[@ بيدبه @]

السلام عليكم ورحمة الله وبركاتة
الموضوع بإختصار..
30/5/1431هـ .. يوم الجمعة قبل أذان الفجر بـثلث ساعة تقريبا
كنت مع واحد من أوخوياي ندور على سيارتة ويوم وصلنا لمخطط الجامعة (الصناعية الجديدة) جنوب بريدة ..
فجأة لقينا حادث إنقلاب سيارة طازج باقي الركاب داخل السيارة على طول وقفنا عندهم وساعدناهم على الخروج من السيارة والسيارة ما زالت واقفة على الجنب الأيمن, المهم تأكدنا من سلامة الركاب ولله الحمد كلهم سليمين , قمنا مع مجموعة من الشباب جزاهم الله خير وعدلنا السيارة وقال راعي السيارة نبغا نطلع السيارة من الرمل لأنها طلعت عن مسارها وتقلبت في الرمل , على طول جاء خويي وطلع الواير وريوس بالموتر وشبكنا الواير بسيارتهم وطلعنا السيارة على الشارع , يوم جينا بنمشي قالو نبغى منكم خدمة قلنا وش قالوا نبغاكم تسحبون السيارة وتحطونها عند أقرب إثل وحنا نبلغ عن السيارة إنها مسروقة ,لأنهم كانو يفحطون بالسيارة وأنقلبوبها,
قلنا خلاص ويوم جينا بنسحبهم قال واحد منهم أنا أعرف أخويا لي عساكر لهم حوش نسحب السيارة للحوش وهم يدبرونا , قلنا تم..
سحبنا السيارة للحوش المذكور ودخلناها في البايكة ,أثنو عينا الشباب وشكرونا , أستأذنا منهم ومشينا نبغى نصلي الفجر ,وحنا رايحين أنا وخويي
سألني بهذا السؤال :"يا أبو فلان تهقا حنا مأجورين على الفزعة الي فزعناها للشباب؟ "!!
فكان ردي له بهذا الشكل-من وجهة نظري- (يابو فلان من باب الفزعة والمرجلة ما قصرنا معهم لكن الأجر والثواب ما أتوقع لأنا أعناهم على شيء ما يرضي الله)
هذا والله أعلم
فما أدري وش تقولون على الي صار ...