[وحيد الخلان]

بما أن الموضوع عن المواقف والسواليف أذكر قبل سنتين أو اكثر في أيام الشتاء ,,


كنا مجموعة سنخيّم إلى إحدى البراري ,, وأثناء تجهيز العفش قبل التخييم بيوم بقي علينا الخيام وقيل لنا أن الخيام باستراحة بضراس ,,


المويهم >> خربت :D

مشينا بعد صلاة المغرب مباشرة كنا 3 من الشبيبة على جمس مغلّه 83 ,, ورحنا لضراس وبعد توصيف جاب لنا المر من شينه وصلنا للإستراحة المقصودة بدينا نطق الباب ونطق ,, ويظهر لينا أنه مافيش حد أستعنا بالله وقمز واحد من الشبيبة على الاستراحة وفتح دخلنا ونشوف ذيك الخرابة وندق على أبوفلان اللي تبعه الخيام ويوصف لنا مكان الخيام بالاستراحة ولا والله اننا ما نشوف شي قلنا وين طفايات النور علشان نشغلهن ,, قال أصلاً الكهرب مقطوعه ,, قلنا وشو ,, قال أننا ما سددنا الفاتورة وقطع عنا الكهرب ,, قلنا طيب والغرفة اللي به الخيام قال دوكم رقم ابوفلان وانشدوه عن المفتاح ,, ودقينا على أبوفلان : ألو .....وبعد السلام...... أبوفلان مفتاح الغرفة اللي بالاستراحة معكـ قال : إيه ,, بس تراوهـ بسيارتي وسيارتي محجوزة بحجز الموطأ لأني قاطعن اشارة وصادون الدوريات وانا هاللحين حول المليداء ,,
قلنا والحل !! قال مالكم ألا تقمزون بس انتبهوا ترا الدعوى كله غبار ,, إييييييييييه

طبعاً القمزة تتم بإزالة غطاء المكيف ثم الدخول من خلاله ,,

وقلنا مالنا ألا ندور نور وطقينا على الاستراحة اللي بجنبهم قلنا لهم السالفة كذا وكذا ونبي مصدر نور ,, >> لا يفوتكم هالمصدر

وفزع معنا هاك الرجال وعطانا كبس يشتغل على السيارة لكن فيه مشكلة ان الجمس اللي معنا راعي طفيات وإذا طفى عاد مايشتغل ألا بنتع ,,

فعطانا الرجال ذاكـ موترهـ وما قصر والله وقال أشبكوه وإذا خلصتوا عطون المفتاح انا بالاستراحه ,,

وبعد محاولات عنيفة لدخول الغرفة ,, وبحمد لله تم فتحها ,,


لكن المصيبة هنا ان الخيام غير موجوده ,,


واتصلنا على أبوفلان الأول قلنا له السالفة قال : ابتششششش ,, يمكن تلقونهن عند فلان باستراحتهم بالمريديسيه ,,

قلنا مشينا وعلى المريديسيه ,, ودخلنا الاستراحة وطلع لنا واحد تبعه أبوهم مادري أخوهم وجلسنا وحنا نفهمه يمكن 10 دقايق وصفت السالفة أنه بغى يدقنا لييش مادري وقال ماعندنا خيام ,,

ودقينا على ذا قال ارجعوا لضراس ودوروهن ثانية


ورايح جاي ورايح جاي وترددنا يمكن من ضراس للمريديسية يمكن 7مرات وبالآخير نلقى خيمة بضراس بمجلس الاستراحه والثانية بالمريديسية واللي أشغلنا زود انه كل ما بغينا نمشي لزوم ننتع هالاقشر اللي هو الجمس ويوم وصلنا حول الراشديات وقالوا تأكدوا من العمدان هن موجودات ولا لا !! واكتشفنا انه مافيه عمدان ,, وادعس للسنيدي ويالله لقينا موقف يصلح لنا للنتع ,, ورجعنا بحمد الله وسلامته رجعنا للشباب بالمسجد الساعة الـ 12.15 صباحاً ,,


وهذه من المواقف اللي عالقة بذهني >> لا تخلينا :D ,,


ونعتذر عن زود الهذر اللي حصل


وسلام عليكم