[د / ماسنجر]

ما سأسرد عليكم ..
هو حقيقة ، ولكن بأسلوب آخر ..
حَدثت لأحدهم ..
ففضلت أن أترجمها كما أريد وأن أزيد عليها كما أريد ..



حكايَةُ الحِكايَة ..

- السلام عليكم
- هلا وليد وعليكم السلام
- كيف حالك عساك طيب ؟
- الحمد لله بخير ، كيفك أنت ؟
- الحمد لله .. عاصم .. لا يكون أشغلتك باتصالي
- لا أبد خذ راحتك بس عسى ماشر لا يكون بك شيء ..

سَكت ثوانٍ عدّة ..

- وليد وش بك .. أهلك بهم شيء أبوك صاير له حاجه ؟؟
- لا ما فيه إلا العافية ...
- تتصل الساعة 2 وتقول مابي شيء !! ، تكلم ..!!
- متضايق شوي .. وودي أقابلك بكرى بأي وقت وبأي مكان
- أتمنى إنه ما فيك شيء ، خلاص بعد الساعة 10 بالليل بكرى إن شاء الله لأني منشغل مع الأهل ، عشان نتعشى سوى بنفس الوقت ..
- طيب .. لا تنسى انتظر اتصالك ..
- طيب الله يحفظك .. مع السلامة
- مع السلامة

في الساعةِ الـ 9:45 دقيقة في الغد ، اتصل وليد على صديقه عاصم وأخبره أنه ينتظره في أحد المطاعم التي يحبها ، قدِمَ عاصم إليه بعد قرابة 20 دقيقة ، تبادلوا الحديث المعهود وبعد أن أنهوا الوجبة الخفيفة ، طَلب وليد من عاصم أن يبدلان مكانهما حتى يتحدث ويأخذ راحته في البَوح بما يضايقه ، وصلوا للمكان المُراد ، وجلسوا متقاربين ، نظر إلى عاصم نظرة الحَزين الذي شتَّتَت الأحزان ضحكاته ولملمت مدامعه وسيّلتها ..

عاصم : وهذا أنا وعدتك أني أجلس معك زي ما طلبت .. وش عندك وش صاير ؟
وليد : الصراحة يا عاصم أن الكلام تبعثر لكن ...
عاصم : خذ راحتك وتكلم أنا مستمع لك بكل جوارحي
وليد : الله يخليك ماتقصر .. خلاص خله وقت ثاني
عاصم : الله يهديك بس .. الحين تقول أمس إنك متضايق وكذا والحين تقول خله وقت ثاني !! أنا ما راح أقوم من هنا إلا وأنا سامع كل شيء وش رايك .. ؟
وليد : واحد تعرفت عليه قبل سنتين تقريبا أو ثلاث .. جرّني لمشاكل واجد وجرّني لأمور سيئة .. لدرجة إني فكرت أعيش بمدينة ثانية فترة حتى أرتب حياتي وأتغير وأرجع هنا ..
عاصم : طيب !!
وليد : آخر ماوقعت به معه هو ثلاث بنات أجنبيات .. تعرف عليهن وعرفني عليهن وواحد ثالث من طرفه ما أعرفه .. يوم الأحد اتفقنا إننا نشوف البنات يوم الأربعاء .. عشان تكون السهرة بيوم الخميس .. على كلامه إن كل واحد يختار اللي تعجبه ..
عاصم : لهالدرجة .. !
وليد : لهالدرجة وأكثر .. يوم الثلاثاء قبل الموعد بيوم حجزوا سيارتي التفتيش يوم كامل تقريبا من الساعة 12 بالليل .. يعني ما راح أستلمها إلا الساعة 12 بالليل من بكرى اللي هو يوم الأربعاء .. ولأنهم ما يفتحون بالليل ما راح استلمها إلا الخميس اللي بتكون فيه الجلسة .. يمكن تتسائل وتقول يمكن أفضل لك .. الغريب إنه استأجر لي سيارة باسمه كوقفة صديق لصديق .. وكان هالشيء رايح عن بالي
عاصم : لما حجزوا سيارتك جا هو وأخذك ؟
وليد : إيه وبعدها طلعنا على طول لمحلات التأجير ..
عاصم : أها .. !!
وليد : يوم الأربعاء الساعة 7 المغرب اتصل عليّ وقال ترى واعدناهن الساعة 11 بملاهي .. وإنه لازم أكون معه من الساعة 10 عشان نطلع جميع للموعد .. انتظرت حتى الساعة 10 ورحت لبيتهم ووقفت سيارة الآجار وطلعنا بسيارته أنا وهو وصديقه .. لقينا البنات بسيارة مع سواق هندي مدري بنقلاديشي بمواقف الملاهي ونزل صديقي وسلم عليهن ونزلنا وسلمنا عليهن ودخلنا جميع للملاهي على أنهم أهلنا يعني .. جلسنا تقريبا نصف ساعة وتم اللي اتفقنا عليه .. طلعنا وتفرقنا برى الملاهي ورحت للبيت .. وأنا مازلت أفكر .. !!

.
.

للبقية ، دقائق أخرى

بـ مقلمة د / ماسنجر