 |
|
|
|
|
09-04-2011, 01:07 PM
|
#1 |
|
قبس دائم
تاريخ التسجيل: Jan 2008
البلد: بحارتن جميلة ()
المشاركات: 4,192
|
دقّي لأمتس مابي حيل .. دقّي لرجلتس كلي حيييل > ؟ - عَطاء -
[BACKGROUND="80 #CCCC99"]
حينما يشتدّ أزرَ اللوزتين ويبدأن يكبرن شيئاً فـ شيئًا  و لساني يبدا يتبعرص مايدري وين يروح لوه .. إن انبطح حارش اللوزتين وبدت حالة الإستنفار  وإن رقى فوق كذلك .. وإن بلعت ريدزك فـ اللهم صلِّ على محمّد يشتدّ الوطيس >< وعلى هالحالة 48 ساعة .. أحس إنّي فخمة يوم أكتب 48 ساعة  منوّل لا قريت بالأخبار / - جورج بوش يعلن عن حالة استقرار لمدّة الـ 48 ساعة القادمة .. 48 ساعة كم ذي ؟! شهر ولا سنة يبي يصير هالإستقرار  وأفرح لاشفت هالرقم أحس إنهم كريمين ! ماعرفت وش معناه إلا مرّتن قريت خبر - بوش يعلن في خطابة التبن أنّه سيبدأ فرض العقوبات على العراق بعد الـ 48 الساعة القادمة .. أنا قلت اييه أثره ريّض وييين وش يمرّر هالـ 48 ساعة الله يلحقنا خير كودنا نصير حيّين والله ومادريت إلا من بعد باتسر ويضرب العراق ضربوا دميجتوه قولوا آمين ..  <<- عاد لا تدققون بأنباء الأخبار تراي لي 3 سنين وأنا ماحولك أحد بالأخبار والسياسية مريحين روسنا ماحنّب ناقصين وجع راس ,، قبل 100 عام وفي تلك الحارة الصغيرة وبيوت الطين التي تملأ المكان .. تظهر لنَا تلك المرأة التي لم يهدّها الزمان ولم يحرّك فيها شعره < اهب - طبعاً السر إنه ماحرّك فيها ولا شعرة هو حليب النياق والبقر الطازج والسمن والزبدة وما إلى ذلك - أتت على باب خشبيّ مُتهدلق وبدأت تطرق وتطرق طقْ طقْ طقْ .... / مِنّ ؟ جرادة / أنا جرادة .. جرادة الحرمة بينه وبين نفسه ( جرادة غريبة وش جابه هالحزّة !! .. أكيييد عنده معرس لبنتي أسماء هالعانس ) / ايييه تفضّلي تفضّلي الله يحيّتس هذي السّااااااعة المباركة ياجرادة ياخيّتي  < بدا شغل التليوِق  و تُدخل أم أسماء " جَرادة " في فناء المنزل .. و تُجلسها على ذاك الحصير وَ الدزدر يطبخ و نيران الله الموقدة تحته والحرمة زايرتهم الساعة 7 الصبح ! .. وهالشيء هاللي مشبوبن عليه ذا مهب فطور , هذا الله العالم إنّه غداء + عشاء حريم منوّل يعرفن يفكرن تحط له مطازيز ملا قدر العزايم اللي عندنا الحين هذاك اللي مير مانشوفه من تالي ! همن تجلد أمّه بالطبخ . المهم وتأخذهن السواليف والمناشد والحش والحشيش طبعاً منوّل حلال أم أسماء / دقيزة ياوخيتي جرادة بشوف بنتي أسماء هي خلّصت خابزة بَ التنّور ولا لا و خل أقولّه تجيب من خبزه تذوقينه والله يااااطعمه . . - وتحط اصبعه عند حجاجه لين رقبته مروراً بالخدّ وهي ضااغطتن عليه من زين طعم خبز بنته - . . إنه يهبّل جرادة / اييه ماشاء الله ماشاء الله - بينما هي تلعب بمجاوله الذهب - <<- اوجعن قلبي يوم قلت مجاوله الذهب هههههههه وتنقز أم أسماء لبنته أسماء ولاه خامدتن بفراشة السنعة اللي كل شيء مسويته كما تزعم أمّه / أسماء أسماء قوووومي علّتن تضربتس قومي تملّحي والبسي الدناديش وقومي أختتس منيرة تجْدلتس 75 جديلة .. قومي وجع ماتسمعين !!وتروح أم أسماء للمطبخ وتطلّع الخبز اللي هي مصلحته وتظبطه وتحطّه بهاك الصحن وتصفّه صفّن مظبوط وشوي إلا جايبتن البخور ومبخرته  وترجع لأسماء / هاااوّ أسماء ماقمتي قومي يابنتي يالله .. و شوفي تراي مولمتن صحن الخبز جيبيه على دربتس ما أوصيّتس مب تنسين .. ترجع أم أسماء لجرداة .. وجرادة مازالت تلعب بمجاولة طبعاً هي ليه تلعب بمجاولة ؟ تبي ايقاله تموّه للحريم اللي تزورهن تقل ماعنده سالفة و24 ساعة هواجيس ومهب تنتبه ولااا هي مشغلتن جميع الحواس ومخليتهن بحالة طواري  ..ولا يفوته شيء وماتغفل ..قامت أسماء يوم انتبهت إن " جرادة " عندهم وهي طايرة من الوناسة وتزيّن وتمرّ المطبخ مثل ماوصّته أميمته وتجيب الخبز وتجي وهي تبُوسم : )  جرادة / ماشاء الله هذي أي بناتتس ؟ أم أسماء وهي اتضحّك  / هذي أسماء الكبيرة اللي تعرف الخياطة تعالي بنيّتي وأنا أمّتس اقعدي وعطي خالتس جرادة من خبزتس تذوقه .. أسماء وللحين متصنمه وتبوسم وتمدّ صحن الخبز لجرادة ..جرادة وهي تذوق / ايه ماشاء الله هذا سواتس ؟ أسماء بخجل وعينه على أمّه , ياأمّه تعض على برطمه وتأشر له قولي أنا / ايه سواي ياخالة  بعد ذلك ودّعت جرادة أم أسماء وأسماء .. أم أسماء / وووهـ يالله إنّه يوم خير علينا ويجي ولد الحلال اللي يضفّتس منيرة المحمّد أعرست وهي أصغر منتس بخمسة أشهر ولطيفة بنت خالتس مخطوبتن أصغر منتس وأنا قرادة حظّي دخلتي الـ 20 وأنتِ ما اعرستي كلّه من سناعتس اللي توزن بلد .. - وتلصع أم أسماء .. أسماء مع راسه -الحين يالله تعالي معي للمطبخ أعلمتس وشلون تكبّين المطازيز أسماء / يمّه بروح أنام منب مزينتن العوود أم أسماء / طيّب دقّي الرحى يابنتي انفعي لو بتبن أسماء / والله يمّه مابي حيل . وتروح أسماء تنام تاركتن خلفها أمّاً مكلومة تنكب حضّها الرديء بهالبنت .. لحسن الحظ نالت أسماء على إعجاب جرادة .. وخطبته على الفور بما إنّه ذاقت خبزه لولد الحلال .. في ظهريّة الدزايلة جلست جرادة وأم أسماء يتناقشن في أمور الجهاز وما إلى ذلك , والعرس بعد باتسر مب مثلنا بعد 3 أشهر العرس . وأسماء جالستن بجوارهنّ تدقّ الرحى دقّاً .. دقّ الله بلعومه طبعاً أسماء مهوب جود تدقّ والظاهر إن الرحى مابه شيء يندق بس حتّى تظهر بأكمل صورة للأطخم خطيبة ..بعد ماخرجت جرادة من عندهم قامت أم أسماء لبنتها أسماء ووقفت أمامها - وأنتِ وش عندتس تدقّين الرحى من صبح الله .. كل عمري أشحذتس تدقّين لي فليفة ولا كمّون وتسهجينن ماتسنّي أحتسي .. هذا إي والله المثل [ دقّي لأمتس مابي حيل .. دقّي لرجلتس كلّي حيل ] قطططع أنا ينبح حلقي بهالأوامر .. وولد الحلال بالساهل تخدمينه ؟ أنا اللي بي الأجر أميمتس  مهوب بهاك الثور ا.هـ  تمثيل / قامت بدور جرادة : أم الهبال وبدور أم أسماء / أم الهبال وبدور أسماء / أم الهبال ضيف الشرف / قدر المطازيز تنسيق / أم الهبال تصوير وضبط إضاءة / أم الهبال رسم / أم الهبال إخراج / أم الهبال ما يستفاد : 1- ياويل اللي تصير مثل البنت أسماء 2- لا طق أحد بابكم الصبح لا تفتحون له أكيد خطّابة ! 3- الشخصيات بالرسم خصوصاً أم أسماء و جرادة متطنزات بالعجاج 4- الرحى هو حصاتين كبار محطوطات فوق بعض ويطحنن الحبوب وغيرها . 5- سر طول وكثر جدايل أسماء تدهن شوشته ب " ودِتسه " 6- مجاول الذهب اللي على " جرادة " عيار 24 . و مع السلامة , واستروا ماواجهتوا
__________________
. . . ثمّة نساء يُصبحن أجمل في الغياب "/ ! . |
|
|
| الإشارات المرجعية |
|
|
النمط الأحادي