[برنس البدراني]

السلام عليكم ورحمة الله وبركاتة

كلنا نحب الوطن وولاة الأمر ..
لكن لابد من توضيح السلبيات
والنظر بعين الراصد المنصف ..
لا .. للرؤية السوداوية .. وأيضا ً لا للرؤية الوردية ..
فالحق أحق أن يتّبع



يالمملكة جوع وفقر في ضواحيك ..
الكل يدري به وسامع وشايفه

يالمملكة ماعاد بي حيل أناديك ..
صوتي تعب والروح بالحيل خايفه

يالمملكة من وين أببدأ وأحاكيك ..
وأنا ولدك وحالتي منك عايفه

يالمملكة من يسمع الصوت ويجيك..
يظهر لك أوراق(ن) بالأدراج جايفه

يالممكلة والخير واجد بأياديك ..
والحمد للرحمن هاذي عطايفه

يالممكلة والفقر ينهش حواريك ..
ومكتب طويل العمر قلة وظايفه

يالمملكة وجدي على وظيّفه فيك ..
وجد الذي هاجر وخلا ولايفه

يالمملكة لازم وساطات أو شيك ..
واللي يحصل شي يطعم هدايفه

يالمملكة لا أرض ولا قرض يكفيك ..
والبيت لو تبني كثير كلايفه

يالمملكة كل الأراضي مصاكيك ..
وكل(ن) على ماقيل ينفع حلايفه

يالمملكة ناس (ن) تبيعك وتشريك ..
وعلى الحرام مضبطه وامتكايفه

يالممكلة ناس(ن) تعشى على كيك ..
وناس(ن) عشاها الجوع ذاقت عجايفه

يالمملكة للأجنبي تمطر يديك ..
وابن الوطن محروم لأسباب هايفه

يالمملكة ماشفت هاذي ولا ذيك ..
هم يحاوطني كثار كسايفه

يالمملكة ماني ولد باشه او بيك ..
رجل(ن) بسيط(ن) والعطالة تلايفه

يالمملكة بالله هالحال يرضيك ..
أنا ذكرته ومعروف(ن) وصايفه

يالمملكة عزي لمن هو يناديك ..
كانه من يدينك توسد صلايفه

ياللمملكة والله نحبك ونغليك ..
واللي نوالك شر ينسى سخايفه

يالمملكة دونك رجال وحواليك ..
تاطا على الغادر وتلعن سلايفه

يالممكلة ذي حالتي منك وإيليك ..
ماهي على ماقيل كذب(ن) وزايفه

يالمملكة راعي القصيدة محاكيك ..
عاطل سنيني لـ الثلاثين طايفه

يالمملكة وإن ماحصلي حنانيك ..
أبقى سعودي هامتي دوم نايفه


__________________
منقووول