[عآشقة قسمهآ ..]

[BACKGROUND="100 #000000"]

[أسرآري] ~
أو سموهآ ان شئتم [أَزَمَآتي] ~


1-
ليه اذا طبخت ماأشتهي طبخي ولا أستطعم فيه
ماتصدقون قيرلز تعذبت من هالنقطة .. اليوم سويت لأهلي تشيز كيك ويوم ذقته رميت الشوكة أرضاً > اوخس ياللغة
صرت ماأتحمس أطبخ .. مر يمر العدو هم يتلذذون ويبلعون وأنا أتفرج ..
لكن مع ذلكـ وجدت طريقة وأنا أم الطرق والأفكآر ألا وهي اني أسوي مقالي ولا برجر ولا هوت دوغ ولا اندومي بس مليناها وطلعت مع خشومنا كرم الله النعمة
وحدة من صيققاتي [ماي بست فرند] تقول لاتذوقين أي شي من طبخك لا ملحه ولابهاراته ولاحلاهـ ولا سكرهـ وبهالطريقة تشتهينه شوي ..
جربتها مرة ونفعت وعقب لا .. أضحك على روحي أنا
أساساً بمجرد اني أشوف أكلة قدامي وأسترجع مقدايرها أعجز آكلها أقول وشلون جمعت ذولي على بعض وتتقلب معدتي
معقولة تكون ذي أزمة وتحتاج علاج اهئ اهئ ؟؟!!

شوفوا تطبيقي لحلا بحور

ياناس أحد يعافه ذا .. يشهي وأنتي مغمض > تجي
وقسمن أخذت وحدة بس ويالله يالله كملته

حلا آخر بأشهيكم غصب ذذ





2-
أكره أجلس مع شخص يطلع صوت وهو يآكل .. بمعنى [يماطز] .. وربي وربي العلي الأعلى اني أتنرفز وأعجز أتحمل ونفسيتي تصير بالقاع
وقسمن أنسى نفسي ولا أقدر أتحكم بأعصابي .. وتكثر هذة الصفة عند [ التماسيح] و[ البزران].. لكن البزر أتحمله أهون ولا بالفرق ..

على طاري البزران شوفوا هالطخمة فديته ابوهـ مسافر وتبي تصير رجال البيت

ترى أم هالسنتين لابستن ثوب ابوه عشان تموهـ الحرامي اذا جآهم ..
طيب هو بيلقاه بكومة هذا القماش؟؟!!

نرجع لمحور حديثنا :
اذا كان أحد كبير ويطلع صوت في أكله !! .. يووووووووه ياأنا ودي أرنعه وأسد خشته بما يسمى [بنقه] .. ياناس وين الإحترآم للنعمة بهالتصرف اللامستساغ ؟؟! ..
مير أحمد ربي وأشكرهـ ماعندي إلا واحد من اخواني يتصف بهذة الصفة الوعة .. وتوهـ عندي يتعشى تدرون اذا شفته جاي يآكل عندي وش أسوي ..
دغررري أحط سماعات اللاب وعلى طول يوتيوب أناشيد الخضر وأعلى صوت ~






3-ماأتحمل الإستغباء وكثرة الأسئلة والحتسي الي ماله سنع بمعنى القرقر الي يغث خصوصا اذا صار الي قدامي مزكم وبه ربو ويناشق
البلاء اني ماودي أفشل أحد بس غصبن عن أتنرفز وأقوم من المكان .. وأبتل معصبة اذا ماتواجد مثل ذلكـ الشخص بمثل تلك الصفات حولي
لربما الزكآم والربو ابتلاء من الله لكن اعتراضي اذا ماصاحبها تصرفات غير لائقة كـ [المناشق] و [القرق الي ماله سنع] و......الخ , منعاً للحياء وأنتم أبخص ..

هذا المزيون يسلم عليكم وترآه يقول انا أذكى حيوان بالعالم وأكره الإستغباء مثل عاشقة

صورته بالنماص ومابيني وبينه إلا 20سم يمممممممممممه
وتراه ينقم فصفص


4-
اذا بدت اختباراتي سويت حالة طوارئ في البيت ويوووووووه تعالوا شوفوا النفسية بالحضيض ..
-أختار أبعد غرفة متوفرة في البيت عن اللجّة والأصوات ..
-اذا سمعت أي صوت قريب مني أجدع ملازمي وأنكتم وتجين الصيحة لأني أعجز أفهم ولا حرف ..
-من أصلي أعشق الهبآل وبالإختبارات يصير دبل .. ومايطلع الفن والإحتراف إلا بهالوقت بالتحديد ..

غطت هاللوحة الفنية لوحة الموناليزا .. راح عهدك يادافنشي


لاحظوا هون رسمت جوالي ذذ > الله من زين الدراسة



-وطبعاً تضيق الجمعات والشوفات نشتهيها شهوتنا للقهوة بعز البرد

هذي جمعة ببيت [مآي بست فرند]


وهذي ببيتي

ترى بس أنا وايآه


-كل فترة اختبارات تمر أقول بأفصل .. وش لو اني سآمعة كلام أهلي وداخلة طب .. كآن يمكن وزني يكون أقل بعشرة كيلو ....الخ

هذا الشعار على المعطف الي بألبسه لو اني طالبة طب > رقت لهاته


-كذلك لازم يكون لدي حقيبة متنقلة في فترة الإختبارت تحوي الآتي :
فرشاة ومعجون [لأني أنام بالغرفة الي أدرس فيها وعلى حسب أحيانا تكون المجلس أو غرفة الجلوس بتاعت الحريم أو غرفة خيو الي تزوج أو غرفة الخدامة ]
شاحن جوالي الكاميرا
شاحن جوالي حق الكلية
شوكليت مع القهوة
بسكويت اذا مالي خلق أتعشى
كابتشينو اذا صدعت آخر الليل
أقلام وآلة حاسبة وكشكول للمذاكرة
ربطة شعر وكرتون مناديل
وكريماتي لأني سبق وقلت لكم أسكن بالمكان الي أدرس فيه ..

-على فكرة قرب التخرج ولموا الهدايا والشوكليت .. تراه بيتنا نطح المسجد


+اذا فطنت لشيء آخر بأكتبه هون ..
المهم ياناس بس أنا الي تسذا ولا كل العالم مثلي .. لاتقولون حالتس مستعصية لأني والمة للصياح اهئ اهئ ..
وش الحل ياجماعة ؟
+طلعوا أزماتكم فيذا لربما نجد حلولاً لبعضنا البعض ~




مخرج ~

هذي الصورة التطقتها في استرآحة هون ببريدة ~


هون صوّرت بنت خيو بالشرقية ع حين غفلة منها ذذ


,~
ملحوظة :
التنسيق مطابق لتنسيق موضوع السواليف عشان تحسون بالأمان وتطلعون أسرآركم
وهيا اقرقوا بلا حدود [/BACKGROUND]