 |
|
|
|
|
11-03-2009, 04:33 PM
|
#1 |
|
عـضـو
تاريخ التسجيل: Mar 2009
المشاركات: 4
|
انتبهوا حذروا أبناءكم قبل فوات الأوان،،،، انظروا ماذا فعلوا الشرطة بأخي ..
بسم الله الرحمن الرحيم
الحمد لله الذي جعل المواطن السعودي أكثر من يتعرض للأزمات في حياته ، والحمد لله الذي جعل الدوائر الحكومية والعسكرية خاصة غصة في حلق الشعب السعودي ، والحمد لله الذي جعل رجالات الشرطة لاوجود للرحمة في قلوبهم ، والحمد لله على كل حال حيث حصلت معي هذه القصة حتى أحذر أخواني المسلمين الذين يحلمون بالحياة الكريمة والحياة البعيدة عن الأتعاب والأوجاع ، والذين لا يرضون الظلم ولا يرضون أهله لأن أهله من أخس خلق الله.......... أما بعد... يا اخوان لا تلوموني فوالله من شدة ما أجد في نفسي ، وما أراه من تعب والدتي من الحدث كتبت هذه السطور حتى تأخذوا حذركم وتنبهون عيالكم من بعض المتلاعبين في قطاع الشرطة . -- أعطيكم القضية والسالفة أول بأول عشان تعرفون المشكلة بحذافيرهـ في الأسبوع الأخير الذي قبل الإجازة اللي بين الفصلين وفي يوم السبت دق علي أخوي الكبير وقال : أنا بالشرطة ولازم تجي ... رحت بسرعة للشرطة وأنا أقول اللهم اجعله خيرا ،، لقيت أخوي الكبير ومعه أخوي عمر اللي يدرس بثاني متوسط ... قلت سلامات وش صاير ،، قال النقيب << أحتفظ بالأسماء لين أشوف وش مصير أخوي>>:إن هذا ال<كلام قذر> دخل مدرسة علي بن أبي طالب بالليل وكسر القفل والدريشة وأحرق بعض الأوراق ووووووووووو...... كلام كثير وأنا أسمع وأنا مفجوع من الي يقوله........ وقال إنه اعترف ووقع .. سألت أخوي عمر : قال إيه وهو خايف . وقال : يطلع بكفالتك وبعد الإجازة نتصل عليك وتجيبه لنا.. أول ما طلعنا من الشرطة سألت عمر وقال : والله ما سويت شي لكنهم ضربون عشان أعترف وأجبرون والنقيب سحب اذني بقوة عشان أعترف. ووالله إنه صادق وأنا أعرف أخوي زين ،، وبعدين كيف يكسر قفل المدرسة <<وقفل المدرسة قفل حصالة بزارين؟؟>> وبعدين أخوي بالمتوسطة يعني بزر ، وهو من النوع الخواف شلون يدخل المدرسة لوحده بالليل . والوالدة تقول والله إنه نايم وقته وأنا مقفلة الشقة والمفتاح معي <<لأنهم ساكنين بشقة>> وديت أخوي وأخذت منه كل التفاصيل كيف اعترف وكيف أجبروه ،، ورجعت للشرطة....... دخلت على النقيب الظالم وشوفوا ايش قال :: قال هو اللي اعترف وصحيح إني سحبت اذنه وأجبرته لكن ما ينفع هذا لأنه اعترف،،وقال: أصلا هذا واضح من وجهه إنه ما يجي منه إلا كل شر ولا يجي منه إلا الكوارث . سبحان الله وأنت وش يجي منك يالظالم ، وبعدين تعرف وش راح يكون بالمستقبل ، هو أنت تعلم الغيب يوم صرت نقيب؟؟ المهم وعدني إن الملف ما راح يتعدى مكتبه إلى بعد الإجازة..لكنه كذب علي <<يحق له نقيب من يقدر يقوله شي>> وبعد الإجازة......... اتصلوا وقالوا لازم تجيب عمر ... أخذنا عمر وقالوا لازم يروح لدار الملاحظة ببريدة............ الصراحة انصدمت وأخوي دمعت عينه .. ووالله إن الكافر لو شافه يرحمه ،، لكن رجال شرطتنا منزوعة الرحمة من قلوبهم.. ووالله تركت أخوي ودموعي على خدي....وأترجى الرائد،،،لكن ما نفع.....حسبي الله عليكم... هل هذي أخلاق رجال الشرطة ،، هل لابد أن يكون رجال الشرطة ذو قلوب قاسية...... حسبي الله عليكم........... رحت للبيت وأنا ما أدري وش أقول لأمي،،،لأنه تشتكي من الضغط .... بس لازم تعرف.. والمسكينة يوم درت انفجرت بالصياح وارتفع عنده الضغط......... v v v v v ثلاثة أيام ما نعرف عنه شي ورحت لهم بيوم السبت......بعد ما درت كل بريدة أدور عن أخوي..... وقالو الزيارة ممنوعة عنه ..يا ناس والله قهر نتعب بتربية عيالنا ونصرف عليهم طول حياتنا وبالأخير ما تقدر تشوفه وكأنك مخلفه وناسيه... قلت وش صار عليه؟؟ قالوا ما صار شي.. لكن يمكن يوم الإثنين يطلع بكفالة......... بس جاء يوم الإثنين وقالوا مددنا التحقيق خمسة أيام زيادة....... حرام والله حرام،،،،،،،والله لو إنه ارهابي!! حاطينه بزنزانة لحاله 24 ساعة بالله يستحق بزر بالمتوسطة كل هذا......... المسكين أفكر بحاله وش يقول بنفسه ،، وش ذنبي ، مثلي مثل غيري ، مثل أي طالب يروح للمدرسة يحاول ينجح يعيش حياته.. يبر بأمه ويخدمه <<ووالله هو اللي يخدم الوالدة والحين أمي فاقدته>> قالي رئيس التحقيق : قل للمدرسة تكتب ورقة وترسل من الشرطة بالفاكس ، بأن المدرسة ما تطالب بشي ولا فيه أي شي مهم متلف.. v v v جيت من بريدة مأمل خير وبسرعة للمدرسة ...... لكن مدير المدرسة المحترم اعتذر وقال لازم من إدارة التعليم...... طلعت رحت للشرطة دخلت على الرائد والنقيب وقلت : خاطبوا إدارة التعليم فاعتذروا ........ طلعت رحت للإدارة ، وكل واحد يرسلن للثاني لأنهم ما يعرفون عن القضية هذي أي شي،،وبالأخير قالت الإدارة: مدير المدرسة هو اللي يكتب.......لأننا ماندري حتى عن اسمه...كل اللي نعرفه إنه تم القبض على السارق وأنه من نفس المدرسة. ورجعت لمدير المدرسة وبدا يتفلسف ثم اعتذر .......... v v v وطلعت من المدرسة وبعد ما أيست وإن أهل الرس ماراح ينفعون..... اتصلت برئيس التحقيق وقلت له ، وقالي:: معناه إنه ما راح يكتبون شي بس يصرفونك.......... v v v حسبي الله عليكم ،، حسبي الله ونعم الوكيل ،، يا ناس والله لو إنه مجرم والله ما يقدر يسويه إلا سارق خبير أتحدا أي واحد من هذولا إنهم يكسرون قفل المدرسة ... والله لو إنا ما نفهم ............. حسبي الله عليك يالنقيب يالظالم ولو كان فيك ذرة من الذمة كان كتبت بالملف إنك أجبرته على الإعتراف... حسبي الله عليكم كل يوم يزودون مدة التحقيق لأنه مصر على عدم الإعتراف.... يعني إلا غصب تعترف حتى لو كنت بريء. v v والوالدة المسكينة تدعي عليكم يالظالمين ....... حسبي الله عليكم ياشرطة الرس وياالمحققين بدار الملاحظة حسبنا الله ونعم الوكيل والله صرنا بزمن ما يحاسب فيه إلا الضعيف حيلهم بس على هالأيتام المساكين واللي ما معهم {و} لكن معنا الله سبحانه وإذا ظلمتونا بالدنيا بنقتص منكم بالأخرة اعذروني فوالله من حرقة ما في قلبي كتبت هذه السطور ثم اعذروني لأننا تعودنا أن نتكلم على الدوائر الحكومية كالذين يتكلمون عن الهيئة ثم أين الذين يطالبون بإغلاق الهيئة فإن الظلم عند هؤلاء الشرطة وليس عند رجال الهيئة إلا كل خير فالهيئة تحفظ الأعراض والشرطة يدعون أنهم يحفظون الأنفس والأموال فما فائدة الأنفس والأموال بعد ذهاب العرض... وأقول أن أمي صحتها ليست بالجيدة فوالله لو حصل لها أي مكروه فبسببكم يا ظلمة..... فأرجو ممن يستطيع فعل أي شيء ألا يقصر معنا ولا تنسونا من دعائكم. |
|
| الإشارات المرجعية |
|
|
النمط الأحادي