[مدحت شوقي بريده]

السلام عليكم ..

مرحبا شباب بريدة ستي ..

اهلا وسهلا ومرحب فيكم .. اهلا وسهلا الله يخليكم ..
مسائكم ورد .. ناشقن من جوري وياسمين .. حتى غدت رائحتة كالكادي ..
صباح الغبار .. والريح والرياح .. والأمطار ..



لازلت اتذكر شدوق خالي الممشقات .. جراء تسطير جدي سليمان له ..
حينما يطلب منه عمل ( ما ) يقوم به ..
ويتهاون بحجة حك ظهره أو توكيل المهمة لشخص غيرة ..

حينها تتوالى اللفعات على صابرة .. اللفعة تلو الأخرى ..
لتحمي فيها ذاك الصابر القمحي ..
مع صرخات جدي المصاحبة للفعات ( هـــه .. هـــه ) ..

نعم .. خالي صالح ( عجاز ) .. وقد أخذ شهادة ( نوبل ) للعجز العالمي ..
ولكن جدي سليمان ايضاً .. حاز على جائزة السعفة الذهبية ( لقل الصبر ) ..




الحقيقة انا ماأدري .. ليه الرجل السعودي .. قليل الصبر ..
مايصبر .. ولايتحمل ..

ودائماً وغالباً ماتكون مشاكلة بسبب ( قلة الصبر ) ..
وهي مشكلة عند اغلب الشعب السعودي .. وخاصة منطقة نجد ..

وهناك صور كثيرة من حياتنا اليومية .. دائماً نراها ..
حوارها ساخن وسيناريوا ملتهب ..
ومشاهدها كثيرة ومتعددة ..







.. مشهد اول ..

في اول يوم زواج .. وفي احلى ليلة من ليالي العمر ..
يهمس بإذن تلك العروس المشتاقة لحياة طالما حلمت بها ..
همسات .. بمعنى أنه صريح وشفاف ..

شوفي يابنت الناس من هاللحين اعلمك .. وعشان لاتصير حياتنا مشاكل ..
تراي احب أني اول ماأدخل مع الباب القى كاس الموية باالصالة ..
ترى ماله داعي اقعد كل شوي اقول ابي موية .. من هاللحين اعلمك ..
سبحان الله .. وش يبي يضرك لو صبرت ..


واذا شفتين داخل مريوس ومعلقن فانيلتي على ظهري ..
ترى ابيك تحكين ظهري .. لاتقولين ماعلمتن .. ترى من هاللحين اعلمك بأهم شي بحياتي ..


يعني خلاص صارت مثل هالسفاسف هي من كبائر وعظائم الأمور ..
حتى تكون من اهم محاور حديث تلك الاحتفالية ..

::.. وفي غمرة الحديث تقراء تلك العروس في عيني ذاك الزوج هدم الحلم الكبير ..::








.. مشهد ثاني ..

جاء وقت الغداء .. وجلس ذاك الزوج للإنتظار ..
وبدأت أحداهن بتتجهيز السفرة حتى يلتمون على الغداء ..

وما ان تحط المقبلات .. وتروح تجيب الباقي ..
الا ويرثع ذاك الوحش بالمقبلات .. ويعيث فيها فساداً..
مو كله جوع .. الا والله قلت صبر .. مطلقاً تلك الديباجة المستهلكة ..
( يالله يابنت الحلال عجلي علينا متنا جوع .. انجزي الله من الرفاله بعد .. )

ولكن مااقول غير .. اياجعلك تحدره قزاز .. يادافع البلى لاخيرك ولا كفاية شرك ..

لو هو البنقالي حق الدوام اللي رايحن يشري لك الساندوتش وتأخر .. مارفعت لسانك ..
لأنك تدري انك من بكرى تبي تصف سرا عند المقصف او البوفية ..


مااقول الا ..
::. .مسكينة هي التي كانت تحلم .. بلقمة من يديك .. تجبر بها وقفتها الطويلة لخدمتك ..::











.. مشهد ثالث ..
( خارج الأسرة )


يروح للحلاااااااااق ويلقى عنده ( 3 ) أنفار ..
اللي قاعد يزلط الشنب واللحية ..
الين تغدي خشته تقول كرتون ( مجخور ) .. ومكبوب عليه موية ..

واللي يبي يظبط ( الكدش ) يقصر الزايد .. ويزيد القصير ..
تعرفون لازم يصير الشعر من فوق دويرة .. لزوم القصة ..

واللي داعسن خشته بالبخار .. يحسن النسل .. عفواً يحسن البشرة ؟؟

تدرون وش يسوي اول مايشوف هالثلاثة .. ماينزل ويصبر الين يقضون ..
لا.. لا .. يبداء يدور على حلاقين الرياض والا بريدة كلهم .. علشان يلقى واحد فاضي ..
يروح ويدور نص ساعة او ساعة كاملة .. كله علشان مايقعد ينتظر ..

لو قعد كان خمس دقايق و يجي الدور عليه
.. بس هذا كله من قل الصبر ..









والكثير الكثير من تلك الصور التي تشوه شخصية بعض الرجال بسبب ( قلة الصبر ) ..
لااعلم متى تكون السكينة والهدواء هي مايميزنا ..
صدقوني قليل من الهدوء والصبر سيعيش الجميع بهناء ورغد وراحة بال ..




اخواني واخواتي الاعضاء والعضوات .. الأحياء منهم والأموات ..

شاركوني يابعد معاليق ( حاجبي ) بآرائكم ..


* هل البية ( الصحروية ) له دور ..

* ام هــي عــــادات وتـقـالـيـد ..

* أم انها طباع .. وحدر جبل ولا تحدر طبع ..


وسلام عليكم ..



سي يو ..