[مدحت شوقي بريده]

السلام عليكم ..


أهلا بكم أعضاء بريدة ستي ..
اهلا بكم في ليلكم ونهاركم ..


صباح سعيد و مبارك ..
ومساء سعد و نور ..
( هذا مهوب ترحيب هذا جدول ورديات حراس أمن ) ..




في هذة الأيام القلاقل وفي نهاية العام الدراسي تشهد مدارس البنات موجة إحتفالات
عديدة .. ومن ضمن هذة الإحتفالات حفلة وفاء ورد الجميل حفلة الجدات ..
أمهات الأمس أمهات الماضي الجميل وعبق الرعيل الأول الطاهر ..

ومن ضمن هالجدات جدتي موضي اللي صايرتن هالأيام وكأنه من مفتشات إدارة التعليم ..
كل يوم مدرعمة لمدرسة وذلك بسبب كثرة ذره

*************

دخلت على جدتي موضي وهي جالسة بالحوش تتجهز لحفل الجدات ..
عدتها وعتادها ديرمان وقلم كحل والكريم الأبيض اللي إذا نزل عليه السكر أكلته ..
ومشط أسود عليه باقي شعره
وقاعدتن تآخذ بأيده الكريم وتلطس بشعره وتمشطه ..



وفجاءة إذ بجدي سليمان يدخل علينا وهو شايلن سطلين كوسه وقرعه وسطل تمر ..
وشاف المدام موضي وهي تتجهز ..


عاد هو خابر أن هالكريم والمشط الأسود مايطلعن الا بالمناسبات الكبيرة
ودكم تشوفون شعر جدتي موضي إذا ماكدته ( مشطته ) ..
يادافع البلى شوشة طايرة تقول شريط كاسيت منفل على راسه ..

فقال له هاه وين تبين تسرحين لوه يالعمه قاعدتن تتميلحين ياديانا حداد ..



قالت جدتي موضي ..
عاد دوك منهوا هاللي يتطنز وائل كفوري ..

شف عااااااااااد أنا هالايام مانيب فاضية لك انا مشغولة إلى راسي بحفلات الجدات ..
امس بمدرسة رحاب بنت اللولو واليوم ابروح لمدرسة منيرة بنت مها ..
وباتسر مدرسة رسيل ورهف بنات مريم والاسبوع الجاي رغد ورند بنات حصة ..
وابروح افرح بنياتي ..



قال جدي سليمان أها بس اقضبي ارضتس وخلي عنتس الخرابيط وخوذي هالكوسة والقرعة ..
نبي غدانا مرقوق اليوم ..


قالت جدتي موضي .. هين بس أنت مهوب صيدك الغدا أنت نغر منا لان ماعندكم إلا مجلس الأباء ويخب عليكم بعد ..


( عاااااااااااااااد انا تدخلت ابلطف الجو .. قلت يمه وش صار امس بالحفل .. )


قالت .. ياوليدي وش زين حفلهم .. ونشيدهم .. حتى قهوتهم ( حاليه ) .. ( مقهوينه كابتشينو ) ..


بس بوه هاك الوحدة ماغير تلاحق بهالمدرسات ابلشتهن ابلاااااااااش ..
أنتي من يقالكم .. أنتي معرسه .. طيب عندتس أخت ما أعرست ..


وماحوم تسبدي إلا هاك المعلمة اللي لابستن موف ماغير تحوف بهاك ( المرتين )
الله أعلم إنهن من حمولته ماغير تلفز حدرهن ..
وحنا مادري وراه مايحط لنا لاعاد إننا مثلهن معزومات ..
يوم سألت اللي جنبي عنهن .. قالت لي هذولي من مكتب الاشراف ..
وشو مكتب الاشراف .. هو مثل مكتب الاستقدام ..



والا عاااااااااد هاك المرة اللي تدور بناته .. كل ماجت عنده معلمة .. قالت له ..
اقول يابنيتي .. ماشفتي بناتي نوره ونوال بنات لطيفة العبدالعزيز ..
وكل المعلمات يقولن له .. ياخاله وش اسم ابوهن .. لازم اسم الأب ..

ويوم علمتهن اسم ابوهن .. طلعن بمدرسة ثانية ياويلي ..

***************

حقيقة أن هذا الإحتفال ليس بمستغرب على ( الأنثى ) ..
التي عودتنا دائما على إنتزاع البسمة من مواطن الحزن وزرع الورود في حقول الشوك ..

فقد أعدن البسمة والفرح لشفاه طالما ( مطختنا ) صغارا ..
فهذا اليوم أشعرهن بأهميتهن وبوجودهن وبكيانهن .. وأنهن مازلنا في اعيوننا وقلوبنا ..




سؤلي :
متى نهتم بالأجداد ونضع لهم يوم للإحتفال بهم ..
من أجلهم ومن اجل أحفادهم ومن اجل مجتمعنا ..



والسلام عليكم ..

سي يو ..