[لحظة فرح־ˉ¯¯ˉ־_ۣۨ]

كنت أبكتب مشاعري وفضفضاتي قبل نبدأ بالدوام قبل يومين كنت ابكتب هالموضوع لأني كنت ناويه افضفض قبل قلت أغديه يخفف هالهم والزمل اللي أنا شايلته للدوام ّّبس انشغلت ..


يمكن بل اكيد كلن مثلي شايلن هم لاول يوم بس مادري وراه نشيل هم ؟ وراه مايصير عادي هل لأننا نحب الراحة مثلا؟ أم لأننا لم نأخذ كفايتنا منها اقصد الراحه؟ أتوقع الاحتمال الثاني هو السبب الاقوى .
الصراحه قهر ماامدانا نعطل ونسنتمتع باجازتنا إلا دق المنبه للدوام
يعني وش ضرهم لو مخليننا نرتاح هالاسبوع ونبدأ السبت الجاي مثل الطلاب
لانه حنا علاقتنا بالطالبات وبس وش نسوي قبل باسبوع نداوم المفروض بس الاداريات اللي يداومن هالاسبوع >>> بيجلدنه الاداريات

فعلا والله ترا حنا داومنا ثلاثة اسابيع بعد الاختبارات زينا كل اشغالنا من اختبارات الدور الثاني وعرفنا مناهجنا وجداولنا فليش الحسد ؟!! عطون فايده وحده من دوامنا هالاسبوع علشان اقتنع !! (فيس يحك راسه)
لحد يقول مامليتن من الاجازة (فيس معصب) لا ماملينا بعد لأنه الصراحة ذي اجازة تسمى !!عشرين يوم بس قبل رمضان وبعدين جا رمضان الله يعيده علينا وياسرعه خلص والله لو الاجازة الى مابعد الحج والله ان تكون احلى شي >>>>تحلمين >>>لا مااحلم كانوا قبل كذا اجازتهم ولا بعد مناهجهم كانت اكثر ومع ذلك مستانسين واخذين حقهم لا من ناحية المناهج ولا من ناحية الاجازة ولامن ناحية الدرجه المستحقه >>( فيس اللي يرفع حواجبه ) >> افهم يافهيم
ويمكن قد يقول قائل وشوله تشيلن هم يالمدرسات هو بلاش تكرفن
هنا نرد و نقول : لا موهب بلاش بس الراحه النفسيه والجسديه له دور كبير في العطاء الكمي والكيفي للمعلم
وكذلك راحة المكان والله العظيم قعدنا نشرح طول الصيف اللي راح بفصول مابه مكيفات يعني تشتغل بس حااااار
ويوم داومت اليوم بعد ساحة المدرسة غبار, وغرفة المعلمات مغبرة ياليتي مصورة لكم المكان بس تعرفون صعبه لأنه فيه معلمات, لو فاضي كان وريتكم
ولا بعد زودن على هذا إذا جيتي تسلمين على الاداريات وعلى رأسهن المديرة لا فيه ابتسامه ولا شي طيب على الاقل قابلونا بابتسامه يامال اللي مانيب قايله ,,, على قولة المثل (لاقيني ولا تغديني ) مادري متى بس نتطور اقصد تتطور العلاقه بين الرئيس والمرؤس؟
تخيلوا معي جميعا(يعني موب صاير هالشي مااتوقع )بس مايمنع أننا نتخيل ونحلم تخيلوا لو كان أول يوم لنا فيه استقبال بالورود والبخور والابتسامات واستعداد بتنظيف المكان وتجهيزه باللازم من انارة وتكييف هل كنا بنشيل هم للدوام ولأول يوم ؟
اعتقد , لا

　
وفيه شي نسيت اقوله عن الاداريات >>بدا الحش بهن بس والله من القهر, للاسف يكلفن بعض المعلمات باشغال اداريه مثلا تسجيل الحضور والغياب والقيام بأعمال المراقبه والمقصف واعمال الكمبيوتر ومراقبة الباصات والمقابل ماذا؟ إنه يخفف نصاب المعلمات اللي شالن شغل الاداريات شغلهن وكذلك تكافأ بانه ماتاخذ حصص انتظار وحتى تخيلوا بالاختبارات ماتمسك لجان ولا تراقب والضحيه من؟ بقية المعلمات ينضغطن بحصص الانتظار والمناهج واللجان بالاختبارات ليه؟لان زميلتهن اللي من نفس التخصص شايله عمل اداري من مراقبه او اخذ الغياب او المقصف فهذي لا تحاتسونه ومالكن دخل به وأنتن يالباقي اكرفن والاداريات انواع الراحه


ملاحظة:
في حديثي عن الاداريات تكلمت عن مدرستنا فقط ,
أنا لا اظلم جميع الاداريات في باقي المدارس ولو كنا نسمع انه يوجد نوع من التشابه لكن اردت ان انبه فقط انني اتكلم عن مدرستي ,ربما كان هناك غيرنا افضل منا فيا حظهم .... ويا صبرنا ...

انا كتبت الموضوع وانا مسرعة لأنه ماعندي وقت و احاول انظم وقتي علشان انام
بس قلت لازم اكتب وافضفض مادري وراه حبكت معي اكتب بس يمكن علشان فيه شي بداخلي وقلت لازم اطلعه بالكتابة وبعد لو فيه معلمه مثل واقعنا بمدرستنا لا مانع تفضفض هنيا .
اشكركم على ترك المساااحه لي للفضفضة
>>> تحس أنه فضفضت لخمسين سنه قدام مع انه بوه اشياء كثيره عندي بس ماعندي وقت بعدين انشالله اقولكم

...... دمتم بسعاااده