 |
|
|
|
|
01-12-2008, 07:56 PM
|
#1 |
|
نسألك يارب غيثاً مغيثاً
تاريخ التسجيل: Apr 2008
البلد: الرياض.
المشاركات: 7,025
|
سفرتي إلى بريدة الإربعاء: 28/11/1429، ماش الأمور مدوبره.
أحيي أعضاء المنتدى وخصوصاً أعضاء الكشكول المنسمين، فأهلاً وسهلاً بكم،
وإن شاء الله إنكم بخير أتمنى ذلك: * في يوم الإربعاء الماضي كان عندي مناسبة زواج ببريدة لأحد أصدقاء الطفولة العزيزين على قلبي، فقررنا الانطلاق أنا ( كربة النخلة) واثنين من أصدقائي هما (إبراهيم) و( سليمان)، واجتمعنا عند بيت إبراهيم بحي السلام وكانت الرحلة على متن ( كورولا) حقت خوينا إبراهيم، ويوم جينا نمشي وإلا كفر الكورولا منسم ويروح أخو إبراهيم ويصلح الكفر وما رجع لنا إلا بعد نص ساعة من صلاة المغرب، ركبنا السيارة وعبينا ( full) ومسكنا الخط وكان اللي يسوق السيارة ( سليمان) ما أمدنا نتعدى تفتيش صلبوخ إلا بدت السيارة تروح يمين ويسار وش السالفة أثر خوينا ( سليمان) نصه نوم، صفط سليمان يمين وقال واحد منكم يسوق قلت أنا لإبراهيم يالله سق قال: أنا بي نوم طلعت من الدوام ومانمت الظهر، ومير أنزل أنا وأستلم الطارة وأدوس 160 علشان يمدينا نلحق على العرس، المهم وصلنا بريدة الساعة تسع وإلا أخوي اللي أكبر من سابقن العصر لبريدة ووصل الاستراحة اللي به العرس يوم صارت الساعة تسع وربع تقريباً دق أخوي علينا وقال لعلكم تروحون للعليان اللي بطريق الهدية وتعشون عنده قلت وشلون وش السالفة قال أخوي: الناس قلطوا على العشاء والعريس مشى، قلت أنا: أفا، المهم أنا قلت لازم أسلم على العريس لو كان أيش ماله داعي جاي من الرياض ولا أشوفه، دقيت على العريس وقلت وين أنت به قال أنا بفندق السلمان، قلت أبجي أسلم عليك، قال لي: الله يحييك تعال لا تمشي من بريدة إلا أنا شايفك، قلت أنا أبشر، وقبل لا نروح للعريس رحنا لمطعم رشوش اللي بالشمال وطلبنا منه روست وتعشينا يوم خلصنا متعشين ونروح لفندق السلمان ونسلم على العريس ونبارك له، ومشينا من عند الفندق ويدق علينا واحد من العيال قال: وش عندكم؟ قلنا ماعندنا شيء قال: أجل تعالوا أنا مستأجر شقة وفيه غرفة فاضية تعالوا ناموا عندي قلنا حنا: زين، وقبل لا نروح لشقة خوينا قلت للعيال (إبراهيم وسليمان) أنا أبروح أسلم على أختي قبل لا يجي رجل أختي لأنه لو جاء وشافنا يبي يلزم ناموا واقعدوا ومن هالكلام رحت لبيت أختي ويوم وصلت لبيته ويطب علينا رجل أختي وا نشبتين وشلون نبي نفتك من رجل أختي، وأسلم على رجل أختي ويلزم علينا ناموا عندي قلنا له حنا مواعدين واحد من العيال ونبي نروح ننام عنده قال بكيفكم وبقدرة قادر ما أدري وشلون افتكينا من رجل أختي، ونروح لشقة خوينا وحنا بالطريق قام خوينا ( سليمان) يطلع أصوات: آه آه آه أح أح أح، ونلتفت عليه أنا وإبراهيم وش بك قال وقفوا عند صيدلية بسرعة، ونوقف عند صيدلية وينزل خوينا (سليمان) ويشتري مرهم وشوله؟، سليمان خوينا هذا دب وتعرفون الدب مسيكين تجيه حراره بالمنطقة الحساسة بسبب كثرة الاحتكاك، المهم ويجي خوينا طاير من الصيدلية و يقول لنا بسرعة أقرب دورة مياه - وأنتم بكرامة - وقفوا عنده ونوقف عند محطة بنزين وينزل خوينا سليمان ويدخل دورة المياه ويقوم باللازم ( يدهن المواقع الحساسة)، خلص خوينا سليمان من دورة المياه وركب السيارة، ورحنا لشقة خوينا ونمنا به، وقمنا يوم الخميس الساعة وحدة ونص الظهر ونروح نتغدى، وعقبه رحت سلمت على أختي وعمتي علشان نبي نمشي لعنيزة نبي نشوف ( العوشزية) وبعد ما نمشي لعنيزة، نمسك خط الرياض، يوم طلعنا من عنيزة نبي نمسك خط الرياض ويجي راعي هيلوكس ويقول لنا ترى الكفر منسم، نفس الكفر اللي صلحناه بالرياض، ونوقف عند محطة ونلقى هندي بارد قعد ساعة يصلح الكفر وطلع بالكفر شقين، ونرقع الكفر، ونطلع الاستبنه وأثره جديدة - ما شاء الله - ونركبه، ونخلي الكفر المرقوع رقعتين استبنه، وبحمد الله مسكنا خط الرياض. * يا بعدي يا شيبان بريدة أجل العشاء الساعة تسع وربع، مالت علينا يا حقين الرياض العشاء ما نحطه إلا الساعة عشر ونص أو الساعة طعش، ولا بعد إذا صار العرس به حريم جب فراش معك لأنهم مهب طالعين إلا الفجر. * آسف على الإطالة. * ودمتم بود.
__________________
. . (( مَنْ أَصْبَحَ مِنْكُمْ آمِنًا فِي سِرْبِهِ ، مُعَافًى فِي جَسَدِهِ ، عِنْدَهُ قُوتُ يَوْمِهِ ، فَكَأَنَّمَا حِيزَتْ لَهُ الدُّنْيَا ))
|
|
|
| الإشارات المرجعية |
|
|
النمط الأحادي