[القصيمي البحت]

بسم الله الرحمن الرحيم
والله تذكرت يوم الجمعة الفائت ( أمس ) 7 /6 /1423 هـ قول الخنساء رحمها الله

ولولا كثرة الباكين حولي على إخوانهم لقتلت نفسي

يا جماعة وش السالفة يوم الجمعة العصر قدر الله تعالى علي وطلعت من القصيم للشرقية وياليتي ما عقبت القصيم تقول وش السبب خذ السبب

توي أنا آخذ الخط السريع من عند امتداد الدائري الغربي ( اللي يروح لعنيزة ) وإذا ذيك الدوريات وقف وهات الرخصة والاستمارة طيب ليش ؟؟؟؟ بس هاته وكان شكل الشرطي والله ما أزيد عليكم كذا قلت طيب وسم ، ويوم أخذه قال لي لبق ( صفط ) ( أركن ) خذوا اللي يصلح لكم ، ويم وصلت والجماعة يا كثرهم عنده ( مهب العادة يوقفون هنا ) وهات يقسايم ( لكن الشهادة لله تعالى الرجال اللي كتب لنا القسيمة عيا يكمل القسيمة إلا إذا عرف كم نمشي وراح للي على الجهاز وسأل عني وعن بقية رفاق الطريق وسجلها بالضبط ( كأنه فيه فرق ) يمكن أنا مسرع شوي بس و الله وما لكم علي يمين إنهم عطو مخالفات للي يمشي ( 130 كيلومتر بالساعة ) فقط لا غير
وتدري وش اللي يقهرك إنهم يقولون ذا لمصلحتك طيب ليش تتصيدون وما تعلمون الرجال وش به هات الرخصة وبس المهم أخذنا قسيمة وتوكلنا على الله وعلى الرياض و الدعوى ما شية ثم على طريق الشرقية وإذا الربع جزاهم الله خير ( يكبسون بالنور ) وعاد هات تدوير بالطريق وشلون تلقى دورية المرور اللي ( متغبية ) المهم لقيناهم ووقفوني قبل الدمام بحوالي 150 يعني بعد جودة بشوي للي يعرف الطريق المهم والله إن الله عافان ولقيت شباب ناشبين في حلوق اللي يكتب القسايم طبعا الكلام كان بالليل يعني يولعون النور عليك وجاك سيارة زرقاء وإلا بيضاء مسرعة المهم الشباب ناشبين فيه إننا ما أسرعنا ووالله ما تجاوزنا مية وأربعين وأنتم تقولون إنك تمشي 145 المهم الظاهر إن الرجال راعي المرور متوهق والربع ناشبيين فيه يقولون إذا صادق خله يعلمك كم رقم اللوحة مو إي سيارة تمر تسجيل مخالفة كل هذا وأنا واقف بالطريق ويوم شاف الرجال إن الدعوى مهب مخلصة قال لي رح رح أنا رحت لكن لما هو شر وأبقى قبل الدمام ب 30 كلم واقف ذيك الشنبات ومثل سالفة ربع القصيم هات وخذ ولا أحم ولا دستور ولا وراك ولا قدامك ويوم قلت للرجال اللي كتب لي القسيمة وش بلاكم علينا ؟؟؟ والله ما زاد على قولته ( النظام ) وش نظامه ما أدري والله لكن هذا كان أوسع ذمة من حق القصيم ما سأل كم أمشي ولا شي سجل سرعة وبس .
سؤال بري جدا :
1 ) لو تروح للمرور وتقول إني ما أسرعت والربع اللي سجلوا مخطين ( يشلونه عنك ) ؟؟؟
2 ) في القسيمة توقيع للمخالف ورء ما يخلونك توقع ؟؟؟ أو يجوز العرس بلا حنا دافع دافع وقعت أو ما وقعت ؟؟؟
3 ) تدرون والله ينا منقهر وبزود
وما أقول إلا حسبي الله عليهم .
4 ) أخيرا وش يستفيد هاللي شابين على العالم قسايم ؟؟؟؟ ويقولون لمصلحتكم ؟؟؟

ملاحظة أخيرة منذ سنوات أول مرة أشوف أمن الطرق واقفين بالطريق السريع اللي بين عنيزة و بريدة والله على ما أقول شهيد ( مرة فيه إبل سايبة واتصلت على ( 996 ) وقلت لهم ، قالوا ما نغطي ذيك المنطقة هذي تبع الشرطة اتصل على ( 999 ) قلت طيب وما تم اسبوعين على هالكلام إلا لقيتهم واقفين يوزعون قسايم على العالم كاننا نمشي بحلال أبوهم علماً أنها وحدة أمن طريق عنيزة ( بدون أي مقاصد سيئة ) لكن أقول الله يجازي اللي كان السبب وجاب على نفسه بلامهب سهل يوم جمعة والعصر والناس مسافرين وهذولا يغثونهم توقعون يدعون لهم ؟؟؟؟؟؟؟

تحياتي للجميع وأرجو أن يكون في ردودكم سلوى لي مما أصابنب حتى أدمي محفظتي
السلام عليكم ورحمة الله وبركاته