[قتاله]

مصــــاكم ربي بالخير
.
.
.
اعرفكم بنفسي انا قـتـالـه وفي روايه ام القتاتيل على رأي حمني اخوي << اخلصي علينا
جيت هنا بدعوه من صديقه غاليه ياعين ابوي ياهي قصم بالله مو تطفل ... والا انا مااتسدح بالسيسان ولاني فاضيه بص وشسموه المنتدى اللي كنت اتبطح فيه ماادري وش جاهم صاكن له يومين ياصافقن لياتهم كوكب او منمصع واحد من افياشهم ماادري بص كلنا أمل يرجع زي اول ويزبطون امورهم مو بتله الخراب !
مالكم بالطويله ..طرحي دايم عباره عن سوالف وتوسيع صدر وفيها شوي نقد لأوضاع اسريه واجتماعيه نزاولها بشكل يومي
ترد بكلماتي مصطلحات شماليه ياعين ابوي اللي مايفهمهن يحط تحته خط ويغز اصبعوه وبالمناسبه حمني اخوي واصغر مني بسنه امي وتعرفونها امي طرفه جدتي اختي تعرفونه صابر عاملنا
هاظول ابطال سواليفي يالله نبدأ على بركة الله بسالفه طازجه مخصوصه لكم وبعدها اببدأ اطلع من الافريزر واسخن
الويك اند اللي راح قررنا نروح نحضر عرس سعدون ولد خالتي نوير من رجله الاول المهم داومنا انا وحمني الاربعاء نص دوام ومن الليله اللي قبلها مولمه شنطتي ولوازم العرس تعرفن يابنات كل شوي تفطنين لشي وفتح وصك بسحاب هالشنطه لين تقول عسا ماعرس
لما دخلت البيت واثر امي زاهمتن على البشريه كلهم ومعلمتهم بموعد روحتنا واثر خالتي نوير مسنتره بالصاله
وخالتي الجازي هو وتوأمه الصغنبوطين تقول اخاف اخليهم تاكلهم شغالتنا خخخ وكلــــه كوم وخالة امي من الرضاع ام طالب والله ياهي نشبة النشب قلت لامي اغدين بص اهون قالت انثبري بص ضاقت عينتس ياام القتاتيل يالله بس روحي حملي الاغراض بالسياره وترفقي على قش الناس رحت اصفهن بشنطة السياره وانواع الحلتمه وهات ياأصره ولفايز هه وبعد الغدا مشينا بأمان الله وسط صياح الوغدان التوأم من آن لآخر وسواليف الحريم اللي ترقي المر لين يوصل العيون كله تشكي وسب برجالهن والرجال عموماً وحمني يسمع ويبلع وهو ساكت خخخ ...واخيراً وصلنا محطة العتش << سيرد ذكرها كثيراً في سواليفي !
صلينا وكالعاده نزلت عزبتنا ترامس القهوه والشاهي علشان امي مايجيها هبوطها طلعت الفناجيل وبديت اصب لامي وخالاتي عاد امي ماتخلي شغل الشمال بدت تعزم الحريم اللي حولنا بمصلى الحريم وصبي ياقتاله ...فنجال المره ياقتاله .. مدي لهذيك ياقتاله خلتها امي دورية العتش اوب مسجد خخخ وحنا وخالاتي كاشفات لانو بمكان حريم وباقي الحريم متغطيات ومتجودات تقول بوسط شارع الصناعه من زود الستر وهات ياتنشيد وش انتم وش ترجعون له ووشي قهوتكم وحنا غيركم ماعندكم احد يبي مسيار ؟؟
وبخضم هالخرشه دوت صرخه من خالتي ام التوم يـــــــــــــــاويـــــــــل حالي نطلوا ولدي !
يـاقـــــــتالــــــــــــــــــــــــــــــــــه الحقي علينا ازهمي على الشرطه او حقوق الانصـــان هه!
يحول هالقتاله صارت سوبرمان وهات ياتدوير وموايق بوجيه الحريم وشناطهن اغدي احد موزي الوغد بشنطه تعرفون الحين الموضه الهجه بالوغدان ينفع بوقت عوزه وياعين حيي يااميمتي شلع ضغطه وهي منول عنده هبوط وبلشنا بأمي وخالتي الجازي جميع بربعه وحده يولولن وماامداني احط رجلي على الدرج الخارجي الا افغانيه شايله ولد خالتي وتحرج عليه بيبي مين ؟ حق انتي ؟ بيبي مين ؟!
قلت يابعد عيون الشمال كلهم تعالي ياحيي وش نوحتس تحرجين على الوغد واتله مع العلبا لخالتي قلت شوفي الصغنبوط احجريه مع اخوه وخل نشوف قصة رفيق وش عندها مع ولدنا << ماينتحارشون هه
واثر المسيكينه شافته يحبي يحاول ينزل من الدرج وشالته خافت عليه وهات يااتحريج وحنا بلشين بقهوتنا منيب قايلتن عسانا للمر عاد تنيذخت خالتي وصكت الافغانيه بخمسميه ... وتطيح علينا واصفها بجنب خالتي وامي وخالتي خخخ
بعدها قلتلهم قوه بس .. يسد ماجانا قوه عسى ربي يوصلنا بالصلامه كابوس صعب !
بعد وصولنا( العارض ) الرياض ارتحنا بالشقه ونمنا بعد عناء وهبلة الصغنبوط ماكانت السراير بالشقه كافيه تركت سريري للوالده ونمت بجنب ام طالب على الارض ويــــالـــيل اللــــيـــــــــــــــــــل ياام طالب لما جت حوالي الساعه الثلاث واسمعها تناديني قتالي قتـــــالــــي << بنطق اهل الشمال !
سمي ياأمي وش بغيتي اقولها وانا مابعد صحيت قالت قومي بظهري شي يتحرك ياحي قومي شوفي وشو
وانا اتوحش واقوم من طولي قلتلها وشو بص ياعين امي لاتخوفيني وقصم ان قلبي ماعاد يتحمل
تبين اناديلك امي قالت لا ياحيي بسرعه شوفي وش تحت ثيابي بدا يعض يمـــــــــــــــــــــــــــــــــــــــه ياام طـــــــــــالب
حرام عليتس انا توي ماابي اموت انتي بكيفتس بص انا لا امي تبين قالت (اروجي ) اسرعي يالله لايتمكن مني!!
وبعد فيها تمكن طيب ام طالب ابدخل يدي وربي يحميني ..اصبري ابقرأ المعوذات قالت وانا ابتحراتس عجلي لأفغى راستس بها لشنطه اللي جنبي استسلمت ودخلت يدي وفتحت عيوني على اخر شي وأويتز وانا اتحسس بشويش .. الا شي له سنون واصرخ لين قاموا كلهم .. قلت الحقوا ام طالب ياداخلن فيها جني له شظاف او ان ظهرها له سنون تجمعوا كلهم فوق راس ام طالب وانا لاصقه بالجدار حتى حمني جا يركض وهو منصفر ... بعدها قربت خالتي نوير لأم طالب وهي تقرا المعوذات .. وفتحت كل الانوار ووأقت بظهر ام طالب ورجعت على وراها وهي ميته من الضحك ومو قادره تحتسي بعدها صار كل واحد يويق ويضحك ومابقى الا انا وحمني .. قال قتاله دورك ويقي وعلمين وش تشوفين قالت امي انا اوريك ودخلت يدها وطلعت طقم سنون ام طالب من كثر التقلب طايح وناشب بظهرها خخخخخ بس وش عقبه ياام طالب ... راح ليلنا وفجرنا نويق على ظهرتس هه !
ياخزياه منكم كثرت الهذره وانا ايقالي عضو وشسمه جديد
انتظروا الجـــــــــزء الثـــاني
والى قــــادم قـــــتــــالـــــــه