[نبع الحنان]

هذا أمر من الأمور المهمة ، سوف أتكلم عنه بلغتنا الدارجة لكي تكون مفهومة :-
في يوم من الأيام جيت لم البيت ، قبل ما أوصل مريت بحي الصفراء ، وتحديداً من عند دوار المصحف ودوار الإمارة الجديدة إلى دوار النافورة ، أووووووه وش لقيت ، والله يا عالم تدور بذاك المكان ، سيارات وأنوار وبواري وشباب فاضين ، تقولون هذا شيء عادي ، أقول يمكن يكون عادي بالأوقات العادية مثل المغرب وبعد صلاة العشاء ، أقول يمكن عادي ( عادي وإلا توماتيك )….
بس أنا يوم أمر تدرون كم الوقت ؟ وأي يوم ؟ ، يا ليت مثلاً ليلة الخميس أو الجمعة ، يمكن نقول عادي ( عادي وإلا زنجبيل)….
يوم أمر مريت يوم الأحد في تمام الساعة الثانية وتسع وأربعين دقيقة وخمس وثلاثين ثانية وست لحظات <- - - - إقاله ساعة المنتدى….
يعني الليلة ليلة دراسة أو عمل والساعة ساعة متأخرة مرّه ، أنا ( وأعوذ بالله من كلمة أنا ) أنا ما فسّرت هذا إلا تفسير واحد ، وهو إن أغلب الشباب اللي يدورون عطلاء ، يعني عاطلين ، بالمختصر المفيد ما عندهم عمل ، إن لم يكن كلهم .
يا رجل لو كنت عاطل ، أنا مادري ليش تزيد عطالك بالدواران رايح جاي بدون فايده ، لو كنت خريج ثانوي وما قبلك الجامعة ، لا تجلس كذا بدون فايده ، دوّر لك على عمل دور على شغل أي شيء ، ترا أي شغل مهب عيب أبدً…
يا أخي إلى متى يكد عليك أبوك ( معليش ) أنا ما أقول لا تعتمد على أبوك أبداً ، وتسهجه ولا تناظره ، لالالالالا ، بس أقول ما فيه مانع إنك تصرف على نفسك شوي ، ومثلاً إذا بغوا الشباب قطيّه ، على طول تقط بدون سلف من فلان أو علان ، الظاهر فاهمين…
ومثل ذلك إذا كنت خريج جامعة ، دور على شغل إلى ما ييسر الله لك تعيين أو وظيفة…
تصدقون يا شباب إني أعرف ناس إشتغلوا بمحلات ، يا محاسب للزباين أو يصفف كراتين أو غيره ، بعد كم سنة فتحوا محلات خاصه لهم أو يملكون المحلات نفسها لهم ، ما تدري ترا كل شيء يسير…
إلى متى نعتمد على أحد يوظفنا أو يكد علينا ، أنت مانتب باتل صغير وعمرك 16 أو 18 سنة ، أنت تبي تكبر وعمرك يبي يتعدى 22 سنة ، وترا وراك عرس..( إحم إحم وراكم كلكم تناظرون لم الشاشة وتقاطر سعابيلكم؟ ) ، أقول وراك عرس وعيال وولد وتلد.. ( أقول على طاري العرس ما خبرتوا لي زوجة سنعه ؟؟؟ )…
أقول حاول إنك تضبط أمورك من الحين وتجمع الدراهم علشان ترتاح بعدين بالحضن الدافئ ( متي يجي هاليوم؟؟ )…
والله يا شباب ما كتبت هذا إلا إني أحبكم ( بدا الكذب ) وأبيلكم الخير والشيء الزين ( والله إني مصري )…
والمعذرة يا شباب على الإطالة والأسلوب الركيك ، واللي بقلبي ما نزلته كله ، هذا بعضه ( راعي طويله ) وشكراً لكم على تحملي وقراءة هذا الموضوع ، علشان تقاسموني همومي وأحزاني ، والمعذرة مره ثانية .
-0-0-0-0-0-0-0-00—0-0-0-0-0-0-0-0
* ملاحظة :- يمكن تقولون وش جابك ذيك الساعة المتأخرة ، الحقيقة إني جاي من المستشفى ، ولا تخافون مابي شيء ماغير شوي دلع…(صرفها)…
-0-0-0-0-0-0-00—00—00-0-0-0-0—0
وشكراً لكم وتقبلوا تحياتي
مع تمنياتي لكم بالتوفيق والنجاح
مدرس المادة
نبع الحنان