[الصباخ]

يقالك سامي الجابر .!







تدرون يا إخوان إني في يومٍ من الأيام .. وفي ليلةٍ من الليالي ..
قبل ما أروح للشباب في طلعتنا الأسبوعية اللي يوم الثلاثاء ..
كنت مار سوق تمور الربوة أنا وولد عمي ..

دخلنا السوق .. ورحنا لمحل معين ..
وصلنا المحل اللي نبيه ..
وقفت أنا وولد عمي نسولف مع راعي المحل (طبعاً راعي المحل واحدٍ نعرفه) ..
المهم وحنا نسولف ..
إلا ويجي اثنين من القناة الأولى ..
واحد مصور والثاني مقدم ..
وياقفون عند المحل اللي حنا واقفين عنده .. ويناظرون التمر ..

عاد قالهم عاد راعي المحل (خوينا) : سوو مقابلة معي .. وسوو دعاية لي ..
قال المقدم: لا ماراح نسوي معك مقابلة ..لأنك أنت راعي المحل .. وحنا نبي زبون ..
ويلتفت علي وقال: ودنا نقابل مع هذا أبونظارات ..
أنا ألتفت عليه .. وكشرت .. وصديت ..
قالي: وش فيك كشرت .!
قلت له: أنا ماحب التلفزيون ..
قالي: الحين يقالك سامي الجابر ..
أنا سكت .. لأني أكبر من أرد عليه برد ثاني ..
ويلتفت المقدم لولد عمي ويقول له: نبي نقابل معك أنت .!
قال ولد عمي: مابقى إلا هي .. أطلع على التلفزيون السعودي .. تبي تفشلن أنت .!
المقدم بصراحة استغرب من ردودنا .. سكت هو وخويه وراحوا ..
حنا أخذنا غرضنا .. وطلعنا من السوق ..
رحت لبيت ولد عمي .. وحطيته عند البيت ..
وأنا رحت للشباب في مكاننا المعهود ..




الخلاصة:
ليش التلفزيون السعودي مستحقر .!
هل حنا بس اللي مستحقرينه .!
أم بسبب ضعف مايقدمه .!
أما ماذا .!

ولماذا رد علي المقدم .. وقالي: يقالك سامي الجابر .!
مالهدف من قولته كذا .!





أترك المساحة الباقية لكم ..




كتبه الصباخ
بتاريخ 4/9/1428هـ
الموافق 17/9/2007م








ودمتم سالمين ،،