفوننا وينخلون الموتر نخل
قلت له : انت وين محلك بالضبط؟ < = = المح ودي اصرفه :D

قال قدام عقب التفتيش فيه مزرعه نزلني عندها .
طلع حافظن الخط

طيب معك اثباتك؟
قال : لا .. بس مهب مشكله انا ابسوي نفسي نايم اذا اقبلنا على التفتيش وانت قلهم خويي تعبان وظهره يوجعه < = = الله من زين العذر
انا دايم اسوي هالحركه معهم وتمشي عليهم

اقبلنا على التفتيش ويقوم يسدح المرتبه ويسوي نفسه نايم ، ابن اللذينا ضابطن الدور تمام لدرجة اني انا وهو انا صدقت
اشوا العسكري اللي بالنقطه آشر بيده امشوا بدون مايسال عن الاثباتات

طبعا هذا بسبب شكلي المحترم والا لو على هالشبهه اللي معي شبيه سعفه تسان بتنا بالقسم ذيك الليله

تعدينا النقطه وانغزه : قم خلاص تعديناهم
قام وقال : تصدق اني نمت من جد .. بس موترك حر .. شغل المكيف علشان [c] الـــعـــرق [/c]

شغلت المكيف وبعد ممشى 30 كيلو كان فيه مزرعه عليها انوار خافته قال هذي مطلوبي وقف تكفى عند هالمزرعه ، وقفت ونزل عقب ما شكرن على التوصيله وقال هذا محلنا لا تقاطعنا
قلت ابشر

بيني وبينكم تمنيت انه مكمل معي الخط لكن مايدوم الا وجهه سبحانه

عقب مانزلته شكيت في وضعه وقلت اكيد انهم يقطعون عرق بهالمزرعه والدليل انه قالي قبل شوي :
[c]

7
7
7
7
7
7
7
7
7
7
7
7
7
7
7
7
7
7
7
7
7
7
7
7
[/c]


[c] الـــعـــرق

:D:D:D
:D:D
:D

[/c]