[محمد الفاتح]

شارون يقـول فكـونا من العمليات الإرهابيه ثم الله يجيب المطـر

قال رئيس الوزراء الفلسطيني محمود عباس (أبو مازن<-- هذا اسمه ايام التفحيط) انه لازم نطبق خطة الطريق بكل اللي جا فيها ولا ننقي شي ونترك شي .
واجتمع ابو مازن مع كولن باول وقال له ياخي كلم شارون وقله يفك المسجونين ويشيل الحصار اللي على عرفات, الضعيّف حاجرينه في بيته وما عنده الا القناة الاولى والثانية وضايق(ن) صديره , على الاقل ركبوا له هاللي يجيبن المستقبل و ال بي سي وخلوه يكحل عيونه بهالطخوم
ومن جهة ثانية اجتمع كولن باول مع شارون وقال له لازم تهدون اللعب انت والفلسطينيين ثم مد يده لم دقن شارون وقال: تكفى ياللحية الغانمة ترا هالفترة فرصة لحل الخلافات اللي بينكم..



قال كولن باول اننا خصصنا 50 مليون دولار مساعدة للفلسطينين عشان يدبرون فرص للعمل ويقدرون يبنون البنية التحتية خصون بعد ما صار الاقتصاد في فلسطين دمار بالحيل.. والظاهر ان هالفلوس اللي دافتها امريكا للسلطة الفلسطينية انها عشان يوافقون على خطة الطريق , واكيد الواحد بيوافق بعد ما يدهن سيره



أعلنت السلطات في مدينة جوانجزو الصينية أمس منع التفال في الشوارع من ضمن الحمله على فيروس سارس اللي يعتقد انه ينتشر عن طريق التفال

وقالت السلطات أنهم بينشرون عدد الف مراقب في البلديه في شوارع المدينة لمراقبة ظاهرة التفال هذي , وتقول السلطات ان اللي في امه خير يتفل على الارض .. وتقرر ان اللي بيتفّل ويمسكونه أول شي بيخلونه يلحس تفاله واذا قضى دفّعوه ست دولارات ( ست دولارات بالصين تعادل راتب 4 رؤساء رقباء )

( خخخخخخخخخخخخخخ وينهم عن بزاريننا اول في الاوتيلات في الخارج , يطلعون البلكونات ويتفلون على العالم وانواع التويقع ثم يخشون الغرفه ورح دور اللي تفل عليك واللي متفول عليه بس انه على نياته يقول ماشاء الله ابشروا بالمطر ويقعد يراهنك مثل عبيّد ونويصر ولد اخوه )

المهم .. ان القرار ما شمل اللي يتفلون بالشوراع بس .. الا شمل القرار اي واحد يرمي قطوف الدخان في الشارع ( مدري وش علاقتها بسارس ) ويشمل القرار أي واحد يلقونه يسوي كاكا أو ببي* في الشارع ( خخخخخخخخخخخخخخ ودي احكي بس ما يصلح هنا )

ويعتقد ان سوق الحفايظ ذات المقاسات المتعدده ستكون تجاره رابحه في الصين خلال الفتره القادمه .

<<<<<<<<<-------------- مشبّه على الصين مدري وين شافها من قبل

*كاكا أو ببي ( يعني الخارج من السبيلين )


بدت الدول الاوربية تسوي خطوات عشان ما ينتشر فيروس سارس عندها, ومن هالخطوات فحص اللي جايين من الدول اللي ينتشر فيها الفيروس في محطات الفحص الدوري اللي على طريق الشرقية حقهم وتم الاتفاق على هالاجراءات يوم اجتمع 25 وزير صحة ( ترا عندهم وزير بزبوز) من دول اوروبية مختلفة وتعهدوا قدام الله انهم يحدون من انتشار هالفيروس ويتأكدون من تطبيق شركات الطياران الاجارءات اللازمة , واللي منها انهم يتابعون هالمسافرين اللي جاين من دول لاعب بها هالموذي !


والله ان سارس هذا خبيّث ويعرف من ينقي ..والدليل انه راح لهالطخمان ولا جا عندنا

يذكر انه حتى الان بلغوا عن اكثر من 100 حالة في اوروبا بس ما فطس منهم احد, وتشمل قائمة الدول اللي جا فيها المرض كل من ايرلندا والسويد وبولندا وفرنسا وايطاليا والمانيا وبريطانيا واسبانيا وشقرانيا(<-- هاللي في شقرانيا فيه عنقز ) ومن الاجراءات اللي بيطبقونها انهم بيدرسون فكرة انشاء مركز اوروبي لمكافحة المرض على غرار المركز اللي في امريكا وعلى غرار مركز امن الطرق اللي حول طلعة الزدية

في الصين: سارس يمزمز على البشرية وسلطات الامن تطارده بس ما جاب خبرهم

فرضت سلطات الامن حجر صحي على 10000 ادمي في مدينة نانجينج شرق الصين , وهذي محاوله من الفنسان لمحاصرة المرض اللي ذبح 214 منهم واصاب 4409 في هالمدينة .. كما توفى 4 في بكين واصيب 563 البارح ووصل عدد المحجور عليهم 16000





أعلنت وزارة الداخلية بالرياض قبل إسبوع انهم احبطوا بفضل من الله وتوفيقة محاولة ارهابية فاشلة عن طريق حدى الجهات الامنية اللي كانت تتابع بعض المشبوهين في حادثة التفجير اللي في بيت كان فيه ارهابي يتعبث ببلاويه ومات يوم ثارت فيه عبوه ناسفه كان يعدها للقيام بعمليات ترويع للأبرياء ولقو بعد عنده قنابل يدوية ورشاشات كلاشنكوف وفشق الله ياخذه ( الرجال مات وانا اقول الله ياخذه )



ادعوا الى سبيل ربك بالحكمة والموعظه الحسنة ( عز الله مطبقينها )

وقال مصدر مسئول بالوزاره انهم ولله الحمد اكتشفوا هالمخربين الله ياخذهم اخذ عزيز مقتدر قبل تنفيذ عملياتهم في التخريب والتدمير وقتل الابرياء موضحا ان المواد المتفجرة اللي عثر عليها مع بعض المجرمين كافيه لتفجير مدينه .. حسبنا الله ونعم الوكيل

واعلن المصدر انه باقي 19 مجرم مازالوا طليقين منهم 17 سعودي وكويتي من أصل عراقي وخبير ارهاب زيدي , و أكد المصدر ان رجال الأمن جعلهم ذخر كانوا يتابعون نشاطاتهم من فليلة بحي اشبيليه شرق الرياض يتجمع بعضهم فيه , ولما طاردتهم حدا فرق الامن اطلقوا النار وعطّو كالعاده ( يسوون الجريه ويتوزون واللي يروح فيها الابرياء ) في سيارة مواطن تحت تهديد السلاح .

وبتفتيش سيارتهم لقو معهم .. 55 قنبله يدويه ( ودك اذا جابوهم كل واحدن منهم يبلعونه قنبله ) ولقو معهم 208 طلقة رشاش و38 طلقة 9ملم و سبع مخازن رشاش كلاشنكوف فاضية وفشق خرازه ولقوا بعد في الموتر بطايق وجوازات ونشرات ولقوا حول 238 الف ريال و5300 دولار . وبتفتيش البيت اللي كانوا فيه لقوا خمس سحارات كبيره فيها عجينة متفجره ( كميات هائله ) تخيلوا خمس سحارات فيها 391 قالب وزنها 377 كيلو .. ولقوا بعد 4 كلاشات وثلاث صناديق ذخيره فيها حول 2250 طلقه ولقوا خمس كمبيوترات ولقوا عدة تنكر بواريك وخلافه ( يعني ما عندهم مانع يسوون اي شي لو يستخكرون في سبيل القتل والارهاب )

ومن المعروف عند الجهات الأمنيه هو إن هالمشبوهين هم من اعضاء تنظيم القاعده اللي يقوده المارق بن لادن ومصاريته الظواهري وانتم جايين . ومنظمة القاعدة هي إحدى المنظمات الارهابية التي تتخذ الدين الاسلامي ستار لها في عمليات قتل المدنيين والابرياء ويختبيء كبار قادتها وعلى راسهم ابن لادن في الكهوف والجبال خوفا من القاء القبض عليهم بعد سلسلة من الجرائم ارتكبوها في السنوات الماضية ضد المدنيين في عدد من الاماكن في العالم .

وما نقول الا حسبنا الله ونعم الوكيل على اللي غسلوا مخ هالشباب لدرجة انهم مستعدين لقتل عائلة او طفل في سوق ويمكن يكون احد ضحاياهم اخوه او اخته او امه وكله بإسم الاسلام اللي بريء من هالمجرمين