[ابوجياد]

السلام عليكم ورحمة الله وبركاته


أرحبوووووووووووو



عندي لكم سالفه ودي انتم تحكمون فيها من الغلطان ؟




هذا الله يسلمكم اربع حريم لايذاتلهن بربيعه وخذ ياصياح يبي يتقطعن من الصياح
يامعاليقي والسبب انهن كلهن توهن مطلقات يامسكينات .
المهم انهن بدن يسألن بعضهن وش اللي خلا رجلك يطلقك ؟
سالن الأوله وراه هاللي مايسمى طلقك ؟
قالت : ابد اتصدقن ياخياتي اني مااذكر اني زعلته بشي ولا قصرت معه بشي . الحاصل اننا اصبرن اشوي نواصل وين وصلنا ايه الحاصل اننا ساكنين بعيد عن اهلي ومبطيتن عنهم وكل يوم اقوله ياغديك يبو فلان تودين لهلي ياغديك يبو فلان تودين لهلي وكل نوبه يقولي اليوم باكر الشهر اللي يجي ولا جا الشهر اللي يجي الى يومك . المهم ان عند بيت اهلي بركة كبيره ومن يوم انا صغيره وانا اطافشبه ومشتاقتله . ويوم من الايام قمت وفتحت الما بالبيت وجودت البيبان لين بدا يطفح الما وانا اقوم اطافشبه وانبسط .
الا اللي يطق الباب ويصوت يامره افتحي الباب وش هالما اللي سايحآ بالدرب .
الا هو ابو عيالي . وانا اقوله : انا منب به انا عند اهلي .
وهو يهوشن : انتي انهبلتي يامره اقول افتحي .
وارد عليه : الا انت اللي انهبلت اقولك انا عند اهلي تقولي افتحي وشلون افتحلك وانا عند اهلي؟
وهو يقول : ياالله انا الشكوالك المره انهبلت . وهو يروح ويكز تخلاتي مع حدى البنيات .
عاد وش تقولن ياخياتي : انا غلطانه ؟
ويردن عليه : الا يهبا هو الغلطان .
وهن يفتركن لم الثانيه وهن يسألنه : ونتي ياخيتي وش اللي خلاه يخليك ؟
وهي تقول : انا اسكتن اسكتن بس والله ماخليت عليه قاصر حاشمته واميمته حاشمته وحاشمتن كل جماعته لاكن وش نقول ردى النصيب ياخياتي . اتصدقن عاد انه ماعمره طيب خاطري بشي ولاعمره جابلي ادنات عود . حتى ان علي انعيلات متقطعات من يوم عرسي ماشرالي بدالهن ودايمن اقوله يابو فلان ياغديلك اتجيبلي معك اليوم زهاب نعال وكل يوم اليوم لين تقطعن رجيلاتي وانا حافيه . واكاليوم يطري علي وانا اقوم واغسل رجيلاتي وامحضهن لين بدن يتبالصن وانا اقعد على اكاالجذع وارفع رجيلاتي عن الارض ايه ياخيتي تبينهن يتوصخن . الحاصل يوم صار مسيان الا ابو عيالي يطق الباب وهو يصوت : ام فلان افتحي الباب .
وارد عليه : احلت النعال علشان البسهن وافتحلك .
وهو يقول : وش انعاله ماجبت شي افتحي الباب .
واقوله : مااقدر ياخيي افتحلك مااقدر انزل من الجذع بلا انعال ماتفهم انت وشلون افتحلك وانا بلا نعال ؟
وهو يقول : الله المستعان انهبلت ام افلان وهو يكتب تخلاتي بوريقه ويلفزه من تحت الباب ويروح .
عاد ابنشدكن انا غلطانه بشي ؟
وهن يقولن له : لا منتب غلطانه يعقب الا هو الغلطان .
وهن يلتفتن لم الثالثه : وانتي وراى هاللي مايسمى خلاك ؟
وترد عليهن : مادري وراه خلان اناااا
ويقولن له : يابنت الحلال لا تصيحين اللي حصل حصل علمينا وش اللي صار؟
وهي تقول : اللي صاررر
وهن يقولن : شوفي هاتي كل اللي عنك من الصياح لين نجيك .
وهن يسألن الرابعه : وانتي وش اللي خلاه يخليك ؟
قالت : آآآه انا ماسويتله شي ولا غلطت بشي مير ياخياتي العين حق ولا احد مخلين احد . كنا ساكنين بكالبويت اللي ماعندك اوذف منه وش حليلنا بويت يهبل الا ان به اكالحوش اللي مابلط مغير صايرن تراب ادناة هبه الا البيت غادين كله تربات . وانا دايما اقول لرجلي يابو فلان ياغديك مبلطن هالحوش . متى تجيب عمال يبلطون هاحوش . يارجال بلط هالحوش . وهو كل يوم اليوم باكر عقبه لين حامت سبدي ومليت . عاد رجلي عنده دكان ويبيعبه صابون وصايرن المستودع عندنا بالبيت واقوملك انا على الصابون وانثره كله بالحوش لين صار كله أبيض ماعندك احسن منه . المهم وهو يدخل رجلي وانا قاعدتن بالحوش . وهو يشهق وش ذا وش اللي حصل عسى ماشر .
وانا اقول له : ابد يارجال ماهنا الا كل خير بس يوم شفتك منتب مبلطن الحوش قمت انا وبلطته الله يسلمك .
وهو يقول : بلطتيه ايه هين اذلفي لم اهلك وورقك تاصلك يالخبله .
وه تهقنن غلطانه ؟
وهن يردن : ابد يخسى الا هو الغلطان .
وهن يرجعن للثالثه وهي تشاهق هاه ماقضى اللي عندك ؟
وهي تقول : الا الا قضى قضى .
ويقولن له : هاه وراه خلاك ؟
وهي ترد : خلاااانننن وهي تصيح
قالن : أصلن مهب لازم نعرف سالفك لأننا طولنا على اللي يقرى الموضوع . عاد قولولنا من الغلطا... خلاص خلاص ابقولكم وراه خلان الله ياخذ عمره ( طبعا اعذروه المسكينه ماله الا شهر متزوجه )
فقالن له : هاه وراه خلاك ؟
قالت : اسمعن ماأذكر اني سويت شين غلط وعايشينن ماعندنا خلاف واحليلنا ونوبة من النوبات رجلي عنده اكالفلاحه وجايبن اكاليوم عمال يشغلون عنده وقالي : لامنه قضى الغدا هاتيه يمنا اماه .
فقلت له : سم يابعد سبدي .
المهم يوم صار الظهر وانا احط الغدا على الحماره واطلقه لم الفلاحه .
يوم اوفيت ماوفيت وهو يجي لمي رجلي ويقول : عسى ماشر وراه صيف الغدا اليوم ؟
قلت : ماصيف ولا شي كازته مع الحماره ماجابته ؟
قال : الحماره !!! لا والله انتي الحماره . طالق طالق طالق !!!!!!!!
عاد قولن لي : انا غلطانه ؟
فتناظرن بيناتهن : الا يقطع ويخسى الا هو الغلطان ............ أنتهى



عاد أنتم قولولنا من الغلطان هن ولا هم


دائما ماندفع غيرنا للأخطاء بسوء تصرفاتنا
وسلامتكم

[روح تحتضر]

يهبا هو الغلطان والله....

[أحن امرأه بالعالم]

هههههههههه الحريم دايم ضعيفات الله يرحم ضعفهن

[انسانهـ لا أكثر]

هههههههههههههههههههههههههههههههههههههههه

تهبل وخصوصا اللهجه الحلو الي اعشقها

هم الغلطانين بلى شك

[أبو خالد111]

تهلوس انت هنا ؟ !:@

[أم رائد ورامي]

..

اكيد هم الغلطانين

حرام عليهم علشان كذا بس

ياحبيلهن براءه كل ذا و ماسوون شي ..

موضوع قمة في الروعه اوصلت المعلومه بأسلوب ممتع ومحبب للأغلبيه

فعلاً في مواقف كثيراً ندفع من هم حولنا للخطأ بسوء تصرفنا ..

بورك قلمك وننتظر جديدك ..

[ما تَهَاب]

بلا شـــك أنهم هم الغلطانين لأنهم لم يحسنوا الاختيار منذ البداية ..!

[همـس الرحيـل]

وش معنا تخلاتي؟؟؟
*******

[أم رائد ورامي]

اقتباس المشاركة الأساسية كتبها **الصداقه رمز** وش معنا تخلاتي؟؟؟ *******

يعني ورقة طلاقها ..

[الداعية الصغيرة]

اكييييييييييييييد هم الغلطانين

المفروض يكبرون عقولهم ويعدونها

ويستقبلون اي خطاء من حريمهم

من قالهم يتزوجون حريم غبيات وهم ماعندهم صبر

اكييييييييييد هم الغلطانين 100%

[رمش مدلل]

يهبون الرجال هم الغلطانين

[•°انكسار الأماني°•]

,,

ياليلي ليلين ,,
غيرنا يطمحن لرئاسة دول وبناتنا كل همهن ,
خطبت ما خطبت ,
تزوجت ماتزوجت ,
يحبن مايحبن ,
تزوج علي ما تزوج علي ,
خلان ماخلان ,
؛
الله يرحم حالهن متعبات أرواحهن ورا خشاش القوم
الغلط مرفوع عنهم كلهم لأنه على المحاكم اللي تزوج هالأشكال ,
؛
بالتوفيق للأربع حريم اللي لايذات بربعه ودوم اللوذه يارب ,

,,

[قم قاعد]

لاوالله يهبون الحريم هن الغلطانات

[حلوه بضحكتها]

اقتباس المشاركة الأساسية كتبها ام خيال .. اكيد هم الغلطانين حرام عليهم علشان كذا بس ياحبيلهن براءه كل ذا و ماسوون شي .. موضوع قمة في الروعه اوصلت المعلومه بأسلوب ممتع ومحبب للأغلبيه فعلاً في مواقف كثيراً ندفع من هم حولنا للخطأ بسوء تصرفنا .. بورك قلمك وننتظر جديدك ..