 |
|
|
|
|
04-03-2010, 12:51 AM
|
#1 |
|
قبس دائم
تاريخ التسجيل: Jan 2008
البلد: بحارتن جميلة ()
المشاركات: 4,192
|
شَحْمة رَملْ .. وَجرْبوع / وَحمارْ وِخرْفـآنٍ سآقِهنْ رآعِيهـآ | تبعْ المُسآآبقيّ |
بسم الله الرحمن الرحيم مساكم طيّب ! وه وه والله يانا جايّه ألهث قبل مايقضي وقت المسابقة اللي باصمة إني منب فايزة بس قلت واعدت البنات وبوفي بوعدي لوهو شسمه   أعتذر للبنات , بس لا طلعت ما أصوّر وإذا بغيت أروح لمكان ربيع وخيرات يلزم عليّ النوم في البر وأنا أرفض النوم في البر رفضاً قاطعاً فـ عشان كذا الوالد واخواني يروحون ويخلونن :’(بالعربي مشغولة بأشياء غير البر معنّن أوله عليه  ..نبدأ على بركة الله ..  طلعت للبر وايقالي متحمسه للمسابقة بس يوم أقفى الربيع  ..لكن مب مشكلة الربيع كثير نشوفه قلت أصوّر لكم أشياء نحبه بالبر والمتعة الحقيقيّة في البر لنا كأفراد أسرة متحابّه في الله << مقطعتنا الأخوّة ذذ طلعاتي على أيام منفصلة عشان إنّي كنت أحتري شيء بنص التقرير يتوضّح لكم أول يوم رحنا للربيعيّة ما أبعدنا واجد , نظرات ترقّب وشوق من أخي حفظهُ الله .. << اما ترقب لا والله شكله ملّ من البر   بذا النخل يصلّن ويروكعن الله يهدينا بس شوفوا العبادة الوضعيّة ماتغيّر أبد اللي قائم وللي راكع واللي قائم من الركوع واللي يبي يسجد واللي ساجد فـ سبحان الله , شجرة عبريّة وتسمّى سدر وتسمّى نَبْقْ , ويُقال أن عمرها يتجاوز المئة سنة - والله أعلم - /  طريق الربيعية /    لوحة مخبز قديمة في طريقنا /  في طريقنا أيضاً ..  بعض البعول /  غنيمات وراعيهن والوايت  وصلنا المكان المقصود وانتشرنا في المكان وصلينا وتغدّينا بضيافة عمو حمزة الله ينعم عليهم ماش هالسنه ماذقنا طبخ أبوي تمنيت إننا طابخين بس طلعنا مصيفين .. بعده الكل بدى يمشي ويتأمل .. أنا ما أمشي إلا مع الوالد لزوم ذلك لأن أي نبات لازم أسأله عنه ووش اسمه << مهب شرافة بس الثقافة ذابحتن وحنّا نشمي قال أبوي دوروا عش " حمّرة " والحمرة هذا طائر يكون العش حقه بين الحصا ويحاول يخفيه عن الناس ويجيب حصى صغار حتى تحفظ صغارها من تجرفات المطر , نشوف هالصور عشان تكونون على بيّنه .. حقيقة كنا نستمتع بالبحث عن أعشاش الحمّرة حينما نسمع صوتها في المكان نعلم أن هناك عشّ لها فـ ننطلق للبحث عنه ..وهه ولقينا عشّ ولله الحمد ..  ماشاء الله 3 بزران الله يصلحهم ويجعلهم ذخر له ولبلدهم الراقي .. عقبال مايصفّون بالجيش .. لهذا السبب تأخرت أسبوع وقطعت بي الكشتات كنت أنتظر البيض يفقسن وأصورهن لكم .. كان أبوي بهالفترة كل يوم يكشت ويمر على عشّ الحمرة وجاء هاك اليوم وقال إنهن فقّسن وكل يوم بكرا أروح وكل يوم بكرا أروح لما جزمت هكاليوم ورحت << وه مابغيت جينا للعش ولا وش نشوف لكن نوريكم طريقة العش بشكل أوضح  للأسف الفراخ رايحات : ( بس سمعنا أصواتهن ولقينا الأم وفرخ مزيون وبعد جاء الثاني وبعده الثالث هذي صورة للفرخ بعد ما ماسكناوه   الله يهديَه أمه ماعلمته الأدب سوّاه على إيد أبوي وأنا أصوّر وهنا مقطع فيديو لسماع صوت الحمّرة ومشيَه بعد .. اللي يصوّر الوالد الحين تحسبون هالظل ظلّي  .. علم من أعلام الطريق عند الأولين /  نآخذ الحين جولة على النباتات واسمائها /. هذا النبات شدّني .. وسألت أبي عنه لكنه أيضاً لم يعرف ماهو وجاري البحث عن اسمه ..   هذا نبات الـدَّرْمَا /  هذا معروف الحُمّيضْ أو الحُمَّاض ..  هذا القرّاص مع مايبدوا لي مع بعض نبات البابونج /  النَّقَدْ ,   اليَهَقْ / و يسمّى جرجير البر .. وهذا زهره  هذا البابونج معروف ..   هذي نبتتة [ الكَحَل] أعجبتني زهرتهاً جميلة وألوانها بين الكحليّ والبنفسجيّ والورديّ ..    هذي نبتتة الصمعاء وتسمّى أيضاً السفواء على ما أظن [ أعآني النبتة اللي تقل شعر ]  نجي للأقحوان ويسمّى القُحْوان وأخوي الصعنبط [ يوم قرا الصعنبط والله ياهو دمغن مع دميجتي يقول هيه لا تكتبين صعنبوطي << يقوله بصوت جثل .. عاد ولله لو تبتل تكبر تبتل بعيني صغيير <- أمّه على غفلة ] المهم يسمّيه الدزْحْوِيَانْ   وأنا أمشي لقيت هالخنزير قصدي حصاته بس تقل وجه خنزير سبحان الله .. عاد أختي ايقاله متذيهنه تقول : يمكنّه خنزير حقيقي ومتحجّر ..!؟ نبات الشِّيحْ / :  , يوم خلصنا ضفّينا قشّنا قبل المغرب ورحنا لنفود ولزوم نطعّس شوي عشان نحس صدز إننا كاشتين !بدينا نطعّس أمر نرقى نفد ولادرينا إن تحته نقْرة مادري والله وش يقال له لكن هذي الصورة تتحدث ..  شفتوا الفراغ اللي أول شخط الكفر نقزنا نقزة وصبخة واجهيّة الجيب طبعاً أنا وأختي عرس من الصراخ حسبناو الموت يعني انرجّينا رجّة رجعنا للبيت واللي ماسكه ظهره واللي رقبته .. مانشوف شر يا أنا ويا أختِ  هذي الدوّيرة مكان صبخة وجه الجيب أبد طاح على وجهه ولا سمّينا عليه ! وقفنا شوي عقب الصبخة وصوّرت بعض النباتات الإِسْلِيحْ /  شِدْقَ الْجِمَلْ ذو المنظر الساحر /  نبات مادري شسمه بس ذكّرن بأوراق الشاهي /  كان أبوي قايلن لي بصيد لتس صقنقور ( شحمة الرمل ) مشينا شوي ولا لقينا شيء .. لقى أبوي محل حسّ إنه به شيء وهو ماعنده جرّة ولا شفناوه يدخل دخّل أبوي ايدينه وأنا متحمسه بشوف عساوه يلقى  !قال : هه مسكته .. أنا : ماشاء الله وشلون مسكته ! هات نصوّر   سبحان الله الجلد يبلص تسيف ما جاوه جفاف ، كانوا قديماً يصفون نعومة يدّ المرأة بـ الصقنقور انتهت رحلتنا اليوم ..  أكمل لكم بعد ما أرتاح عاد متى أرتاح الله أعلم , عاكفتن عليه من الساع 7 الفجر بعذري !أتمنى لكم مشاهدة ممتعة  ,
__________________
. . . ثمّة نساء يُصبحن أجمل في الغياب "/ ! . آخر من قام بالتعديل بريداوية ام الهبال; بتاريخ 04-03-2010 الساعة 01:19 AM. |
|
|
| الإشارات المرجعية |
|
|
النمط الأحادي