[فرخ البعير]

السلام عليكم ورحمة الله

تصدقون ودي اتطوع مادري فيني احساس يختلج وسط صدري يحسسني بالنقص اذا شفت بعض المطاوعة أحس أنهم رزة وفيهم نقاء عجيب ومو طبيعي وصح بعد ريحتهم يؤؤؤؤؤ بجد اذا سلمت عليه وقعدت تحبه يعني تبوسه على قولة راعين التبويس ماودك تفكه من ريحة الدخون والعود والحركات هذي من زين ريحته ودك تجلس ( خامها ) يعني بحكيكم ( ضامها ) ساعة ولا ثنتين

بجد ريحتهم مو مثل ريحة ( فاهم غلط ولا ابو وسميه ) من خوياي ماتعرفونهم ياريحة دخان يافكس الله يقرفهم

وطبعاً مو كل المطاوعه لان فيه بعضهم كنه ماخذ الدين غصيبه نفسه شينه ووجهه يجيب المرض تحس انه انواع العقد او مايشوف شخص على خطاء حتى لوهو بزر نط في حلقه ياكافر عليك لعنة الله

المــــهمـ

ذاك اليوم كان يوم خميس وكنت نايم بعد صلاة الفجر تقريباً الساعة سته ونص سهره انترنتيه مليئه بالاحداث السلبية والقليل من الايجابية

الزبدة اني ختمت اعمالي ذيك الليله بصلاة الفجر وعينت خير ونمت الساعه تسع ونص الصبح صحيت من النوم

ماصار لي ثلاث ساعات نايم لكن تعرفون اخوكم ذيب في بعض الاحيان فقط واكثر الايام خروف سعودي على كيفكم

المهم نزلت بالمجلس الا الوالده ( رضي الله عنها ) مضبطه الجو الرومانصصصي من دفايه الى القدوع اللي يحبه قلب من يسمع والدلة الصفراء اللي ريحة الهيل اللي جايه منها كنها تقول اجغمني ياشيخ ولا ريق حوريه من حوريات المحيط الهادي ( لاحد يدقق ترى اخوكم ماعندك احد ) (( على فكرة سبب ذهابي لمجلس الوالدة يمكن يكون تهرب عن المعزبه تعرفون عندنا في حايل برد مررره ))

ايووووهـ نكمل

يوم جيت عند امي ( رضي الله عنها ) قدعت من التمر وتقهويت وتمددت عند الدفاية وحطيت راسي على رجل امي وبدون ما اقول شي هي تدري اني ابيها تقعد تدور قمل وصيبان براسي قعدت الوالده تلعب بشعراتي شعرات بعضهم على غفلة هن ثنتين بس

وقاعد اطقطق بجوالي الا فيه مقطع صوتي لشاهر الذرفي يقراء سورة الانفطار . بنفس واحد يعني يقراها بدون ماياخذ نفس طبعاً سامعها من قبل بس قلت اسمعه من جديد المهم تعرفون الجو برد وخام الدفايه وامي تلعب بشعري وتعبان من سهرةالليل ولا نمت زين شغلت المقطع وبعد مابدا ... كنت مقفل عيوني بصراحة كاني اول مره اسمع المقطع مع اني سمعته كثير وكان السورة تمر علي لاول مرة مع اني كثير قاريها ومار عليها .... كنت لحظتها اشعر فيها

اعيش جوها الروحاني ... قعدت اسمعه واكرره اكثر من مره

بصراحة ينتابك شعور غريب شعور التقصير في حق الخالق عز وجل

تحس باللهفة للجنة ... والخوف من العقاب والنار ... تفكر بالقبر وبسكرة الموت وبكل شي

المهم قعدت افكر وش يردني ما اصير مطوع !!!

دام اني احبهم ودايم اروح واجي معهم وش يردني ما اخربها واطوع

^

جعلي للصلاح اجل بخربها واطوع امحق من تخريبه

وكل ماحاولت اتعمق بالتفكير اني اصير مطوع اهنق مادري ليش واعلق وكل شوي اسوي لنفسي ctrl+alt+delete ومافي فايده اسويها مره ثانيه وثالثه ولازلت مهنق ومتعلق من قوة الفكره ويالله اسوي لنفسي اعادة تشغيل ..

تكررت المحاولات وتكررت التهنيقات واعادة التشغيل وفالنهايه ماهنقت وتعمقت بالتفكير بموضوع التطويعة

بصراحه

قعد افكر طيب لو طوعت شلون اجلس مع الشباب بالاستراحة ؟؟ وهم راعين وناسه وطرب وفلة حجاج !!!

اسد اذاني ولا زرافه اذاني

^

ماعليش قسم اني مالغ

وكيف اقدر اتابع الافلام الامريكيه والعربية وخصوصاً عشقي الازلي اذا تلاقوا الحبيب بحبيبته وجت الميوزك الكلاسيك

وكيف اقدر اخذ زقاره اذا كان ذاك اليوم غيم ومطر وحنيت للدخان ... ولا ملل وزهق وجت ببالي الزقارة .. طيب هذي نعديها

المطاوعة شلتي الجديده ( بعد ما اطوع ) يلعبون ورقه ( شده ) بالحلقات ؟؟ يؤؤؤؤ طيب اذا مايلعبون وين العب ورقه ؟؟ طيب نتحمل الورقه طيب خوياتي بالماسنجر وبالبالتوك وش اسوي معهم اتركهم ؟؟ ومن معه اقعد اسولف ؟ مع فاهم وابو وسميه وابو خيشه وطقتهم !!!وووع

طيب والمنتدى !!! ارد على البنات ولا ما ارد ؟

<= مثله مثل غيره يحس الدين تعقيد

طيب وبالشارع البس رياضه ولا حرام ؟؟ طيب....) كثرت الاسأله براسي

وكثرت الاستفهامات

ويوم تذكرت حمد وحمود وخالد وسعود وعبدالله وعبيد

من اصدقائنا اللي هداهم الله والتزموا

عرفت انهم عرفوا الدرب الصح

تغيرت حياتهم تحسنت صحتهم نورت وجيههم ( الواحد وجهه كنه شمس )

العبوس صار ابتسامه

والضياع صار استقامة

يالله لاتذوقنا العذاب بيوم القيامة

وحنا لازلنا يوم طفش ويوم ملل ويوم ملل ويوم طفش متنحات مع بعض ..

ادري انشاءالله ان فينا خير ونخاف الله ونصلي لكن اتمنى من كل قلبي لي ولكم الهدايه الكامله ادعولي اصير مطوع يالبا قلوب راعين الماسنجرات وقسم لا اوزع عليكم مساويك واشرطه ودهن اوووووود 

ظهورهن لاعدمتكم ...

من احداث المبارة :



1- الجلسة مع امك فيها من الخير الكثير على الاقل بتلقى الدفىء وقهوة ولعب بالشعر .

2 – الملتزمين يتمتعون بمظهر جميل ونظيف واطلاله رائعه .

3- قراءة القران او الاستماع له تساعد العاصي على التوبه والعودة لدرب الحق .

4 – الاعتقاد السائد هو ان الالتزام فيه حرمان من السعادة مع ان العكس صحيح .

5- هالتساؤلات تمر على الكثير والكثير اذاً فالامر خطير

6- لازال محدثكم يعيش الصراع الازلي مع النفس . دعواتكم له بالهداية







رحمه الله ووالديه وكل ابوكم معه


ملاحظه الموضوع منقول لكونه جميل الاداء والاسلوب