 |
|
|
|
|
12-07-2009, 11:13 PM
|
#1 |
|
عـضـو
تاريخ التسجيل: Jun 2009
البلد: بريدة
المشاركات: 192
|
ضيف بريدة ضحك ... وضيف بريدة تأثر ... مشهد وأنت رايح للمطار
الله يطول أعماركم على طاعة ربكم خلوكم معي شوي ولا يصير الموضوع عادي بحكم أنكم تعودتم عليه لأن المعادلة تقول : أن لكل فعل ردة فعل عفوا الحقيقة تقول : أن كل من شاهده ضحك علينا وقال يحليلهم أهل بريده  أثرهم مخفات  قلنا وجع ! وش مخفات ؟ ما تستحي على وجهك ؟ قال ... أنتم أهل بريدة تحفة !!! قلنا تحفة بعينك .. وش قصدك ؟ قال هماكم تمشون ( حلوة هماكم ... كنهم يعرفونها ) هماكم ذي ذكرتني بالأرنب الكبير اللي عند أمي ... من كبره الحريم يتحجبون عنه  والله يا هو مروع البزران  المهم مالكم بطول السالفة بس من جدّ صرنا ضحكة للضيف اللي شاف بريدة وأعجب بها ... وصار يدوّن ذكرياته ومذكراته عن مدينتنا الغالية وبعد أن ضيفوه ... وأعطاهم وعدا بتكرار الزيارة بعد سنتين ... ثم ودّعوه وحلفوا له إن أم السلالم والديبان اللي ضيقت صدرك ( كبري شارع الثمانين ) ما تتم سنتين أو ثلاث بالكثير إلا أنت مقطّع خريطة الكبري اللي رسمناها له ( هو كل شوي يضيّع الجهات ولا يدري الشمال من الجنوب ثم يدق علينا وصار سالفتنا ) المهم ( يا طول سالفتك ) مسك الضيف الطريق ... وركب مع علي ... واجب الضيافة عندنا نوصله المطار إيه خوينا راكب السيارة ويدون ويكتب ... وعلي يهوجس ووده يقول له عسى ما هنا قصور معك واصلوا طريقهم وتجاوزوا الطريق الدائري باتجاه المطار وجت تحويلة ضراس ( عاشت الأسامي عندنا ) وعلي يهدي السرعة ليتجاوز التقاطع وإذا بضحكة الضيف المدوية علي يصفط يمين ( ألفاظ متعوب عليها ... ألفاظنا مع أهلنا أحلى ) ويقول للضيف وجع وش بك ... أنت انهبلت ؟ ( كلمات غضب من علي لا شعوريا ) والضيف كررررررررر كر كاااااااااااااااااار كرررررر علي يبحلق بالضيف وخاف انه انهبل من جد ! وش بلاك ..... وش بك ؟ الضيف يهديء من ضحكاته شيئا فشيئا ويقول أنتم يا أهل بريدة طيبين وبصراحة تحفة ؟ وجع وش هالكلام ؟ هذي آخرتها معك ؟ قال لا لا .. والله ما قصرتوا بس براءة الاختراع هذي تساوي مطبات بريدة ذهبا !! يا ابن الحلال وش السالفة أنت ؟ قال الضيف : نعنبوا ابليسكم وش سويتوا ؟ ما أحد قدكم ؟ ما تشوف ؟ قال علي تراك طولتها علمني وإلا والله تدقها كعابي للمطار قال أبقولك ... قل ... قال الضيف : عمرك شفت بالدنيا كلها إن المطب الصناعي يكون بوسط التقاطع ؟ أففففففففففففففففففففف والله الفضيحة قال علي ( يبي يرقعها بس ما عرف ) قال له : يا أخي حنا تعودنا وش ذنبنا إنكم ما عندكم زينا قال الضيف وهو يتميلح ببقية قهقهاته .... اسمح لي شوي أبختم بها ذكرياتي قال علي حقنا عليك ما تكتبها وأهل بريدة ما لهم ذنب وترى مطباتنا بالعادة نحطها قبل التقاطعات ( والحمد لله أنت شفت ديرتنا مطباتنا أكثر من السكان ولا شفت اللي شفت ) بس السيول والحر وكبري مشعل وارتفاع الأسعار والكهرب كل شوي طافي وعوامل التعرية .. يعني الظروف اجتمعت ومثلك عارف عاد خوينا الضيف تأثر وشوي وتدمع عينه ... وقال ظروفكم صعبة وغريبة والله يعينكم عليها ودعه علي بكل حفاوة وحرارة على أمل اللقاء في مطب ثاني بس يصير بعد التقاطع حتى تكمل السالفة  خلونا من كل الكلام والخرابيط وعلي وضيفه والظروف وخلونا نسأل ؟ عمركم شفتوا مطب بوسط التقاطع ؟ المطب وسيلة تهدئة لأمر قادم ... علشان التقاطع مثلا ... لكن ركبت المطب وش الفايدة ؟ والحل أن يوضع مطب للتنبيه أنه يوجد مطب بوسط التقاطع للتهدئة بواسطة المطب الأول عن الثاني ليتم التنبه للتقاطع ... صارت معادلة رياضية وتبون الصراحة ... ودك تسدح اللي حطه قبل التقاطع لننتبه من المطب المهزلة . وعذرا على السالفة الطويلة وصيفنا مع أهلنا أحلى الله يعين على بعض التعليقات ... واللي ما يعجبه الموضوع يدقها ريوس ويطلع من الموضوع
آخر من قام بالتعديل د. كيف; بتاريخ 12-07-2009 الساعة 11:26 PM. |
|
| الإشارات المرجعية |
| أدوات الموضوع | |
| طريقة العرض | |
|
|
النمط الأحادي