[بريماكس]

السلام عليكم و رحمة الله و بركاته ..
أهلا و سهلا و مرحبا .. بجميع الأخوان و الأخوات ..
تحية طيبة لكم .. و بعد

.
.

بداية أبارك لكم .. هذه الخيرات ..
جعلها الله سقيا رحمة ..

.
.

(سأخلع ثوب اللغة العربية الفصحى .. و سأرتدي لغة الشارع القصيمي )

.
.

قبل حلول عيد الأضحى .. جيت للبيت بعد صلاة العصر كالعادة عشان "أحتسي القهوة"مع الأهل و الأخوان و الـ"بزران" ..
فتحت باب البيت .. و مادريت إلا و أختي الصغيرة .. "5سنوات فقط لا تبلشوننا" .. جالسه تحترين بالحوش ..
يوم مريت من عنده أمر تعلق بي .. و تقول ودنا للسوق ..
و أنا ما لي خلق السوق و خاصة في وقت الأعياد .. أوووف يجين تشنج عصبي و أنا بشارع الصناعة بذيك الزحمة ..
المهم .. سألته وش تبين أنتي بعد من السوق .. <== متليع له أسبوع و هو مداوم بالسوق مع هالحريم ..

قالت : أبشري لي كنادر (موفيات) و شباصات ..
وش حيث (رهف) تشري كنادر جديدات و أنا لا ..

عاد أنا .. أحبه قووه أختي ذي و لا أقدر أرفض له طلب ..
حاولت به أنه تهون و قلت أبعطيس خمس تريل و لا تشرين كنادر جديد .. بس ماش ما رضت ..

مابه إلا اللي به .. أمش للسوق يا أبو خالد ..
شلته و ركبته بالسيارة .. و شغلنا و مشينا على بركة الله ..
طبعاً .. ما فيش سواليف فقمت و شغلت شريط (المقناص) <== يقاله طير .. و هو راكب كامري هع ..

.
.

عاد أنا جلست أهوجس .. من وين أشتري له ؟

النخيل بلاز .. لا لا .. غالين و ذي بزره ميب عارفه الزين من الشين ..
العثيم .. أمم لا لا .. يحوم السبد بضاعتهم ..
سامرة .. أمم سامره زينه بس زحمة و لانب لاقي موقف للموتر ..

.
.

قلت ما لك إلا خشمك لو هو عوج .. رح للسوق الداخلي بس ..
قبة رشيد .. به كنادر العالم كله موب بس كنادر هالبصوه اللي أبلشتنا ..

.
.

مشيت مع طريق القناة .. يوم وقفت عند الإشارة الخماسية اللي عند مستوصف العجاجي لطب الأسنان .. لفيت من عنده يسار .. يعني نزلت مع الشارع اللي كله مناجر .. و بعد المناجر يجين خياطين ..

أمر تجين إشارة و ألف من عنده يمين .. و يعني دخلت حدود الحي الراقي (حي العجيبة) .. و أشوف علي يساري مكتوب بالجدار .. (ابتسم فأنت في حي العجيبة) قلت خير إن شاء الله الحين أببتسم ..

.
.

المهم ..يوم مشيت شوي .. و أشوف ذيك الكتبه اللي على الجدار على يدي اليمين ..
كتبه غريبة شوي ..
رجعت لمه مره ثانيه .. و جلست أناظره شوي ..
أول مره أقرأ شيء صح مكتوب على جدار ..
بالعادة تلقى واحد كاتب (ابو حمد بطل العالم) و هو أذرق واحد ..
و إلا واحد تلقاه كاتب (فاقد حنان) و هو فاقدن كل شيء موب بس الحنان ..

المهم .. نرجع لسالفتنا ..
لقيت مكتوب على الجدار عبارة قوية شوي .. بس عبارة صحيحة ..
وقفت و طلعت الكاميرا .. و أخذت له صورة ..
تقول الصورة :




(إرهابي العود عزازي)

و الآن .. سوف أخلع ثوب اللغة العامية و سأرتدي قميص اللغة العربية الفصحى مرة أخرى ..

.
.

هكذا كانت مكتوب على بقايا ذالكم الجدار ..
(إرهابي العود)

نحن اعتدنا أن الإرهاب صفة متلازمة مع صنف معين من المجتمع ..

أما على هذا الجدار .. فلقد كـُـتب شيء مغاير للعادة ..

.
.

و أنا أريد أن آخذ أرائكم و إضافاتكم .. على هذه النقطة ..

(هل المغنيين .. يدخلون ضمن فئة "الإرهابيين" كما وصفهم كاتب العبارة أم لا ؟)

و في كلا الحالتين .. أتمنى أن نقرأ تبريراتكم .. و عدم الاكتفاء بالحكم فقط ..

.
.



و السلام عليكم ورحمة الله وبركاته

أخوكم
بريماكس