[منصـور]

السلام عليكم ورحمة الله

قدر الله علينا وتوهقنا في مساهمه عقاريه ولله الحمد من فتره طويله حيث غرر فينا صاحب المساهمه واوهمنا ان الارض تساوي الكثير وهي ماتسوى ولا قرش واصلا هي خارج النطاق العمراني. وفيه مجموعه من المساهمين طالبو بحقهم ووفقهم الله و حصلوه كامل من صاحب المساهمه عن طريق المحكمه. وبالنسبه لنا للحين على حالنا فلوسي وفلوس حريم ضعوف مساهمين معي كلوها حسبي ا لله عليهم. المشكله اللي طالبو بحقهم رافضين انهم يعطوننا صوره من صك الحكم ومن قبل رفضو اننا ندخل معهم في الدعوى من دون سبب مقنع مع العلم اني عرضت عليهم نسبة لكن رفضو.

اللي ارجوه من الله ثم منكم اولا اللي يعرف احد في المحكمه يقدر يطلع لنا صوره من الصك بالحكم الشرعي اللي صدر لهم يسوي خير فينا ياجماعة. انا ابي اعرف كيف ثبتو عليه الغرر واقدر اطالب بحقي.

الامر الثاني اللي يعرف محامي ممكن يطالب في مثل هالقضايا ياليت يراسلني على الخاص لاني ساكن في الرياض ومرتبط بوظيفه والمدعى عليه من اهل بريده ولا اقدر اتردد علي الديرة.

افزعوا في حاجة اخوكم الله يقضي لكم حاجاتكم وماتتمنون ترا الموضوع مشيلني هم مايعلم به الا الله خصوصا هالحريم اللي ساهمت لهم ووهقتهم معي حسبي الله على اللي كان السبب.