 |
|
|
|
|
11-06-2010, 03:03 AM
|
#1 |
|
عـضـو
تاريخ التسجيل: Mar 2009
البلد: هناك حيث بوصلة الشمال
المشاركات: 77
|
|| صـرافـه ورديـه ||
أوقات ملؤها الرضا والسعاده
,, ,, هذا أول طرح لي هنا والصراحه ترددت وسألت .. وبعدها قلت ياقتاله اسدحي الموضوع وان ماجازلهم ينقلونه ماهنا قطع رووس! عادتي لاأحب المقدمات ولاتلميع الحروف وتحدي الكلمات ! السالفه ومافيها ياحيي اني كرهت مكائن الصرف الآلي ولونها الازرق ولايهون الفضي وقصم القصمات اني اشيل هم اذا احتجتها  انا ماادري ورا مايرجعون يسلمون الناس رواتبهم مد باليد مربوطات بمغاطه ياعين ابوي ياذيك المغاطه  اللي صاير حنا شعب ماعندنا ثقافة التعامل مع الصرافه يالبا ابواللي صنعها وخاصه من قبل بعض فئات الجنس اللطيف .. احياناً يحدث في سرا احدى صرافات المولات اللي واقفه وراك عيونها بالشاشه تتابع معك خطواتك وتعلمتس سوي كذا او غلط عليتس ورا مارعصتي الزر الفوقي  ياراعصن الله عيون العدو وبزرها يحولص تحتي وانا اصرف بعد هو يتابع وش ارعص  ولما تكون السيده صرافه ناصبه بشموخ برا بالشوارع ياشيب عين الانثى اللي بتصرف شيباهمافيه امل ولاتفكرين ان احد مرتدي الشماغ والغتره بيتنحى جانباً ويقول تفضلي اختي خلصي شغلتس الله يستر عليتس ! بوحده من المرات اضطررت اضطراراً استخدم احدى الصرافات الثنائيه بجانب نفس البنك الازرق في ذلك الحي الاصفر .. كان التدفق الرجالي على الصرافتين قوي صبرت تحت لواهيب شموس نجد ابيهم يخلصون  يوخرون يرحمون بعد مضي وقت كافي لأن اصير انا وعباتي بذات اللون فضت الصرافه وبحمدالله ..دخلت زبنت الصرافه اللي على اليمين وانا مومصدقه اني حظيت بشرف لمس ازرارها والتمتع بلونها البحري المشرق واتحمد ربي على السلامه  مادريت الا ويسقط ذاك الشايب بالصرافه الشماليه قلت هين شويب ياحيي مو مشكله يالله انجزي ياام القتاتيل بصرعه اخلصي بس كانت العمليه طويله وخلص الشايب شغله وطلع  وجا بعده واحد باين من مظهره الالتزام وهو معطيني ظهره يطقطق بالصرافه قال يااختي ماينبغي تسذا الله يصلحتس لا تدخلين الصرافات المره الثانيه الدنيا فتن وشرور . . ! طلع وانا اقول الحمدلله جت على كذا يالله ابدأ التحويل الثاني دام مافيه احد .. الا واسمع طقطقة الصرافه الثانيه وماالتفت خايفه ياحيي ياانا والا اسمع اللي يقول صفر خمسه صفر خمسه ثمانيتن ثلاث واحدات انتظرك المغرب  انتظرك عزرائيل قل امين ليت حمني اخوي معي يفغا راسك  بيت القصيد من هالموضوع نبي صرافات نسائيه خاصه بالحريمات بكل الاماكن تكون باينه انها للحريم( ورديه ) مثلاً نبي نرتاح وحنا نشتغل مو نتلفت تقل ملحوقات ياعين حيي ياهن .. الوحده ماتدري وش تسوي ان طلعت هي تصرف مشكله وان عطت احد صرافتها يصرف مشكلتين ..  احداهن تقول اول ماينزل راتبي اصرف اكثر من نصه واحطه بالبيت مثل الاولين ويصير هاجسي نطلته الشغاله لا مانطلته علشان سالفة هالصرافات ! اتمنى اعرف رأي الناس بهالموضوع .. وخاصه الرجال !
__________________
~ [ كسب قلوب الآخرين فرص لاتتكرر ] ~
|
|
|
| الإشارات المرجعية |
|
|
النمط الأحادي