[العم علي]

بصراحة انا من زمان ومن يوم اني بزر وانا ما أدري ليه كثيرين يتضايقون من ذكر أسم امهاتهم خخخخخخ من أي واحد يقول اسم امهاتهم وعيب وياويله ويلاه من يتجرأ ويقول اسم امهم ...
في أحد الصيفيات رحت للجوازات ابي اطلع جواز سفر .. واروح بالسيارة في عز هالقوايل ( يعني حزة الظهر ) واروح لمبنى الجوازات .... واعبي كل البيانات واجلس امسك سرا وانتظر دوري .. احتري رقمي يطلع ..

اخيرا وبعد فترة جا رقمي وافز واقول... دوري... دوري واجيك نافخ صدري واطالع بالضابط ويقولي :

الضابط : عطني الملف والصور
انا : سم طال عمرك .. الله يخليكم لنا ان شاء الله
الضابط : وين الصور
انا : خذ هذي هي
الضابط : وليش مو كامله اذانك طالع نصها بس
انا : وش اسوي عاد أذاني مشنترات كنهن صحون دشوش .... انتم طالبين 4 × 6 وبصراحة عجزت اعفط فيهم مع المصور ولا جت معنا ما طلع الا نصها بس هذي صوره ثانية كاتب عليها ( يتبع ) الاذان ...
الضابط : تستخف دمك هالحين
انا : لا اقص قصتي مع الصورة ( امممعععقق ابلع ريقي )
الضابط : طيب وش اسم امك
انا : لا ياشيخ .. علمني انت اول وش اسم امك وبعدين اقولك
الضابط : ( طالعني بعين قوية وانا ابولع بريقي ( امممغغغغغققق ) اقول وش اسم امك .. لاأرمي هالملف بوجهك
انا : يؤ ... ليش طيب هي اللي بتسافر والا انا ... وش دخلكم بامي .. والله قلة ادب
الضابط : بتقولي والا ضف وجهك يالله
انا : لا خلاص اسمها ..( واتلفت يمين ويسار .. وسكت )
الضابط : وش فيك سكت
انا : اصبر خل الهندي اللي معه شاهي يمر .... لا يسمع بعد هو أسم امي .. والله قهر عاد !! اسمها نوره
الضابط : اخيراااااا الله يا باسكال هالحين
انا : وش تقول ...... لالالا ولا شي

عطاني الملف وانا اضحك تدرون ليه لاني لعبت عليه ماقلت له اسم امي الصدقي خخخخخخخخخخخخخخ
وطلعت وقالي رح للحاسب الالي دقق المعلومات ... واروح وامسك سرا والله زحمة
يوم جا دوري جلس يدقق على الجهاز وانا مغطي اسم امي باصبعي الكبير .. قال لي الموظف.. وين اسم امك
قلت .. اووووه بعد انت والله فضحتونا
قال : ياخوي المعلومات ماهي متطابقة مع بطاقة العائلة ... اسم الوالده متغير .. ارجع للضابط وعدلوا اسم امك
انا : اووووووه والله حاله كل هالتعب وارجع مره ثانية ... والله الفشيلة وش ابقول للضابط هالحين

وصلت للضابط بعد ما مسكت سرا ثاني .. ويوم جا دوري قال الضابط
الضابط : هااه وش جابك بعد
انا : ابد عدل اسم الوالده
الضابط : ليه مو صحيح ... انا : بصراحة لعبت عليك هي اسمها مزنة
الضابط : طيب وش حادك على الكذب .... من زين امك عاد
انا : لاياشيخ .... احسن من امك

وعطاني الملف وجلست اقراه ادقق .. وجا بعدي واحد وقاله الضابط وش اسم امك .. وقال له الرجال .. مزنة

واللتفت عليه وقلت له تطنز( يعني تتريق ) انت ووجهك ( احسبة يتكلم عن اسم امي ) وامسكة مع رقبته ومع ياقت ثوبه وارفعة شبرين عن الارض وقلت يوم انك تعرف اسم امي وراك تطنز قدام الله وخلقة .. واشوته بوز مع بطنة ويقوم الضابط ويصكني كف طير كل الاوراق اللي معي وهو يقول انهبلت ( ياخوي اسم امه مزنه زي اسم امك وش دخلك بالسالفة ).. وانا جالس ادور اوراقي ما ابي احد يشوف اسم امي ... ويصكون الشعبة ويجون الشرطة وياخذوني للتوقيف ... واجلس يحققون معي ويقولون وين اوراقك ... وانا ازاعق واصارخ للي تحت اوراقي يالملعن .. بذمتكم اذا احد شاف اسم امي .. ويجي الهندي وهو شايل الاوراق ... قلت والله قهر حتى هالهندي شاف اسم امي ...

والله واطلع من الجوازات لاجواز ولا يحزنزن ( يعني خرجنا من المولد بلا حمص )

بس بصراحة ليه كثير ينحرجون من ذكر اسامي امهاتهم ....؟

عموما انا واحد افتخر باسم أمي حتى بجواز سفري مكتوب

اذا انت ياللي داخل بتقرأ الموضوع ماتنحرج .... قل وش اسم امك خخخخخخخخخخخخخخخخخخخ ؟