|
ماذا تفعل لو لدغك عقرب او ثعبان ... طريقة فعّاله من مجرب.
مرة من المرات كنت طالع للمزرعة على الكابرس 85 الله يرحمة لحالي مامعي احد ... لأن اهلي شدوا منها ودخلو الديرة من زمان . المهم يوم وصلت المزرعة قلت أبشوف وش سبب التقطيع الي صار لها النظيّفة وفتحت الكبوت وصرت اناضر ولمس وفصل وشبك بها السلاك. ويوم قظيت صكيت الكبوت وطمبست على هاك الخرقة با الأرض (قطعة قماش) وخذتها ابنضف يدينى من الزيت والوصخ ويوم حطيتها على ذراعي ... حسيت أنه كأن فيه دبوس حار جدا ينغرس بذراعي فجدعتها بالأرض على طول وناظرت ماشوف دبوس ولا شي لاكني احس انو فيه ينغرس ويروح داخل ... وصرت امسح مكانه بيدي الثانية وما فيه فايده فقلت اكيد لدغني شي من الخرقه فأخذتها ثانية ونفظتها ... يوم طاحت منه!!! ... عقرب صفراء بطنه أكبر من مسكت مفتاح كابرسي مرتين ( نسميها ((عقربان)) وهي من أخطر العقارب ولذلك سموها بها الأسم. المهم وش اسوي الديره بعيده ولحالي وعقربان بصراحه خفت بااااا لحيل المهم ربطت يدي من عند أبطي وقلت ابمكن روحي قبل يسري السم بجسمي ركبت السياره ... ابشغل عيت تشتغل!!!! وش السوات ... ألألم بدا يزيد ... ففتحت الكبوت مره ثانيه ابشوف وش انا خربت لاكن صرت اشوف المكينه كله اسلاك وليات وصرت ما اركز من الألم والخوف ( بعذري لحالي تراي ). فتركت السياره ودخلت البيت (منزلنا سابقا) وصرت استدير وما أدري وش اسوي وبديت اصيح طول حلقي من شدت الألم ... فدخلت المطبخ صدفه ما ادري وشو له دخلته المهم وقعت عيني على القز ( الغاز ) الي نسوي فيه الغدا والشاهي لا كشتنا با المزرعة .... فأ شعلته وصرت أضع ذراعي وخاصة مكان القرصه ( اللدغه ) على النار وأحاول أتحمل الحرارة بأقصى ما يمكن ثم أبعدها ... وذابردت شوي رجعته مرة ثانيه وثالثه وهكذا ..... ولا أذكر كم مرة .... المهم انني بعد عدة مرات صار الألم يتراجع ويخف شيا فشيا حتى أنني صرت لا أشعر الا بحرارة نار القز ... فطفيته وطلعت بعدها فصرت احس بألم خفيف بحجم حبة الفصفص على ذراعي. وزال بعد قليل والحمدلله ... ثم دخلت بهاك الغرفه ونمت عقبة نومه عميقة الا هالحين طعمه براسي.
هذا موقف صار لي من زمان قبل الجوالات والأتصالات وحبيت أشارك فيه والتجربه خير برهان. والي يصيره مثلي ولا عنده قز يشب نار. وشكرا ... وعذرا على اني كثرت عليكم الخرط ولا عطيتكم الزبده على طول.
|
08-02-2009, 08:28 PM
النمط الأحادي