[يكفي!]

بسم الله الرحمن الرحيم
السلام عليكم ورحمة الله وبركاته

أرجوكم ثم أرجوكم اقرؤا الموضوع بقلوبكم ..الأمر لايتحمل الكتمان!

ربما البعض لايروق له وقد يسميه هذيان >> فليكن أما أنا فلم أعد أحتمل!


استميحكِ عذراً يالغتي الفصيحة سأضعك جانباً لأفرغ مابجعبتي

موضوعي يتكلم عن اللي صاير بمدارس الإبتدائي وش هالمهزلة اللي حنا قاعدين نشوف كل يوم!!

خلااااااااااااااااااااااص يكفي يامربيات الغفلة>> إلا من رحم ربي

خلون أقول لكم وش اللي دفعن لكتابة الموضوع:

موقفين أنا - بكامل عقلي وقوتي وثبات قلبي - عجزت أتحمل فـ كيف ببنات ماتتعدى أعمارهن 11 سنة يتحملن!

عشان تفهمون الموضوع أكثر

اللي صاير بمدارس اليوم :
تحطيم - تهميش- تمييز- عنصريه - دكتاتورية- عنجهية و...و... هلم جراً..

الموضوع اكبر مما نتصور يمكن يقول أحدنا تكبر البنت وتنسى لكـن لاا والله ماراآآآاح تنسى وحنا جربنا هالشئ ومانبي اللي صار لنا يتكرر مانبي بناتنا يصيرن مهزوزات الثقة عشان وحدة ماتستاهل تصير معلمة أو يطلق عليه اسم مربية أجيال ويــــــــــن مربية أجيال وهذي سواياه!

والله أحلف لكم بالله ماكثر الفشل والانحطاط والرجعية بكل ماتحمله من معاني إلا بسبب واحد

مـااااااااا فيه تأسيس على سنع تطلع البنت وهي ماتعرف الصح من الخطأ أهم شي بس تنجح وبطقاق يطقه هي أتقنت وإلا مدفوفه .. إلى مـــتى ؟!

أرجع لسالفة المواقف:
الموقف الأول:
أعلنوا موعد رجوع خادم الحرمين الشريفين إلى أرض الوطن حفظه الله كلننا فرحانين طبعا وعلى أساس هالشئ صار كلن يحتفل ومن اللي احتفلوا " الإبتدائية الأولى لتحفيظ القرآن الكريم بالمريدسية" وقالوا لهم البسوا كل شئ أخضر طبعا أنا وأمي سيدا ع السوق لعيون خواتي عشان نشتري لهن أعلام وبروشات وووو كامل المستلزمات ومن زود الحرص صارت أمي تدور بلوزة مخططة أخضر بأبيض تبي بنته تصير أملح وحده لأنهم قالوا بنصوركم >> ياحبهم للمهايط

ويوم جاء الصبح أختي الصغيرة متحمسة أقوى شئ وصارت البنت خضراااااء الوشاح الأخضر والبروش والعلم والشيال الأبيض والبلوزة مخططه أخضر بأبيض يعني شييييييييي
طلعت بتركب السيارة ويؤيؤيؤ نست شئ جت تركـــــض طاايرة يمه يمه أكتبي لي موافقة علشان يصورونن مع البنات >> فديت البراءة

كتبنا له موافقة وطلعت البنت وهي مزهووة وفرحاانه بشكل..

وحنا بالرجعة (الظهر) ركبت السياة لقيت أختي حاطه يده على أختي وحزيينننه بشكل (مكسور خآآطره بشكل فظيييع)

أنا: هآآه صوروك يا...؟!
أختي: لا >> بإنكساااااار
أنا: ليش >> بحماآآس
هي: .............
أختي اللي معه بنفس المدرسة: قالوا نخاف يصير فيه مشاكل>>بعصبية
أنا ماحبيت أثير مشاعرهن ففضلت إني أسكت

بعد كم يوم نزل الموضوع:
http://www.buraydahcity.net/vb/showthread.php?t=251786
وياسلاااااااااااام سلم صار الموضوع أكبر مما كنا متوقعين
صارت الدعوى فيتامين "و" حتى بالتصوير أنا بصراحة ماهمن يصورونه وإلا لا؟ لكن اللي شب كبدي ليش يميزون بينهن خلاص المفروض مايصورون أحد إذا كان فيه مشاكل ماله داعي درينا إنكم محتفلين بدون ماترزون بناتكم
ماصوروا إلا بنت المديرة وبنات المعلمات وكم بنت ماأدري وش السبب بإختيارهن مثلهن مثل غيرهن مابهن زووووود!!

آآخ بس لو تشوفون نفسية أختي عقب ذاك اليوم حتى مو بس أختي كل البنات صاروا مالهم خلق بعض وكله بسبة التمييز اللي قاعد يزرع الحقد بأنفسهن والمسؤول عن هالشئ للأسف (أساس المدرسة)؟!

طبعا يمكن مايأثر فيكم هالموقف لكن مايحس بالنار إلا واطيها

وتكرر هالموقف بأشياااااء كثيرة..
أقربهن يوم الفطور الصحي..

والموقف اللي ماراااااااااااااااااااااح أسامح عنه أبد أبد أبد: ولو إنه ماضرن بشئ بس يكفي !

قالوا يالله تفتيش ع القمل(عافانا الله وإياكم) طبيبة الوحدة الصحية جاية وألقت محاضرة توعوية جزاه الله خير >> الأمور ماشيه تمام

لكن يوم جاء وقت التفتيش >> قمة التجرد من المشاعر والإنسانية
حطوا لكل فصل سجادة بالساحة وصاروا يطلعون من كل فصل بنتين يفتشونهن اللي به قمل تقعد بالسجادة واللي مابه ترجع للفصل بالله عليـــــــــــــكم هذا أسلوووب ؟! تشهير ذا وعدم إحساس وش تتخيلون شكل البنات اللي بهم قمل صار الكل مايقرب لهن وكأن بهن (جَرَب) لا واللي زود الطين بلة إن إن البنت ترجع لفصله وبيده شامبو القمل يعني إعرفوا يابنات!!

آآه بس تخيلت روحي وحده من هالبنات >> كل واحد يقرأ الموضوع يحط روحه بهالموقف >أرجوووكم

والله العظيم إن هالشئ جرح مشاعرنا كلنا من أبوي لأصغر واحد بالعائلة وحنا الحمدلله إن خواتي مابهن قمل لكن ماأعجبهن اللي قاعد يصير لصديقاتهن

فيه أسلوب ياااااااااااااااناس متى ترتقون ؟!

تقدر المديرة تستدعي ولية أمر البنت وتشرح له الوضع والعلاج يصير مع الأم مو مع البنت اللي والله ماألومه لو جدعته بأقرب زبالة>>وأنتم بكرامة

والموضوع اللي فقع مرارتي:
http://www.buraydahcity.net/vb/showthread.php?t=254709
من متى صارت المدارس سجون تضرب به البنات..

ياجماعة يكـــــــفي .. نفسيات بناتنا صارت زفــت والثقة ماهانآآش
أنا أدري إنكم بتقولون ليش ماتنقلون خواتك لمدرسة أهلية مادام الوضع مو عاجبك وفكينا من موضوعك..

حنا نقدر لكــن غيرنا مايقدر ومو عاجبه اللي قاعد يصير لبناته وش الحل ؟! يتركون بناتهم لناس ماعندهم ضمير وش ذنب براءة أطفال تغتال بكل سهولة وحنا ساكتيين؟!


يقولون أطفـــال اليوم هم عماد المستقبل >> لكن وش ترجون من أطفالنا اليوم لصارت ذي أحوالهم

المفروووض يصير فيه تأهيل لمعلمات الابتدائي ومو أي وحدة تجي تدرس لأن هالمرحلة مهمة جــدا وتحتااااااااااااج لعناية اكثر يعني إذا طلعت البنت من الإبتدائي وهي واثقة من نفسه وعنده مبادئ وتعرف الصح من الخطأ راااااااااااااااااااااح تظل طوول عمره كذا وعلى العكس من كذا شوفوا اللي بالمتوسط اللحين اللي مراهقتهن عنييفة إسألوا عن حالهن يوم كانن بالإبتدائي أجزم بإنهن مهمشات ومحطمات وهذا اللي دفعهن لإبراز أنفسهن بهالمرحلة خصوصا وإن المراهقة تعرف بمرحلة ( تراي كبرت ولي قيمتي) فهي ماراح ترتاح إلا لما تفرغ كل اللي بنفسه اللي جامعته لمدة ست سنوات وأنا بصراحة مـاألومه؟!

والواجب منا اللحين إننا مانسكت ونطالب بعمل تصفية للمعلمات اللي لهن أكثر من 30 سنة وهن يدرسن يكفي قضت أعمارهن ؟!
جيبوا بنات فاهمات جيل اليوم مو عجوز مخرثة ماعنده سالفة!
كلن يشكي من معلمات الإبتدائي مو بس أنا بس محد تكلم>> إلى متى ؟!>> إلى أن يرث الله الأرض ومن عليها

ختاماً:
أسأل الله أن يصلح الحال وأنصح كل معلمـ/ـة بالإخلاص الإخلاص والله وش يسوى التعب إذا صار ع الفاضي وإذا تبون البركة أخلصوا بعملكم..
ولكل معلمـ/ـة كرّسوا أنفسهم لإخراج جيل واعي وتفانوا في عملهم وأخلصوا ذلك لله أسأله سبحانه أن يقر أعينهم بصلاح أبنائهم وأن يبارك لهم بأعمارهم وأموالهم وأن يجزل لهم المثوبة والعطاء إنه ولي ذلك والقادر عليه..

أعتذر جـدا ع الإطالة ..
وأرجو من مشرفي الساحة المفتوحة عدم الحذف لأن والله لم أكتب موضوعي لأجل التشهير وماشابه لكن لأهمية الأمر الذي نواجه..