[سحاب الشوق]

حـنين


الحمد للوهاب راع الوهايب... يعطي ولا يبخل ولاخاب طلاب

يالله يمك سقت كل الركايب...ياواحد ماحط من دونه احجاب
ياخير من يدعي لكشف النوايب...يارب عبدك مابغى دونك ارباب

يارب عبدك جالك اليوم تايب...اغفر ذنوب مالها عد واحساب
ارحم ضعيف دهورته المصايب...ياخالقي ماخاب من جاك طلاب

السجن طال وطال فرقى الحبايب...من دون خلي سكروا من دونه الباب
ماهمني راعي الوصوف العجايب...راع العيون السود زينات الاهداب


همي على اللي راسهم صار شايب...اللي شكو لجلي غرابيل وأتعاب
أمي وأبوي وإخوتي والحبايب...اللي لفرقاهم غدا الدمع سكاب

يابو فهد اصبر ترى القلب ذايب...والود ودي يجتمع شمل الأحباب
مابقت أنا يابوي ولا صرت خايب... ودرب الردى يابوي مايوم لي طاب

يابو فهد حالي من البعد ذايب... والشكوى لله يايبه سكر الباب
عز الله انه من عظيم النوايب...يومك طريح وبيني وبينك احجاب

وامٍ على شوقي تلقى الهبايب...واليا سكنت عادت على شماغ واثياب
واليا زهموا باسمي تضم القرايب... والقلب يكفخ كنه الطير حطاب

ولحلت الجمعه وشوف القرايب...يهل دمعه كنه السيل صباب
ماأخطيت أنا يايمه ولأنيب خايب...للدين يرخص عمر وأولاد وأحباب


ياميمتي ذكراك مثل السحايب... هلت على قفر من القلب وإشعاب
فرقاك يايمه يزيد اللهايب...بفرقاك ياقليبي ترى النوم ماطاب

وياام فهد مالي ومال الطرايب...فرقاك عندي من عظيم الأخطاب
أنتي أمنا وأم شيخنا راع الوهايب...الله يصبركم على فقد الأحباب

صبرك ترى المكتوب لابد صايب...عند الولي ياغاليه خط بكتاب
يارب بالدنيا تزيده وهايب...وتعطي جنان قبلها العيش ماطاب


ياعيالي ان كنت عنكم اليوم غايب...فالله رب الناس ماجود ماغاب
ابوي وأمي وخالتي لي طلايب...بروا بهم مابي يجي مشاريه واعتاب

لابد من يوم تزول المصايب...ويلتم شمل اللي من البعد منصاب
والعيش مايصفى بليا شوايب...والعمر ياتيله مع الوقت جلاب


يالله تجمعني بربعي والحبايب... وتشفيني من هم ومواجيع واتعاب
وصلاة ربي عد وبل السحايب... على النبي الهاشمي وكل الأصحاب


كتبها

لوالده الغالي كشف الله ضره وألبسه لباس الصحه والعافيه ولوالدته الحنونه وخالته الغاليه جبر الله كسرها ورد الله عينها وجمعنا الله بهم عاجل غير اجل أنه سميع الدعاء