 |
|
|
|
|
|
||
| ســاحـة مــفــتــوحـــة المواضيع الجادة ، والنقاشات الهادفة -- يمنع المنقول |
|
|
أدوات الموضوع | طريقة العرض |
28-08-2009, 01:33 AM
|
#1 |
|
عـضـو
تاريخ التسجيل: Feb 2008
المشاركات: 441
|
خبر عاجل : تراني مصاب بالعين , والعين حق !
السلام عليكم ورحمة الله وبركاته يازين أجواء الرمضان ياناس , قسم بالله أجواء روحانية لاتوصف ياخي تحس بنفسك إنك تتغير دايركت وليش ماتتغير ؟! وإبليس اللعين وشلّته قاتلهم الله مصفّدين الله يعيذنا منهم قولوا ااااااااامين وصلاة التراويح ياهي ترد الروح وتبهج النفس , ويامسكين ياللي مفرّط ! بس فيه مشكلة لكن لاتخافون مو عويصة وهي تغيّر ريحة الفم من الجوع عاد أسألكم بالله هذي مشكلة ؟ لكن للأسف بعض الناس عندهم إنه أمّ المصائب محدّثكم دحين جالس يكتب موضوعه وقت العصر في سادس أيام الشهرالكريم لو يتنفس بعنف كان يطفى محموله من شين ريحة إثمه بس ماتدرون إن الريحة أطيب عند الله من ريح المسك ( ولخلوف فم الصائم أطيب عند الله من ريح المسك ..) وفيه مشكلة ثانية بس تراها مو عويصة وبنفس الوقت ماهي هينة بعض الناس تشكي من العطش وتروح تنام محاولة الهروب من واقع العطش لا سيّما في أجوائنا الحاضرة قمّة الحرّ , لكن مالك إلا الصبر وأجرك على ربك ترى كل السوالف والنصائح اللي تقراهن عشان أجيب طاري الجو الحار لأن موضوعي يبدأ من مشكلة الأجواء الحارة .. أكبر مشاكلي بالحياة الدنيا وزينتها مقاومة الجو الحار لأني أكره كل اللي قدّامي ونفسيتي تصير زفت والله يلوم اللي يلومن الأكل مايدخل إثمي والشهية مغلقة للصيانة وبحلّ ياحديقة الملك فيصل اللي بالطائف حتى الماء البارد من شدّة الحر ما أشتهيه ( عاد ترانا عطيناك وجه , فيه شي يدخل المخ وفيه شئ مايدخل) ومع مرور الأيام وتعاقب اليالي الطوال ( قمّة الحماس والتشويق) بدأت حالتي تسوء يوما بعد يوم , وكل مازادت الأيام زادت الحالة سوء حتى إن الحالة وصلت معاي إني مالي خلق أقابل أحد من العائلة الكريمة يعني 24 ساعة مسكّر علي بالغرفة لاحنيس ولا ونيس أدري إن بعضكم يقول ياخي إدخل المنتدى ووسع صدرك ( يالقفكم) بس قلت ماعندي إستعداد أدخل وأشوف نقاشات سخيفة من بعض الاعضاء لأن اللي عندي يكفي ويوفي وماني ناقص تعكير مزاج في هذه الحالة العصيبة طلّعت نفسي من غرفتي من الهم والغم والجبن والبخل لأني من زود الحالة اللي بي كرهت حتّى نفسي ! وجلست بالغرفة بدون نفسي ( يالله إنّك تلطف بحاله , قووولوا ااااامين) وكل ماجاء الوالد يطق علي الباب , أقوله ( الله أكبر ) ويفهمها ويروووووح وإذا جاء أخوي يقولي : وش فيك ياخوي ؟ أقوله : هنقلع بس وإذا جاء لمّي أحد الأخوات أسوي نفسي نايم عاد مرّة من المرّاة جت لمّي أمي فاطمة وطقّت علي الباب يوم سمعت صوتها مدري وش أقول من الروعة عاد قلت : الله أكبر , قالت : أبجلس عند الباب لمى تخلّص من الصلاة وهذا اللي ماحسبنا حسابه , جلست فترة بسيطة أبيها تمل وتروح لغرفتها لعلّه ماراحت وكل شوي أسمعها تتنحنح ( يعني تراك طولتها وهي قصيرة ) عاد كسرت خاطري وفتحت له الباب , وعلى طول دخلت غرفتي تبي تشوف وش اللي مخلّين جالس بالغرفة 24 ساعة ( تفكير عجايز) يوم شافت مافيه شي , قالت : ويحك ( لو تقول ويحك كان يطيحن الضرسين اللي فرحة بهن) قالت : ياوليدي لك كم يوم وأنت متغيّر علينا , أنت تشكي من شي ؟ وإلا تحب لك بنيّة ؟! قلت : ما أشكي من شئ ولله الحمد , والحبّ مخلّينه لقيس قالت : أجل بما إن الضيقة اللي بك بدون سبب , فأكيد إنه عين صابتك ! قلت : عين مرّة وحدة ياميمتي ؟!, قالت : عيال الحرام ماهنا أكثر منهم قلت : ياميمتي إحسبيهم بالكيف وليس بالكم , قالت : إن كان تبي رضاي رح للمطوّع يقرا عليك قلت : ياميمتي شايفتني مهبووووووووول , ونا ماودّي أروح لأحد يقرأ علي , تدرون ليش ؟ لأني في حالتين أتمنى الدنيا تبلعن وأكون نسيا منسيّا ! الحالة الأولى : إذا قرّب الشيخ خشّته عشان ينفخ عليك الحالة الثانية : إذا جاء الحلّاق يحدّد الشنب ( وخذ شهيق وزفير اللهم صلّي على محمد ) يوم شافوا الأهل إنه مستحيل أروح للمطوّع , جابوا لي ماء زمزم من عند الشيخ اللي يقرا وجلست فترة ونا أشرب من ماء زمزم وعلى الله يوم من الأيام رحت لعمتي منيرة بعد صلاة المغرب , ويوم دخلت عليها وسلّمت وجلست قالت : وش بك ياولد أخوي , وجهك مهب عاجبن ! تقل عاضّن ليمونة قلت : والله ياعمّتي من قلّ النوم لأن بي أرق غريب هاليومين قالت : اتصلت علي أمك فاطمة وتقول إن به عين ( نسوان + تلفون + فراغ = أمّ المصائب) قلت : والله ياعميمتي إني ما أدري وش بي قالت : لاتقول عين , لأن العين ماوالله توطوط عندك , لاجمال ولا مستقبل , وش عليه يحسدونك الناس ؟( قمة التحطيم) واشرب بيالتي وللبيت من عقب التحطيم ويوم جاء وقت النوم وأجلس أفكّر بكلام عمّتي لأن معها حق بصراحة بس جلست أفكّر وأقول لا يصير يوم كنت مسافر اخذ لغة وضربت بوبي بالشامبو لايكون عملوا لي عملة سوداء ( وراحت الليلة كلها هوجاس وظنون ) خلاصة الكلام : مو كل شئ يجيك قلت عين , لو تصدم بسيارتك قلت عين! أنا لا أستهين بالعين , وكلنا نؤمن بالعين , والعين حق , ولكن المؤمن مبتلى إيّاك والوساوس الشيطانية التي غالبا تأتيك وقت المنام , فكن على حذر وكن أيضا على يقين بأنّ ما أخطأك لم يكن ليصيبك , وأنّ ما أصابك لم يكن ليخطئك ! ولا تنسى قراءة الأذكار صبح مساء فهي التي ستحفظك من شر كلّ ذي شر بعد مشيئة الله همسة : القصة من نسج الخيال , ولا تمت لواقعي بأية صلة أرق التحايا والتقدير مجنوووون بريدة |
|
| الإشارات المرجعية |
|
|
النمط الأحادي