[يالبا اللبالب]

كيف حالكم أخواني وخواتي

بـ أبدأ معكم اليوم أو مشاراكاتي و أتمنى افيد و أستفيد


كثيرين ما يهمهم الا شي واحد الإحساس أن فيه أحد مهتم فيهم طبعا هالشي بالنسبه للولد وللبت ولا تقولوا بس للبنات , كثير عندهم وقت فراغ كبير حاسين مو حاسين هذا شي ثاني , وكثير مؤدبين و محترمين و يصلون بالمسجد أو يصلن الصلاه بوقتها و بخشوع . الغريب فيه بعضهم ما يضيع وقته بلعب الورق أو القنوات و الاشياء اللي مالها قيمه بس ممكن يضيع كل شي ورى هالشي اللي أسمه حب .

وين المشكله ؟

تعالو نفهم نفسيات بعضنا على خفيف
أكثر شي يخلي الشخص يحرص على الطرف الثاني و يخليه يتربع على مقعد مرتفع أسمه حبيب هو تصوره لاي سبب ان هالشخص مطلوب و ممكن يركب جناحين ويطير ولذلك فهو يتشعبط ويقول إيه بس هذا هو أو هذي هي اللي ابي و تبدأ التضحيات و الذي منه .

طيب وش فيها لو خلاه يطير اللي خلق السموات و الأرض ما خلق غيره يعني ولا أنتهت الدنيا عليها أو عليه ؟ طبعا أنا أتكلم عن بدايات و حركات ما أتكلم عن علاقات و مده طويله , الله يهدي اللي طايح فيها و يبعدها عن اللي ما صارت له و يغفر للي مرت عليه وتاب و أناب .

يا جماعه سهل و الله الواحد يقول لنفسه و بعدين بس بصدق ؟
ويوقف عندها ما يخطًي خطوه بطريق الشيطان و التعب بس يجلس دقايق و يشغل عداد السنين و يتصور نفسه بعد سنه سنتين عشر عشرين ؟

طبيعي بيكون متزوج و وقتها يتمنى أنه ما سوى أي شي ولا فكر بهالشي .
الشيطان يجي مع مكان سهل مغري يقول للبنت على لسان صديقتها أو زميلتها أو حتى كتابه في النت عيشي وقتك شبابك مدري أيش بكره بيصك عليك بين اربع جدران و مايصير عندك ذكريات وبتقولين ليتني أتذكر شي أبد ماهو صحيح و أسألوا أي وحده كبيره شوي أو أم عيال بتقول ولا همني شي من اللي راح أو ليتني ما اتذكر شي ولا سويت شي وتلاقينها بوادي ثاني ماعندها مثل هالتفكير .

بنات
عيال
أنا ما أنصح ولاني مطوع احنا نتناقش سوى بس

لو قال لكم أحد من اهاليكم ضيعوا وقت أو أسهروا بتقولون معصي بننام ونرتاح , طيب ليه تسهرون عشان شي ماله قيمه ؟
واذا بتقولون احد يهتم فينا صدقوني أحسن شي و اروع شي ان الواحد فينا يكون فعلا مهتم بنفسه بشكل صحيح طبعا هذا مو معناته الدعوه للأنانيه و العياذ بالله .

وهذا كل شي عندي لين الحين .

ربي يوفقكم

ولو شفتوا أن مشاركتي هذي ما هي طيبه اتمنى تصارحوني .. الصدق زين و النقاش ببعض الأشياء يوسع المدارك و ينبهنا على أشياء يمكن نكون غافلين عنها .

سلام .