[فكرت وخلصت]

السلام عليكم . هي بنت غير البنات . كم مره عطتني بوسه احلىآ من كل البوسات. كم مره طلعت معها اجمل الطلعات . كم مره قلت لها أحبك. افكر فيها وين مااروح . اقول لها تدرين انك حياتي ودنيتي ونور عيني. تقول ايه ياوليدي ادري. يمه كلمه فقدتها من فارقتها . في احد ايام 1424هـ نادتني بكلمه مااراح انسها قالت لي : ياوليدي لا تصيف بالرجعه ترا ابي اشوفك قبل انام . قلت : لا تخافين راح ارجع قبل تنامين . كنت معزوم طلعت المغرب واقعد مع العيال ونتعشى الساعه 9المهم قمت اغسل. يوم رجعت للغرفه ابي اقول للعيال في امان الله وتصبحون على خير. دخلت الغررفه كلهم ساكتين ومسكرين الدش. قلت : وش السالفه . كلهم يناظرون فيني . قلت فيه شي . قالو : لا سلامتك قلت: طيب انا ابي امشي ماابي اتأخر على امي. قام واحد ومسكني قال ابيك برا اشوي. قلت : طيب. طلعنا نتمشى في الشارع . قال : فلان تدري ان الموت حق وكل واحد فينا يبي يموت والروح ملك لله وامانه لازم ترجع. قلت : ايه ادري. قال : زين اجل يافلان امك تطلبك الحل تو وانت تغسل دق اخوك ورديت عليه وقال لي. انا قلبي بداء يخفق بسرعه عجزت اتكلم عجزت ابكي . يوم اخليها مافيها الا كل خير. المهم ركبت سيارتي ابي اروح للبيت. قبل ماادخل البيت كان فيه سيارات خوالي. دخلت اركض على طول للمجلس . قام خالي وضمني بقوه . وقال : الله الله بالدعاء لها . انا جتني حالة جنون. طلعت رحت لم خالاتي وخواتي واقول وين امي . قالن شالوها للمستشفى. طلعت ابي اشوفها للمره الاخيره . المستشفى مارضو. في اليوم التالي. قبل اذان الظهر كنت في المسجد انا واخواني. اذن قمنا صلينا . هنا المنظر الي هزني . قال الامام : الصلاة على المراءه يرحمكم الله . انا قلت لخواني هذي امي . قالو : ايه . رحت لمها اركض وانا اصيح توي اصدق انها ميته جرني اخوي قال وين تبي.المهم صلينا عليها . شالوها ودوهاا للمقبره اخواني كلن يقول ابي انزل للقبر وانا مبعد عنهم بس اصيح عجزت اقوم انشليت . وانا اصيح جاء اخوي قال : ادفنها ثلاث حلتات بكف يدك على السنه . قمت رحت لم قبرها ودفنت . كرهت كل شي انعزلت عن الناس اقعد اكثر وقتي في المسجد كنت ادعي الله اني اشوفها.ويوم من الايام وانا قاعد اقراء نعست ونمت . وشفت امي باأجمل صوره وتقول لي : يافلان تأخرت مارجعت بس لاتتأخر هالمره. قمت من هالغفوه وقلت لمفسر احلام . قال : تقصد بقولها: لا تتأخر هالمره. يعني بموتك لاتتأخر. عاد لي الحين اربع سنوات من يوم موت امي ولا مت . اللهم يارحيم يارحمان ياغفور اغفر وارحم للوالدين اللهم الحقنا بهم ونحن على هدى وتقى اللهم اجمعنا معهم في الجنات اللهم كما اسعدت قولبنا بمحدثتهما في الدنيا لا تحرمنا محدثتهما في الاخره اللهم اهدنا واصلحنا اللهم اتنا في الدنيا حسنه وفي الاخرة حسنه وقينا عذاب النار . الله الله بالوالدين قبل تقول ياليتني سويت وسويت. الله يجزاكم خير