 |
|
|
|
|
11-02-2009, 03:26 AM
|
#1 |
|
عـضـو
تاريخ التسجيل: Aug 2007
البلد: جسمي هنا غير أن الروح عندهم
المشاركات: 1,774
|
بينما كنا حجيج إلى بيت الله الحرام <أسلوب لايقاوم.. قصة حجتنا !
بينما كنا حجيج إلى بيت الله .. وكنت بصحبـة أختي وزوجة أخي .. وصلنا لمخيمنا في وقت متأخر وكان والدي قد استأجر لنا خيمــة خاصة من ظمن مخيم كامل يظم مختلف الاجناس .. أول ماوصلنا وقفنا لنا شوي ندور الخيمــة وندور وين ياناس حنا مستأجرين خيمـــة ولقينا كلش ممتلي أخر شي قامت ست الحسن والجمال زوجة صاحب المخيم قالت : واا خزياه منكم خيمتكم نايمات به الداعيات<<مكرمتهن على حسابنا !! تجولو بالمخيم لما يقومن ويطلعن قشهن ثمن تدخلون .. <بداية موفقــة , ياسلام حنا منهدين وتونا جايين هذا الاستقبال موب ذنبنا ان الداعيات نايمات بخيمتنا قال ايش قال تمشو بالمخيم .. هالمخيم ودكم تسمعون به ولا تشوفونه ثلاث خيام لو نبي نتمشى مالقينا لنا مفلحز .. وحنا نطوف على الكعبـة عفوا المخيم .. نزل الفرج قالو تعالو طلعن الداعيات ..يالله لك الحمد .. وقعدنا واستقرينا بالخيمة وجبنا لنا قهوة وتمر وسنع يالله من فضلك الا وتدخل وحدة قالت هذا خيمــة الـ..... , حنا ايه ياهلا ومسهلا < طبعاً مانعرفه بس الوالد الله يبارك فيه مجمع له ثلة طيبة من الناس يبدو مستكثر علينا الخيمــة هههه أمزح والله مااظلمهم نعم الثلة الطيبة وحنا نشرب الفنجال الثاني ولاي اغص ويطق باب الخيمة صوت عجيب >>هادي خيمة الــ , انا دايرة اجلس معاكم هو اصلن ابوكم دلني عليكم ..! يالله حيه يالله حيه < سودانية ولا نقعد شوي وانا ابد بالفنجال الثالث الا الخيمة ترجد انا مين .. وفي هذه الاثناء الاي اسمع احد برى يقووول هااي هزي خيمة الــ .. انا والله ابوكم دلني عليكم وجيت <<الاخت لبنانية .. هلا بالبنانيين كلهم شرفتي .. لا ونسيت اقولكم اللي اعظم من هذا السودانية انفة الذكر جايبة معه ضناهااااااااااا أصغر حاجة على مر التاريخ بنته توه طالعة من النفاس ومجيووبه لا اله الا الله <هذا اللي ناقص لا والاشنع من هذا كله اسم البنت الصغيرة مع انه سودنية الا ان اسمه مزنـة  على كفيلته طيب الله روحه !!المهم ونقعد يومين والا تدخل علينا مرة ماتعرف تحكي عربي بس تفاهمنا معه بالاشارة ان ابونا كازه لنا عن طريق ولده يالله حي اهل الجزائر كلهم وه بس قسم الاخيرة عجوز طعمه تهبل عيونه زرق وبشرته مشدوده املح من لميييس <سيكو مادري قضو ولا بقى أحد نسيتــه !! طبعا الخيمــة بقطــة كبر أيدي بس مع ذلك له جمهور  .. اللي ضاقت عليهم خيمتهم ويحسبون خيمتنا سبيل نقلو عندنا .! واللي يقربون لجد ابوي منول درو اننا حاجين وانفقت خيمتنا ونقلو لنا..  وصارت خيمتنا حفلة كل بين مفرش ومفرش مفرش ونص المفارش طالعات على برى بالعراء طبعاً .. وطبعاً النازحين الجدد كل واحد ساحب له بطانية ومفرش وحنا يااهل الدار نصنا بالارض ومتقاسمين عباة حدانا نتغطى به ..ياحياة الشقى < ؟!, .. وحنا حليميــــــــــــــــن بهم ولا مب قصور(ن) بنا ..  المهـــم قضينا من سالفة الخيمــة .. وبدت سالفـة المحاضرات .. وما أدراك ما المحاضرات.. وكان طريقة المخيم أنهم موصلين مايك لكل خيمــة وفيه شيخ معروف جداً مخيّم معنا وكلامه روعه ويستضيف ناس توهم مسلمين يقولون قصصهم ويصيحون مرة شي مؤثر.. وحركات ع مستوى عاد على الجانب الأخر به خيمـه كبيرة للحريم .. وبه داااااااااااااااااعيااااااااااااااااات .. وما أدراك ما الداعيااااات !! المهم مرة وحنا منسجمين نسمع قصـة شخص يرويها بنفسه وكلام رهيب للداعيـة المعروف .. الا وتجي صاحبة المخيم وتفصل المايك قالت لا تعالوا الداعية تلقي محاضرة بقسم الحريم..  طبعاً تصرفها غير لائق بس حنا عديناها ورحنا نسمع المحاضرة .. عاد ابقولكم وش فحوى المحاضرة اللي فصل المايك عشانها..  ولا أنسى أننا اصيع ناس بالمخيم بما اننا ماحضرنا المحاضرة من أوله .. أستغفر الله .. الله يتوب علينا بس .! بس يوم دخلنا وأثره تنصح عن المشاغل <!! ,, أعتقد أن الحج وقت عبادة وتذكير بالله موب وقت هالحكي.. قالت >> الداعيـة ..أن المشاغل مخيفات وحرام وانصح الحريم يفطنن لبناتهن من خطر المشاغل واذكر قصة بنت راحت تسرح شعرها بالمشغل ويوم رجعت صارت تستفرغ وأثرها طلعت حامل <بنفس اليوم؟! ,, طيب متى أضنت أولاه ؟! شكله من بكرى ! والله ياهي وناسه بعد ..كلكم روحو لمشاغل لاصارت كذا السالفـة !!  وكملت حديثها عن حرمة وخطر المشاغل العظيم .. وأن فيه مشغل أسمه مشغل كذا وكذا وهو عبارةعن مجموعة عصابات يخططفون البنات ويفعلون بهن الفواحش !! < ياسلام ولا فيه حكومة ولا هيئة توقفهم تسوي شي!! الدنيا سايبـــــــــــة !! .. إلى الأن عادي ماقالت شي لكن المفجع بالأمر لما كملت كلامها >>أن اللي تبي مشغل مضمون 100% تجي للمشغل حقي وان اسمه كذا وكذا واننا مهنا زين شغلنا ورخيصين !!!!!!!!!!!!!!!!!!!!!!!!!!!!!!!!!!! وأن تراه خلف الدائري الشمالي بمخرج خمس طعش عن يمين مادري وشو ثم وزعت كروت المشغل!!!!! أموت أنا على الدعايات واستغفال الهمجات <<سجع!! وقالت ابقولكم من القصص المؤثرة التي تحدث في مشغلنا< وتتوارد الدعايااااااااااات للمشغل .! أنه مرة جتن بنت قالت ابي مكياج حلو .. قلت له اذا تبين مكياج حلو انصحك بصلاة الليل .. تقول ان البنت طلعت من عنده يوم صار من بكرى أتصلت تشكرني قالت ياختي اني كل امس وانا اصلي الليل يوم رحت للجامعة اليوم مهنا أحد ما سألن عن مكياجي!!!!!!  وأني قلت لهم مكياجي صلاة الليل .! والى أخر القصص المبكيـة !!   بس ياخي غريب بلال مؤذن الرسول صلى الله عليه وسلم كل عمره يصلي ويأذن بالمسلمين .. ويذكرون أنه عبد أسود مع ذلك.! بس عاد أقولكم صدقوها لان بلال رضي الله عنه أكيد أنه من الشواذ.. والحرمـه أبخص.!  ..يتـــــــــــــــــبع بكرى أن شاء الله مليت وأنا أكتب .. لمّا تكتمل لكم السالفـة راح يتضح مقصدي من العرض هنــا .. 
__________________
[POEM="font="Arabic Transparent,5,deeppink,normal,normal" bkcolor="transparent" bkimage="images/backgrounds/.gif" border="none,5,gray" type=0 line=0 align=center use=ex num="0,black""]أحبّاءنا والدهرُ فَرّقَ بينَنَا= يعزّ عَلَينَا من بعِيدٍ نوَدّعُ بعثتُ لكم والشمسَ مني تحيّةً= لتنشرَها فوقَ الحمى حين تطلعُ وها أنا أقضي الليلَ أرقبُ رجعها= فهل لي سلامٌ منكمُ حين ترجعُ ويا أيها البرقُ المحلّقُ في الفضَا= يطلّ على أطلالهم وَيُلَعلِعُ بِعيشِك قل لي هل ديار أحبّتي= بها القوم صرعى وهيَ قفرٌ وبلقَعُ فإن كان ما أنبَأتَ حقّاً فسر إذن= إِلى خالقِ الأكوان إنّك أسرَعُ[/POEM] آخر من قام بالتعديل أراسيل سلمان; بتاريخ 11-02-2009 الساعة 03:29 AM. |
|
|
| الإشارات المرجعية |
|
|
النمط الأحادي