[نجديــــة]

,,

السلام عليكم ورحمة الله وبركاته

بمناسبة تكليف عزيزتي 乂♥ متفائلة ♥乂 بالإشراف
قررت الوشسمه .. أني أفتح جوالي > وأنخل ماعندي من مواقف سجلتها

7
أوالله مقدمة بعد

(1)

أخوي الكبير يوم هو صغير :D مع ولد خالي "محمد"
جالسة أمي عندهم وتقول لاخوي : من ربك؟ مادينك ؟ من نبيك؟
وبما أن أخوي يمتاز بالذكاء كأخته تماماً ..فأجاب عليها بـ :
ربي الله .. وديني الإسلام .. ونبيي محمد صلى الله عليه وسلم
وانتقلت أمي لمحمد تسأله نفس الأسئله .. فأجابها ببرائة:
ربي الله .. وديني الإسلام .. ونبيي عثمان
>>هماو قال اخوي محمد .. قال الدعوى اصدقاء

(2)

عمي صالح الله يرحمه قبل وفاته كان إذا شاف "عروسة" مع
حدا بناته أو حفيداته .. أخذه منه وقطعه تقطيع وعطى البنت "فلوس"
بدال اللعبة ... فلذلك وكما يقال كل ممنوع مرغوب :113
دايم يمشي ويقطع من عرايسهن وعلى هالمنوال
أثر وحده من حريم عياله أضنت وجابت بنت , عاد جايه
لمّه بنته أم 4 سنين ..ترررركض وتقول لأمه غبي البنت
بسرعة ياحبيلك ..جاء ابوي صالح والله أن يقطعه
وهـ بس ياعمّي الله يرحمك


(3)

عاد هالحادثة ماأبطت مره أمي أرسلت أخوي
للسوق علشان يجيبله "صابونة العنز" أو كما يسميها البعض
صابونة الغار .. المهم أن أخوي دار كل السوق يدوره ولا لقاه
أومير يرجع لأمي وهو حمق يقول عجزت ألقآآآهـ كلللش
كل مادخلت محل عطارة أقول لراعيه : عندكم صابونة تيس
ويقول :لا ,أول مرهـ أسمع فيها..!
عاد وأنا أنزل مع الدرج بغيت اتدربا من الضحك

اجل صابونة التيس تنسييييييييييييييييم قسم

(4)

مرة جالسين بالصاله .. وأخوي فاتح على المبارة
ومتحمس معه وكانت جدتي جالسة بجنبه ومتحمسة معه
أومير تحمق منهم قوة ..قالت/الحين كل هالملعب بكبره طول وعرض ياخزياه
مابه ألّا كورة وحده يتهاوشون عليه ياكافي ...؟!
أنا أقترح يحطون أكثر ,علشان مايتداززون ويتكسرون علشانه فرقعين جدي

ونعم الرأي ياجدتي العزيزة .. ألّا أنتي وشولة تشوفينه :D

(5)

مرة أمي تكلم وحده بالتلفون .. قالت أمي: كم رقم أم فلان؟
قالت :مفتاح بيته زي مفتاح بيت أهلي بعدين 3348
وأمي فوقه 17 علامة استفهام .. وش عرفن برقم بيت أهلك
وثاني شيء ورا ماتقولينه كل ذي زوله :D

(6)

مرة من المرارير اللي راحت .. كنا بالفصل
بحصة التاريخ تحديداً سألت المعلمة سؤال:
لماذا كثر في عصر الملك الصالح أيوب المماليك..؟
وكنت متحمسة قوووووووة واصبعي انقطع
وحلقي أنبح من الصراخ :استااذة استااذة
يوم قومتن الأبلى وعلى الفور أجبت :
بسبب خوفه أن ينقلب البيت "الأبيض" عليه
عاااد تبون الأبلى ماتلقونه من الضحك
أجل البيت الابيض .. ياحسافة الحماس مير
التصحيح: بسبب خوفه من انقلاب البيت"الايوبي" عليه
عاد من حبّي للسياسة قلت البيت الابيض ولا كوندليزا رايس او مادري وشي


(7)

بأيام المخيم اللي راح , الله يعيده على خير وأحسن حال (آمين)
كان أخوي مسوي لعبة الأمثال لخوالي
"عاد أحس انه معروفة اللي هي تمثيل المثل ..!"
المهم كان اخوي جايب علبه وفيها أوراق كثيرة صغيرة , كل ورقة
مكتوب فيها مثل .. ثم يقوم واحد من الفريقين ويسحب ورقة ويطلع له المثل
ويبداء يمثله لفريقه , وذات مره من الزمن جاء الدور على حدا خوالي المنسمين
وطلع له مثل مصلللع مهب لم ديرة .. يعني صعيب شوي
عاد وشلون مثّل خالي المثل جالس يأشر على الأرض ويرسم مربع
وبعد جهد جهيد أكتشفوا أنه يقصد "البلاط" ومع المحاولات الكثيرة والتركيز صار يقصد "السيراميك "

إلى هنا عجزوا يفهمون إشاراته وجلسوا تقريبا نص ساعة وهم حالتهم حاله
وشيل وحط وصراخ ومنابط مع هالمثل .. !
أخر شيء تشتش خالي وحمق قوة وصرررررررررررررررررخ عليهم
وهو يقول ( العوض للسيراميك .. العوض للسيراميك .. ماتفهمون) ؟؟؟؟؟
ثم ناظر وجيههم المندهشة وقال : المثل هو " العوض ولا القطيعة "
بس عجزت أمثله لكم إلّا تسذا .. وش تبونن أزين ؟!

بعدها تقلّعت أطناب الخيمة من شدة الضحك وعجزوا حتى يكملون
اللعبة عقبه .. حتى أن بعضهم عجز ينااام كل ماتذكر هالموقف
تنسيم خالي قسم أجل العوض للسيراميك

(8)

مره يوم جت شغالتنا من الحج , يحول فرحة قوة وشارية لنا هدايا
وشارية لجدتي مقطع مهنا ملحه به شك وكسره مع ورا
ومخابي مع الجانب >>أهم شيء يهيل العقل ماشاء الله
أومير تستانس جدتي قوة .. عاد إقاله تبي تشكره وتسذا
قالت لشغالتنا : عسى بس مافي كلافه عليكي
>>>>والله يانا تبطحت من الضحك >تحسون أني والمه
بس قسم تنسيم العجز ياحبيلهن..أجل عسى مافي كلافه


(9)

يوم أنا بالروضة بسم الله علي ..الحين أبتخرج
ياسرع الدنيا بس الله يكفينا الشر يارب >>قلبت
المهم كانت تدرسنا وحده مصرية مهنا حليله
عاد اذا جت تقراء علينا القرآن .. كانت تقراء بلهجته
وذاك اليوم كنت جالسة عند أمي تسمع لي سورة الفلق علشان بكرى..!

يوم وصلت الآية (ومن شر النفاثات في العقد) كنت أقول
(ومن شر النفاسات في العقد )ثم أهلي يموتون من الضحك
ويقول لي أبوي (النفاثات) وأقول :لا لا خطأ عليكم
تقول الأبلى ( النفاسات) >>عاد كل الناس خطأ الى الابلى
بتلت على هالمنوال حتى دخلت أولى ابتدائي وصححت لي الاية
ابلتنا بتاع الابتدائي .. ولا ماعندي نية أصدق أهلي
وهـ بس كاد المعلم أن يكون رسولا

(10)

أترك هذه المساحة لكم


,,


وهـ بس ياحبي لكم .. تقبلوا ثقل دمي المتواضع

إن أصبت فمن الله وإن أخطأت فمن نفسي والشيطان
والسلام عليكم ورحمة الله وبركاته