[أحمد الصمعاني]

السلام عليكم ورحمة الله وبركاته

هذا الموضوع طرحته لاني صاري موقف امس العصر

اول شي ابي اقولكم ان الشغل مافيه عيب وبالعكس اذا شفت الي يتكسون بالخبيب وغيره افرح لانه يدور رزقه لانه غير ناط على البيوت وعلى الاستراحات ويسرق وهذي النوعيه الله يخلف عليه

قصتي

في عصر امس يوم الاثنين الساعه السادسه وخمس دقائق كنت في طريقي عند دوار الكليه الزراعيه بينما وانا ادربي دميجتي اذا بالذي امامي وهي هايلكوس موديل 87 يقف وقف مفاجه كانه امامه اشاره او ان الطريق انتهى وفي وقت ضيق هو امامي واذا صدمته انا الغالطن واذا لفيت يسار في سيارات جايه مع الطريق الي يسار وهذ خطر فالحمدلله ربي ستر
هذا الي خلاني احق عليهم بس وش رايكم كاد ان يهلكني بسبة ريالين انا مااستهتر فيه لاكن لازم يحاسب للي خلفه يعني لو تشفون وقفته امس كان تضحكون
لاكن مادري وش اقولكم
اخليكم مع التعليق
اخوكم احمد

[أبو رُبـــــى]

الحين أنت قلت علشان ريالين !!!!! وأنت برأيك اللي يدور ريالين عنده استعداد يضرب حساب السيارات الأخرى ؟؟؟؟؟؟؟

[ضايق الصدر]

ياكثر يومياتك ياااحمد

[بـــ sunـــــريدة]

مساكين الله يرزقهم أبو أحمد ولا تواخذهم أغلبهم غير متعلمين أو ما يعرف يدبر نفسه
ويهوجس بالرياليين يخاف أحد يسبقه ويأخذها منه .

لكن أنت المفروض تصير ذيب وتعرف أنك بشارع الخبيب وخاصه
اللي يمسك الجانب الأيمن لأنه معروفين بالوقوف بشكل مفاجأ .

لكن بعطيك قصه عن اللي يتكسون وخاصه اللي عند بوابة المطارات .

مرهـ رجعت للسعوديه عن طريق مطار الرياض الدولي وأنا بصرآحه فيني عادهـ
أعتقد أنها أيجابيه وبرضه أرخص من الشركات كل ما طبيت مطار بالسعوديه أول ما أطلع
من البوابه أنحر الشارع و أقف أنا وشنطتي لأني أدري أن فيه ناس تتكس بشكل غير نظامي
طبعا أو يصير فيه سعودي موصل واحد للمطار ويبغى راكب واحد يرجع معه مع أن فيه الهنود
التابعين للشركات بس أحب أدفع لأبن البلد أحسن من ابو هنود والشركات المهم وقفت واحد
أبن حلال معه أجرهـ قلت له بكم توصلني للرياض قالي بأربعين ريال ومعروف أن الشركات أقل
سواق يأخذ خمسين المهم قلت له ثلاثين لأني بنزل قريب من مخرج تسعه يعني أول ما تدخل
الرياض قالي أركب أبشر ركبت معه وعلى طول سألته كيف السوق
والتتكيس قالي يا أخي ذبحونا الأجانب والشركات والشرطه قلت له وش دخل الشرطه قالي
الشرطه ذمتهم الله بالخير مضيقين على أبناء البلد والهندي سواق الأجرهـ يسوي اي شي عادي
بينما ابناء البلد اي حركه منه يلقطه بمخالفه قلت طيب أنتم وش وضعكم أشوف الهنود هم اللي
بجنب البوابه والسعوديين بآخر الصف قال هذا اللي نعاني منه الهندي لما يجي الصبح للمطار يجيب
الفطور للشرطه والجرايد بينما السعودي صاحب الأجرهـ ما يقدر يتجراء الشرطي ويطلب منه فطور
المهم طالعت السواق قلت له يا أخي ما يستحون الشرطه هذا وهم قرايبكم وأبناء البلد زيكم
نظر لي نظرهـ غريبه قال هذاك أول الحين أغلب رجال الشرطه وخاصه اللي بالمواقف يضبطون
وقوف سيارات الأجرهـ أغلبهم يأخذون رشاوي أو هدايا من الهنود وأصحاب الشركات اللي بالاستقبال
قصدهـ المصريين المهم قلت له يا أخي أنتم أصحاب الأجرهـ السعوديين كل يوم بالمطار تجلسون مع
بعض واغلبكم كبار بالسن تجمعوا وأكتبو خطاب أنه أنتم ابناء البلد وأنتم أحق بالمواقف الأولى او
الصفوف الأولى من الهنود أو الشركات لأن الشركه يكفيها الكونتر (الأستقبال) اللي داخل المطار ليش
بعد مسيطرين على المواقف الأولى ناظر لي نظرهـ قال يا ليتك مسئول كبير بأمن المطار ونتمنى أن
المسئولين يهتمون فينا لأننا ضعوف وعندنا شحنة عيال نكد عليهم بغيت أصيح وأنا راكب معه على
باب يمين قلت له الله يرزقكم بس وضعكم يبغى له تخطيط علشان تسيطرون بدل مو اللي مسيطرين العماله والأجانب.

أدري أن فيه ناس ما تتنزل وتركب مع السعوديين ولا يبغى ينفع أبناء البلد الله يهديهم لآكن ما أقول
الا الله ينفع بنا عيال ديرتنا .

تحياتي وتقبل مروري .

[ssoss]

اقتباس المشاركة الأساسية كتبها ابو ربا الحين أنت قلت علشان ريالين !!!!! وأنت برأيك اللي يدور ريالين عنده استعداد يضرب حساب السيارات الأخرى ؟؟؟؟؟؟؟

لاتعليق

[c a f f e e n]

بدوي وشايب وش خليت ؟

[أحمد الصمعاني]

ههههههههههههههههههههههههههه
قسم بالله انكم عرابجه