 |
|
|
|
|
19-10-2006, 03:20 PM
|
#1 |
|
عـضـو
تاريخ التسجيل: Mar 2003
المشاركات: 1,871
|
تغيير جو(أطايب بريدة سيتي)طريقة طبخ اللحم بالكاتم(بدون ماء)وتسمى بـعرق اللحم(صور)
السلام عليكم ورحمة الله وبركاته
. . . حيالله الشباب والشابات الطباخين والطباخات :D اليوم بسويلكم نكبة #@!@#$@# قصدي طبخة  تعرفون إن أخونا الحاتمي أبومحمد المستشار طالب وطالب بفتح منتدى للمكاشيت .. بس يقولون إن المدير صاك ع المعاملة حقته في درج المحذوفات :D قلت والله ماله إلا اخوياه وقت الشايد ...  قلت له لبييييييييييك يا بومحمد وأمتطيت خيلتي الكميرة وسليت القدر من غمد رف من رفوف المطبخ :D وقلت له :- خذني يمينك وقت ميلات الأزمان = وإلا الرخى ياكثر الأصحاب من حولك ^ ^ ^ إي هين بس دن هناااااااااااك  << أبومحمد  المهم ... نرجع لموضوعنا  ...حنا وش كنا نقول .؟  إيه الذيب والله مير ياكله <<< لا تقلد يالدب الجنوبي  سم سم أنا سمعت إن فيه طبخة أسمها عرق اللحم .. يعني طبخ اللحم من ماء اللحم الموجود فيه ... وقلت جايبها جايبها .. وأنا الحمدلله ما أسمع عن شي إلا وأصلحه بالبيت .. <<< طبعاً لا تسألوني عن أهلي وش يصير عليهم المهم ... قلت أبطبخه وأجربها ع السحور  <<< ناوي يفطرهم بالمستشفى وجربتها وجت معي مضبووووووووطه من أول طبخة ولله الحمد .. <<< طبعاً ماحطيتها ع السفرة إلا قبل الأذان بخمس دقايق  وقلت الحين بسويها للمرة الثانية علشان أصورها لكم وتجربونها وتدعون لي ... نبدأ.؟؟ << تكفى أبولجين بلا نكبات  لا تخافون .. تبي تشوفون طبخي بالصور ... يعني مب واصلكم الإنفجار لو صار :D بسم الله نبدأ المقادير ( كاتم , قدر عادي صغير للرز ( لأنه لحاله ) , لحم , رز , بصل , زيت , ملح , بهارات , زبدة المراعي أو أي شي غير دنماركي , وصلصة طماطم حسب الرغبة ( أنا ما حطيته ) , وأي شي تريدونه ) <<< مقاضي بيت هذي مب أغراض طبخ يالله نبدأ بالصورة الأولى وهي للأغراض قبل كل شيء (  ). . . نبدأ الآن نشرح اللحم ( علشان يتخلله الحرارة وينهرس أكثر )(  ). . . نحط البصل واللحم والبهارات والملح ( وقليل من الزيت ) كما في الصورة (  ). . . نكتم القدر ونخليه على نار هادئة جداً لمدة دقيقتين ومن ثم يرفع عليها قليلاً حتى يسمع للصافرة صوت ( دون تشتشه ) ولا مانع من فحطة صفيرة .. يعني لو دارت شوي مب مشكلة << مسكنا على خط فصيح ولا عامي سم سم المهم .. أول ما يسمع للصفيرة صوت نحسب له ساعة كاملة ( علشان يروح وطي اللحم ويطير مويته ويكون مثل حميسة لحم ) وناظر الساعة وين كانت عند التصفير  <<< يبي يوريكم ساعته هالهلاس تراها بعشر تريل (  ). . . وبعد مرور ساعة كاملة كما نرى (  ). . . نقول بسم الله ونفتح .؟ قبل ما نفتح ... وش تتوقعون يبي يكون شكل اللحم .؟  تتوقعونه محترق .؟ ولا فيه حرق .؟  إنزل وشف . . . . . . (  ). . . طيب الحين شفنا الصورة ... يبي يقول بعض الشباب أكيد إنه محترق ولو شوي ... علشان تسذا أنا مولم صورة للعذال تثبت عدم وجود حرق << لا تتركنا يا طباخ الرومنسية :D (  ). . . الحين اللحم جاهز ... اللرز وش صار عليه .؟  أنا أقولكم ... يطبخ عادي بقدر لحاله ... ويحط له بهاراته وملحه وزبدته الصغيرة وقليل من الزيت ويطبخ عادي بحيث ينتهي مع إنتهاء اللحم ... يعني تقريبا ربع ساعة أو ثلث ساعة قبل لا يتم ساعة ع اللحم ... ( اللي ما يعرف طريقة طبخ اللرز يقولي وأشرح له الطريقة بإذن الله ) (  ). . . وعند إنتهاء كل شيء .. يكون كذلك (  ). . . النتيجة .. نتركها لكم (  ) يالله .. جرب حظك بس لا أوصيك بعدة نقاط ...!! 1- أقرأ المعوذات :D <<< علشان ما يجيك شي همن أبلش 2- لا تقول لأهلك إنك ماخذ الوصفة من أبولجين <<< تعرف السمعة دمار والسوابق شواهد 3- لا تنسى تفك الصفيرة قبل لا تفتح القدر ... حفاظاً ع الشنب لا يطير :D وبالهناء والعافية  ملاحظة : عند الطبخ .. يخرج ماء من اللحم .. وهو كثير لحد أنه يغطي تقريباً ع اللحم ولكنه سرعان ما يذهب ... لذلك اللي يبي يكبس الرز ع اللحم .. يخلي الطبخ نصف ساعة للحم ومن بعدها يفتش القدر ويكبس اللرز عليه بعد ما ينقع ساعتين ويطبخ طبخ عادي لأن الماء موجود . أطايب بريدة سيتي الشيف أبولجين 
__________________
 اللهم أنت ربي
إلى مــن تكلـــني إلى بعــــيدٍ يتجـــهمني ام إلى عـــدوٍ ملــكته أمـــري إن لم يكن بك غضبٌ علي فلا أبالي غـيـــر أن عــافــيـتـك هـــي أوســع لـــي |
|
|
| الإشارات المرجعية |
|
|
النمط الأحادي