[الصباخ]

في يوم من الأيام وفي ليلة من الليالي ، طبعاً هذي الليلة كنت توي جاي من بريدة ، يعني يوم الجمعة ليلة السبت ، المهم أنا وصلت بالسلامة إلى الرياض على أذان المغرب ، طبعاً فيه سالفة صارت لي بالطريق أقوله لكم بعدين ، المهم صليت المغرب ، ورتبت أغراضي وانتهيت ، أخذت جوالي واتصلت على خويي ، ودار الحوار التالي:
أنا: السلام عليكم .
خويي: وعليكم السلام .
أنا: كيف الحال يا ألبي ؟؟
خويي: الحمدلله بخير ، نقول الحمدلله على السلامة .
أنا: الله يسلمك ، هاه لي شوي واصل للرياض ، وش عندك الحين ؟
خويي: أنا بالبيت ، بس وش تبي؟
أنا: أبمرك الحين .
خويي:الحين تمرن !!
أنا: إيه .
خويي: طيب وشوله؟؟
أنا: اذا جيت قلت لك .
خويي: خلاص طيب .
أنا: زين مسافة الطريق وأجيك .
خويي: خلاص طيب ، أبنتظرك .
أنا: مع السلامة .
خويي: مع السلامة .

وصلت لخويي ، واتصلت عليه وطلع لي ، قلت له أني بروح لمكتبة جرير ، عندي كم كتاب أبيهن من المكتبة ، مشينا ووصلنا مكتبة جرير مع أذان العشاء ، دورنا أقرب مسجد وصلينا العشاء ورجعنا للمكتبة ، المهم الحين يجي المهم والزبدة من الموضوع كله :D ، وصلنا للمكتبة وقفت السيارة ونزلنا ، ويوم جينا ندخل للمكتبة شفت شيء غريب ، بصراحة أول مرة أشوفه ، شفت امرأة لابسة عباة اللي تسمى عباة الفراشة ، فيها بعض النقوش الإسلامية ، وبعض الزخارف على الأكمام ، وفي الظهر مرسومة صورة فراشة ، بصراحة صورة الفراشة حلوة هالصورة ، والطرحة فيها بعض الرسومات والحركتات ، ولابسة برقع ، والعيون عسليات [كلاك يقاله شايفن العيون] وتشوف حول العين أنواع البياض ، تعرفون تبي تخقق هالشباب الفارغين ، طبعاً موب زيي ، بس الغريب من الموضوع كله ، أنه لابسة قفازات !!
استغربت من هالشيء ، كل ذولي لابستهن وبآخر شيء لابسة قفازات !!
الحين يجيكم المتزن يمشي مليون ويقول ياخي من قال إن عباة الفراشة حرام ؟؟
تراي يالمتزن ماقلت أنه حرام :D ، بس المشايخ يقولون أنه حرام ، وأنا ماعندي نية أجتهد بالموضوع زيك .
المهم ، أنا ابتسمت ومشيت ، بس ماش الموضوع لاحسن مخي ، للحين مافهمت ليش مسوية هي كذا ، قلت مالي إلا أبوفلان [طبعاً موب اسمه أبوفلان ، بس هو مايبي أقول اسمه بالموضوع ، طبعاً أنا اتصلت عليه قبل ما اكتب الموضوع ، وقلت له تراي بحطك بالموضوع ، قالي مابيك تحطن بالموضوع، قلت من حقك ، قال حريتي الشخصية] طبعاً خويي أبوفلان هذا ، تراه مطوع وإنسان متزن (موب المتزن خوينا الملحوس) ، هذا خويي أبوفلان متزن بعقليته وأفكاره المهم ، اتصلت عليه وصار هالكلام بيننا :
أنا: السلام عليكم ورحمة الله .
أبوفلان: وعليكم السلام .
أنا: واذا حييتم بتحية فيحوا بمثلها أو أحسن منها .
أبوفلان: ياعيني على العلم اللي عندك يا أبوريم .
أنا: توك تدري أني فاهم .
أبوفلان: هاه وينك ، نشوفك الحين ؟
أنا: لا مقدر ، أنا الحين بالرياض ، رحت من بريدة .
أبوفلان: الحمدلله على السلامة .
أنا: الله يسلمك ، أبوفلان ياخي أنا شفت شيء غريب قبل شوي !!
أبوفلان: وشو !! عسى ماشر ؟
أنا: أنا توي داخل مكتبة جرير ، وشفت شيء غريب !!
أبوفلان: اللي ببريدة !!
أنا: لا ياغبي ، موب توي قايل لك أني بالرياض .
أبوفلان: طيب لا تقول ياغبي .
أنا: إلا غبي ونص ، ما لنا نص دقيقة ، أمداك تنسى !!
أبوفلان: طيب لا تقول غبي ، تراك تجرح مشاعري !!
أنا: ياعيني على المشاعر ، ومن متى صايرن لك مشاعر ؟؟
أبوفلان: من اليوم ، ياخي لازم تحس بالرومانسية ، والعطف والحنان ، لازم تعيش جو الحياة بحلوها ومرها ، لازم تعيش الحياة بشقائها وسعادتها .
أنا: توك قاري كتاب كليلة ودمنة !! <=== والله ياهي ماله دخل .
أبوفلان: لا توي قاري شعر نزار قباني ، وصرت أحب !!
أنا: خخخخخخخخخخخخخخخخخ ، والله يا أنت خبل ستات .
أبوفلان: ياخي ارفع من معنوياتي ، خلن أحس إني إنسان شاعري .
أنا: ياخي ماتليق عليك ، أنت رجال ، ولازم تصير زيي رجال ، واذا فكرت بهالخرابيط ، تبي تصير صدق غبي ودلخ ، وأبجي لبريدة وأبسطرك علشان يرجع عقلك .
أبوفلان: وأنت على طول غبي تصدق قل شيء ، أنا أبختبرك ، بس طلعت ماشاء الله عليك ، ونعم الصديق هههههههههههه .
أنا: طيب لا تقول غبي .
أبوفلان: العين بالعين ، والسن بالسن ، والبادي أظلم .
أنا: طيب متعادلين الحين .
أبوفلان: طيب اخلص علينا ، تراك ضيعت وقتي ، وش عندك .
أنا: طيب طيب ، المهم يوم دخلت مكتبة جرير اللي بالرياض ، شفت شيء عجيب شفت ...
أبوفلان: وش شفت ؟؟
أنا: ياخي انثبر خلن أكمل كلامي وراك عجل !!
أبوفلان: طيب طيب ، ابسكت .
أنا: المهم ، شفت شيء عجيب ، شفت امرأة لابسة عباة الفراشة ، تعرف عباة الفراشة ؟؟
أبوفلان: إيه ، وش شايفن !! عايشن بالعصر الحجري أنا ؟؟
أنا: طيب زين أنك تعرفه ، المهم ، لابسة عباة الفراشة ، وعليه بعض الزخارف الإسلامية :D وبعض النقوش الجميلة في الأكمام ، وفيها صورة فراشة بالظهر ، بصراحة أحسن شيء صورة هالفراشة ، وأزيدك من الشعر بيت ، لابسة برقع نص وجهه طالع ، والعيون تاخذ العقل .. استغفر الله ، اللهم لا تفتنا بهالأشكال ، المهم وتشوف حول العيون أنواع البياض ، بس المشكلة ياأبوفلان ، أنه لابسة قفازات ..
أبوفلان: لابستن قفازات !!
أنا: إيه ، تخيلت كل هاللبس ولابستن قفازات !!
أبوفلان: خخخخخخخخخخخخخخخخخخخخخخخخخخخخخخ ، والله ياأنت قطعت بطني من الضحك ، أنت ماتدري وش الحين يسمى ذا !!
أنا: لا ، لو أدري ماكان اتصلت عليك .
أبوفلان: هذا طال عمرك يا أبوريم ، يسمى مكياج السوق .
أنا: وش معناة مكياج السوق ؟؟
أبوفلان: مكياج السوق يعني : أن البنت تطلع سمراء قوة ، أو عبدة ، وتلبس عباة تخقق به هالشباب ، بس المشكلة لو يدرون أنه عبدة محد ناظره ، فاخترعوا مكياج اسمه مكياج السوق ، هالمكياج يعمل على أنه يبيض المنطقة حول العيون والخدود وبعض أجزاء من الوجه ، يعني تلبس برقع وتخقق بعيونه هالشباب ، ولو يشوفون خشته كان تطلع العنز حقت جارنا أبوحمد أملح منه ، بس المشكلة بالإيدين ، يعني لو يشوفون إيدينه كان يكتشفون أنه عبدة ، فماله إلا أنه تلبس كم طويل ، أو إنه تلبس قفازات ، بس أكثرهن يلبسن قفازات ، لأن الكم الطويل يمكن يبين اليد عند المحاسبة أو غيره .
أنا: اها يعني الحين هي مسوية مكياج السوق هالعبدة ، يعني هالمرأة طلعت تكرونية .
أبوفلان: نعم وبلاشك ، بس أنت تدري أنه لو تطلع مصلوخه محد ناظره هههههههههه .
أنا: خخخخخخخخخخخخخخخخخخخخخخخخخخخخخخ ياخي ودي أروح له وأقوله يالعبدة محد يبي يناظرك هع هع .
أبوفلان: لا ، أنا عندي لك فكرة أحسن من ذي .
أنا: وش هالفكرة يا أبوالأفكار ؟؟
أبوفلان: أبعطيك رقم ، أنت خذ هالرقم وسجله بورقة ورح عطه إياه ، هالرقم طال عمـ...
أنا: وشو !! خبل أنت ؟؟ تبي تفسدن ؟؟ تبين أرقم بنت ؟؟
أبوفلان: ياخي لا تصير غبي وتفهم النصوص على ظاهرها زي المتزن خوينا اللي بالمنتدى ، وإلا تاخذ كلمتين اللي يعجبنك زي ابن دواس وتجي تزعجن ، ياخي خلن أكمل كلامي وبعدين رد علي .
أنا: طيب طيب ، كمل كلامك .
أبوفلان: هالرقم ياعزيزي يا أبوريم ، هو رقم مغسلة الموتى بجامع الراجحي .
أنا: وشوله أعطيه رقم مغسلة الموتى ؟
أبوفلان: علشان تتعض :D .
أنا: صادق أنت ؟
أبوفلان: لا أمزح معك ، لا تصدق الحين وتروح له وتعطيه الرقم .
أنا: وأنت مصدق أني بروح أرقم بنت ، هذا شيء حرام ولو أسويه ربي يحطن بالنار ، بعدين أنت ماتدري أنه كما تدين تدان .
أبوفلان: أنت تدري لو المتزن سمعك تقول حرام ومن هالكلام ، جاك يمشي مليون ، وقال من يقول أن اللي يكلم بنت حرام وبدأ يفغي راسك بفلسفته الباخيه اللي ماله سنع ، اللي كله كلام فارغ وخرابيط .
أنا: وش دخل المتزن بالموضوع الحين ؟
أبوفلان: لا بس جاء على بالي .
أنا: اها ، أجل جاء على بالك :D .
أبوفلان: المهم ماعلينا من المتزن أو غيره ، أنت غض البصر ، واشتر اللي تبي ، وماعليك من هالخرابيط .
أنا: إن شاء الله ، والله يجزاك خير على هيك معلومات يا أبوفلان .
أبوفلان: الله يسلمك .
أنا: مع السلامة .
أبوفلان: مع السلامة .

وقفلت السماعة ، وأنا أضحك ، وخويي يسألن وش صار ، وقصيت عليه كل السالفة ، وضحك معي ، المهم رحنا وشريت الكتب اللي أبيه ، وحاسبنا ورحنا للبيت .

انتهت القصة .

طبعاً هالقصة حصلت لي أنا ، وأنا اللي قصيته وكتبته بتصرف وبهرت شويات فيها ، يعني اللي يبي ينسخ القصة بمنتدى ثاني ، تراي مانيب سامحن له ، لين يستأذن مني وأسمح له ، وترى حقوق النسخ والطبع والكتابة محفوظة لي أنا وبس .

وكعادتي المستمرة في كل موضوع أو رد .


ودمتم سالمين ،،