[القصيمي البحت]

بسم الله والسلام على رسول الله


السلام عليكم يا مستخدمي سيارة أوبل ولا يهون الجميع

سيارة أوبل كما تعلمون ألمانية الصنع ذات تقنية عالية ( وقد امتلكتها شركة جنرال موتورز بالشراء من الشركة الألمانية ) وأنا ممن اقتنيتها من عام ( 99 ) وأجدها سيارة في غاية الروعة


ولكن وألف لكن المشكلة في الوكيل المتعب جداً والجشع جداً .... وضع ما شئت من الصفات في هذا اليوم المبارك أسأل الله أن يغفر لي

المهم من أراد قطع الغيار فعليه بالوكيل وهو ( نار موقدة تحرقك تماماً كهذا الوجهi121 أو بالتشليح وسوف تجد أن السيارة أندر من الياقوت الأحمر في التشليح ( مالعمل إذاً confused أدلكم على تشليح في تشليح الدمام يملك ثلاث سيارات أوبل ويمكن إنه زادت الله يستر على سيارات المسلمين ( هو تشليح العقيل بالدمام لكنه من ربعنا بالقصيم الله يرزقه .

أما الخبر الثاني والأهم هو أنني فسد عندي دنمو التعبية حق البطارية ( ورحت مع أحد الأخوة للوكالة وأنا أقول له على سيبل المزح لو الدنمو ب ( 1000 ) ألف ريال أبشريه الأوبل تستاهل المهم وقفت عند الاستقبال في الدمام ونافخ ريشي يالأخو أبي دنمو للتعبية البطارية حق أوبل أوميغا 99 قال موجود :D :D :D يا فرحتي وبشر عن السعر قال لحظة شوي وقام يطقطق بالكمبيوتر ثم قال لي ( بس ب ( 3600 ) ثلاثة آلاف وستمائة ريال فقط لا غير والله ما أزيد هذا هو الرقم اللي قاللي ( وش باقي بعد ( المهم قال لي الرجال لا تخاف فيه ( دسكاوند ) يعني فاهم بالانجليزي ( يعني تخفيظ قلت هات الله يخلي لك شاربك اللي كأنه ( حظار خوص بأحد الأخبوب قال : التخفيظ ( 500 ) ريال ( حته وحدة ) قلت يعني صار الدنمو ب ( 3100 ) قال + 60 ( وإلى هالحين ما أدري وشي له ( الستين هذي ) المهم حاولت لفيت ودرت ( رحت لشركة دايو قالوا يركب عليه دنموه قلت يا دايو ( داوو الأوبل ) قالوا إلى موديل 96 يتراكبن لكن بعد ما ندري المهم بعد الفحص والتدقيق لقينا الدعوى حوسة لا ودنموهم ب ( 1100 ) ريال بس ( والله أشو ) قمت ورحت لوكالة ( bmw ) آه على البي أم وش لكم بطول السالفة ما لقيت !!؟؟؟
قلت : التشليح وأوصي لي رجال بالقصيم قلت دور على الأوبل بالتشليح قام الرجال دور وراح وبحث ودقق ومحص ( ولوكنق فور ) بس طلع تدويره على فشوش يعني ما لقى ولا جنط أوبل .
قمت أنا بالدمام وهات يا دوران تحلف إني رجال مضيع أمه بمنى وفي الأخير لقيت عند النشمي القصيمي تشليح العقيل الدنمو بس ( ب 500 ) ريال ولي يومين وإن ما اشتغل على طول أرجعه وأخذ فلوسي رحت وركبته قال لي الكهربائي الهندي تمام الدنمو شغال قلت الله يبشرك بالخير ( المهم وش لكم بطول السالفة ) طلع الدنمو من جنب القدة ولو فيه خير ما تركه الطير ( يعني الدنمو مو شغال على قولة الحساوية والرجال ما عنده سالفة ( وبدأت المعاناة من جديد حتى أني قلت ( تصلح الأوبل والمقرفون على طول الله لا يبارك بالجميح اللي وهقنا ( السلر مان حقه ) يعني اللي يبيع واحد لبناني قال لي شوف يخزي العين ما أحلاها أنت عم تعرف شو بيسموها في المانيا ؟؟ قلت له ( لاأه ) على بالي متطور وأعرف أهرج المهم قال يسموها القرش ؟؟ وأثري طلعت مع الاعتذار ( دبشة ) ما أفهم الرجال يقول يبي يقرش قريشاتي وهين وهذا اللي صار ... المهم دور لا تدور ومن إيد كهرباتي لحفرة ورشة ومن حفرة ورشة لاستشار آدمي وهات يا صرف من الدراهم ( لو أجمعهن كان يطلعن قيمة الدنمو الجديد ( بس تدرون رأس ما به هو موته وحياته سوى ) والله ما يشوف هالجميح هالثلاثة آلاف لو يموت ولو أوقف السيارة بالشارع و..... ( كلمة أستحي أقوله لكم كملوها أنتم ) المهم يوم أراد الله بي خير وهو يرسل لي ذاك الرجال النشمي قال ورى ما توريه ( عجيب ) قلت وش عجيبه ؟؟؟؟ قال كهربائي تركي خبير والسيارة سيارتهم ؟؟!!! قلت هقوك ينفع قال إن إلقحت وإلا ما ضره الجمل !؟؟ قلت تدري والله إنك صادق وأيضاً ( 100 ) ريال مع اللي خسرناه ( وأكبر الخسارة ما ء وجهك وأنت تشر لها العالم تكفون اشتراك أو توصيلة للبيت لتوهقت وطفت السيارة ... المهم وش لكم بطول السالفة الرجال شاف السيارة وقال أبفك الدنمو ؟؟ قلت سو اللي تبي إن بغيت فكه مسمار مسمار .
بعدين فكه وقال نبي ( كتاوت للدنمو ) قلت بسيطة ووين أنت يالجميح وعلى الجميح بالدمام لأني كنت مسافر هناك وبيني وبين الكهربائي ( تلفون ، وإلا شركة الاتصالات وشلون تربح لو ما كلمت أنا ) قلت للجميح عندك كتاوت قال نعم وبكم إن شاء الله ؟؟ قال بس ب (217 ) بمئتي ريال و سبعة عشر قلت هالحين الدنمو كله ب ( 3600 ) والكتاوت اللي هو قلب الدنمو كله بس بهالقيمة قال عجبك خذه وإلا خله !! وش دعوى زعل قلت لا هاته المهم ركبه الكهربائي وأخذت السيارة وأنا مبسوط غلبت الجميح وما شريت الدنمو يومين وأنا ملبق بالورشة قال هالتركي شوف عمي يا أنا بالسعودية ياهالسيارة إن ما صلحته أبسافر لتركيا قلت ( تمام عليك ) المهم خليته عنده كم يوم وكل مرة ( أتصل عليه ) هاه الجواب ( ما فيه شي ) إلين جيته ذاك اليوم وأنا مقفل قلت له شف لي حل قال أبشر والحل بسيط وفتح باب السيارة اللي معيوركب وقال على مكان قطع غيار السيارات وأخذ معه دنمو الأوبل القديم وقفنا عند راعي قطع الغيار قال له يا معلم ممكن تجيب دنمو ( جمس ) جابه الرجال وأخذه الكهربائي وقام يبحلق فيه وأنا أقول له وش جاب الحوى للبسباس شف دنمو الجمس صغير وهذا حق الأوبل كأنه جحش من كبره ( سفهن الرجال وكلم راعي قطع الغيار بكم هذا الدنمو قال ب( 275 ) ريال بس قال لي الكهربائي عطه الفلوس ؟؟؟ عاد حنا بالدراهم المسألة صعبة شوي بس تذكرت اللي يقول ( اعقل حلالك بنصه والثاني اللي يقول ( عط الخباز خبزك لو أكل نصه ) المهم عطيته الفلوس وقلت للكهربائي وإن ما ركب وش السوات قال لي فلوسك عندي أنا أعطيك قيمة الدنمو وما أخذ منك حق شغل اليد كل هالأيام الماضية قلت له تم المهم الرجال أخذ الدنمو ونزلته عند ورشته وقال لي تعال بعد ( ثلاث أو أربع ساعات ) ويوم جيت وأثر الدعوى تمام وكل شي من أحسن ما يكون والسيارة شغالة وسواق بعد والدنمو يعبي وب ( 275 ) ولا دفعنا شي من ( 3000 ) وتدرون وش قلت لهالجميح إنه حرامي حرامي حرامي كبير والله يهديه ويخفف عن المسلمين

أسف للإطالة وهذي قصة معاناة مع الأوبل مع العلم أنها استمرت قرابة الأربعة أشهر مهب الدعوى لعب وسواليف تراني صادق
الخلاصة ::
1 ) تشليح العقيل بالدمام عنده أوبل أكثر من وحدة وحقيقة أخذت رقم جواله لكني ضيعته .

2 ) الكهربائي التركي المحترم لدي اسمه وجواله من يريد أن يستفيد منه فعلى البريد الخاص وأنا أرسل اللي يبي .
3 ) بالأردن القطع رخيصة حقت الأوبل واللي يتوهق بها يتفق مع حقين النقل الجماعي وهم يجبون له القطعة يومين أو ثلاثة وهي عنده .

والله يرعاكم والسلام عليكم ورحمة الله وبركاته ::