[مدحت شوقي بريده]

السلام عليكم ورحمة الله ..


لااله الا الله ..

منهو هاللي دخل مع هالباب .. تعال تراي اشوفك ..
ياربية تسيف تسذا .. ماعمر الواحد دخل وقال السلام عليكم ..
ياكاااااافي تقول داخلين ( كنيسة ) ..
سلم مهوب ضارك .. ياجعلك الدمل اللي ينبت بإبطك ..


سمي يمه سمي .. توي مابعد ولاصكيت الباب ..
والله يانتي حااااااااااااااااره .. الظاهر انتس مادخلتي ( الرحم ) ..
محطوطة بصخانة بداية عمرتس ..



تعال بس واترك الهمق لاتنسين وش انا ابي منك ..


هاللحين وراه ماجبت لي ( وردة ) ياهالسامج ..

انت ماتدري ان هاليومين .. عيد الأم .. ابي وردة ادعسه بكاس هالماء جنبي ..

لاعاااااااااااااد اني من يوم أنك ( تحبي ) .. وانا الفز عليك حلاو وعلوك وسُبال ..

مع اني من حيني ماناب اواديك ( دربية ) وثقيل دم ..
بس اعطيك علشاني عطيت باقي العيال ..



وهاللحين يوم انك كبرت ماعندك نية تعطين ولا ( وردة ) ..
بمناسبة ( عيد الأم ) .. او متكيثرن علي الهدية ..


جيد تراكض لبنت الناس مسوين له حفلة باليوم اللي يوافق يوم عرسكم ..
تحسبن ماأدري .. تراى معي علم ..

داخلن من عندي تحسبن ( نيمه ) وانا واعية .. اوحيك يوم تقوله ..
ارقي ياعمري .. ياأغلا رجل رقت هالدرج ..

الله يجعل رجليك للحراويل .. ماكأن اميمك ترقى هالدرج كل يوم ..
والله من يوم ويوم دربها ابوك مع هالدرج ..



يمه .. عيد الأم حرااااااام .. كم مرة قلت لتس ماعندنا الا عيدين بس ..
مافيه لا عيد حب ولا عيد ام .. ولاهم يحزنون ..



هاللحين انت ابخص من اللي حطوه .. لو مايجوز كان ماحطوه ..




يمه هذي اعياد مايحتفل به الا اليهود والنصارى واللي على غير ملة الاسلام ..
واذا انتي حطيتي عيد تشبهتي بهم .. ولا يجوز لتس يمه هذا يعني انك معجبه بهم ..


ياكااااااااافي عاد والله لو انا خامتن حداهم هاللحين .. يومك تقول معجبتن بهم ..





يمه حرام .. ليه كل شي يجي من الغرب نتلقفه .. وكأننا شعب بلا هوية ..
ننتظر من يحدد هوياتنا وتطلعاتنا وافراحنا ..
صحيح الأم قدره عزيز وغالي ..

الأم هي نبض الحياة ..

الأم وجوده سعادة ..

وقربه ( حنان ) ..

ونظرته أمل ..

وانفاسه دفئ ..

لكن ديننا واضح .. وبين لنا الحلال من الحرام ..
ولايجوز لنا بأي حال من الأحوال نحتفل بأي عيد غير اعيادنا المشروعة لنا ..
حتى وإن كانت لأعز الناس عندنا ..





ياوليدي انا وش يدرين .. متوسدتن هالجلال وابي أي شي افرح بوه ..
مير هونت مابي منك .. وردة .. ياوردة نورت بين الورود ..




والسلام عليكم ..



سي يو ..

.

.