 |
|
|
|
|
|
||
| ســاحـة مــفــتــوحـــة المواضيع الجادة ، والنقاشات الهادفة -- يمنع المنقول |
|
|
أدوات الموضوع | طريقة العرض |
14-07-2009, 02:06 AM
|
#1 |
|
عـضـو
تاريخ التسجيل: Feb 2008
المشاركات: 441
|
أبي سينما , ولا قسم بالله مالي قعدة بالسعودية
السلام عليكم ورحمة الله وبركاته
صباح , مساء الخير لأعضائنا الاعزاء قبل أن أبدأ موضوعي أبتهل إلى الله بالدعاء بأن يرحم فقيد الأمة ومصباح الدجى شيخنا ووالدنا الفاضل ( عبدالله بن جبرين ) رحمه الله تعالى موضوعي اليوم يتكلم عن السينما , اللي أزعجونا عنده وكأن الحياة ماتمشي إلا بسينما , ولكن هذه بعض العقول ! اللي خلاني أكتب الموضوع وأتشجع لكي يرى النور في هذا المنتدى الغالي كلام صاحبي الغالي الذي يسكن في مدينة الرياض حينما قابلته في مدينة الرياض في بيته العامر ( ترى العامر موهب عمتي نورة ) وفعلا يوم سمعت كلامه وجلس يفضفض لي سقطت دمعة من عيني , فدخلت يدي بمخباتي أبطلع المنديل بس للأسف مالقيت منديل , وقلت مالك إلا شماغك وعلى فكرة ترى الشماغ موهب بس نلبسه له وظائف كثيرة , بس وين اللي يفكر ؟ ( قا , قي , قو ) ( القا والقي والقو لأبو ريان بسسس) عاد تصدقون إن فيه شماغ لي وعزيز علي الله يذكره بالخير لو ألبسه الحين كان مايغطي رقبتي من قدمه أول مرة لبسته يوم كنت بسادس إبتدائي قالي الوالد : إذا نجحت بتقدير ممتاز , ابشر بالهدية اللي ماتنساه طول حياتك عاد أنا يوم سمعت بالهدية , قلت قسم بالله لأجيب الممتاز وفعلا يوم أخذت النتيجة وشاف أبوي شهادتي قالي : والله انك بيضت وجهي وعسى الله يوفقك قلت : زبدة الهرج يابو خالد , وش صار على الهدية اللي وعدتن به ؟ قال : وش هديته ؟ ( الجحدة مثل السلام عليكم عنده بلا بشكله) عاد أنا عبرتي والمه , ويوم قربت العبرة تطلع قال : واحد , صفر , أمزح معك وابشر بالهدية , وبإذن الله بكرى العصر تبي تشوفه عاد الوالد مسوي نفسه ظريف ومن الوناسة سلكتله وقلت اضحك ماتسوى فرحته ومر الوقت بطئ ومن الوناسة ماجاني النوم بس جالس أفكر بالهدية اللي يقول ماراح تنساه طول حياتك ويوم راح أبوي يجيب الهدية المرتقبة ويوم شفت الوالد يدخل البيت ومعه كيستين كبار شهقت من الفرحة تدرون وش فيهن الكيستين ؟ قسم بالله شي يرفع الضغط ويكبس السكر لعله الوالد الله يحفظه دخل محل ملابس رجالية وشراله أغراض خاصة له وفيه عرض بالمحل مسوين فيها ترغيب العرض يقول ( اذا اشتريت بأكثر من 100 ريال , تحصل على شماغ مجاني بسعر ريال فقط) لعله الشماغ المجاني صار من نصيبي وصار اللي بريال هديتي اللي ماراح أنساه طول حياتي قسم بالله يوم شفت الشماغ كرهت الدراسه كله بكبره , وتحطمت نفسيتي لأني قايل لولد عمي إن أبوي مواعدن بهدية عاد ولد عمي معه سيكل اسمه ( شبح ) يلعبون علينا بالإسامي وحنا ياغافل لك الله فسألت ولد عمي وش تتوقع تكون الهدية ؟ قال : مايبيلها كلام أكيد سيكل شبح زبدة الهرج إن الشماغ يوم بدى مايغطي رقبتي وتقاعد من وظيفته عطيته الشغالة عشان تمسح به الفرن دحين كل الهرجة عشان تعلمنا إن الشماغ له وظائف كثيرة ( بلا بشكلك) نرجع لمحور حديثنا وش كنت أتكلم عنه ؟ اقترح علي صاحبي اللي بالرياض ( عاشق السينما ) تحط نفسك في مواقف باااااااااااااااااااااااااااااااااااااااايخة ! اقترح علي نروح للبحرين خميس وجمعة ونشوف لنا سينما ومنها نغير جو قلت قداااااااااااااااااااااااااااام , ماورانا شي وبالفعل يوم وصلنا مملكة البحرين الشقيقة دخلنا لمكان السينما واختلفنا بإختيار الفيلم صاحبي يبي فيلم مصري فقلتله الافلام المصرية كلها نفس الفكرة مثل مسلسلاتنا الخليجية وقدرت أقنعه نختار فيلم أجنبي ويوم جينا ندخل قاعة السينما قلت : ماوالله أدخل القاعة قبل ماناخذ فيشار أبيض وبيبسي ( مثلنا مثل العالم) ومثلكم عارف ببداية الفيلم يجيبون إعلانات عن أفلام وبعدين يبدون بالفيلم ولعل الإعلانات طولن ونا مندمج مع الإعلانات وأكل الفيشار قالي صاحبي : الحين وش سالفة الفيلم , عجزت أمسك له سالفة قلت : هذي دعايات , لابارك الله فيك وبهالساعة اللي قررنا نشوف به فيلم خلاصة الهرج صوت الناعقين لوجود السينما ليس حبا في السينما , ولكن لحبهم للغوغاء ! همسة : القصة نسج من الخيال ولاتمت لواقعي بأية صلة أرق التحايا والتقدير مجنون بريدة[/center] آخر من قام بالتعديل مجنون بريده; بتاريخ 14-07-2009 الساعة 02:45 AM. |
|
| الإشارات المرجعية |
|
|
النمط الأحادي