[مجنون بريده]

( همسه )
حتى تتّضح فكرة الموضوع للجميع

هذا الموضوع قد كتبته سابقاً في إحدى المنتديات المجاورة والغير محافظة بالكامل , والكمال لله وحده !

فكان أن طرحت هذا الموضوع لتتم الفائدة للجميع ,
وما جعلني أجزم على أن يرى النور هو نقاش حاد حصل بين عضوين لتصل إلى تراشق بالكلمات الغير أخلاقية في شريط الإهداءات !

فأحببت أن تكون له بصمة هنا ,, ليقيني بأن أعضاء المنتدى الأعزاء يشتركون في منتديات أخرى !

نبدأ على بركة الله ,

السلام عليكم ورحمة الله وبركاته

أحلى صباح / مساء لأحلى أعضاء في هذا المنتدى الشامخ ..

كالعادة ماعرفش أكتب مقدمات وهذي هي مقدمتي ماتغيّرت ولا راح تتغيّر وأعلى مابخيلكم اركبوه

مدخل :.
عدم تغييري للمقدّمة , لاتعني أن الفائدة منعدمة ( قل قسم )

اليوم سأتكلّم عن واقع بعضنا في عالم المنتديات بداية تسجيلي في منتدى ما كانت هي بدايتي في عالم النت لذلك لا أعرف منه إلا فتح وإغلاق الجهاز فقط

كتبت موضوع ترحيبي مثلي مثل غيري ورأيت الردود الترحيبية التي تثلج الصدر

وكان من ضمن الردود ذكرت فيها ( أهلاً بالغالي مجنون بريده )

ويوم قريت هالكلمة كأني حسيت إن الأرض تدور بي ( كل عمره مايسمع إلا هات وخذ وود ياجنط )

وفي غمضة عين يقوله أحد ياغالي وتصير من بنوته ( هذا اللي زوّد الطين بلّة )

عاد عاهدت نفسي من بعد كلمة الغالي

إني أدخل ملفّه الشخصي , وأروح لكل مواضيعه أرد عليهن عشان نقرّب البعيد !
وأدخل لمواضيعه الدينية وأقول ( الله يجعلها بموازين حسناتك )

وأدخل لمواضيعه بالقسم المفتوح واكتب ( دوما أنتي مبدعة في إختيارك للمواضيع )

والمشكلة ماله إلا يومين مسجّل بالمنتدى ويقول دوما مبدعة ( لكن وسعوا صدوركم )

وادخل لقسم الألعاب عاد تعال تفرّج على الإهداءات والوردود
والكفوف لكل اللي عطوها كفوف ( تفكير سليم )

وإذا حسيّت إن بعض الأعضاء تضايق من هالحركات القديمة
أقول أهدي الوردة للي بعدي ( تراه ذكي الله لا يضرّه )

ولعلّ الوردة صارت من نصيب برجس خويي ( لكن تكبر وتنسى ) عاد مرّة من المرات حصلّتها جالسة بالدكة تسولف فقلت : هذي فرصتك , والفرص لاتأتي فرادى ( أصه )

والله وأدخل على الدكة وعلى طول تنكيت قبل مايسلّم عليهم

ويوم اعتمدت أول تنكيته لعلّه رادتن قبلي وتقول بررررب

عاد يوم قريت البررررررب قلت سكّر المنتدى لين يجي الباااااااااك بتاعه

عاد في هذه اللحظات مدري وين أروح ؟

كل خوياي مسافرين والشقة بتاعتنا لو يشوفن راعيه كان يموتن تقبيص
لأننا ماطلناه وماعطيناه باقي دراهمه ,

لذلك لو أسمع كلمة الشقّة تجين قشعريرة بإذني ( أول مرة أسمع به )

لذلك قلت مالك إلا تنام وتلعن إبليس عليه من الله مايستحق

عاد يوم أشرقت شمس جديدة ( ساقط بالتعبير)

فتحت المنتدى ولقيت رسالة خاصة من اللي ردّيت على مواضيعه لين وصلن مشاركاتي 1000

عاد يوم فتحت الرسالة لقيت مكتوب فيها : أحبّك

فقلت : يازين اللي مايعقّد الأمور وأهم شي البساطة ( يبي يجرّب الفيوس )

على طاري الفيوس , وش جمع الفيس ؟ سؤال للجميع

أتوقع جمع الفيس ( كرتوووووون فيس ) ( تحط نفسك في مواقف بايخة )

عموما يوم قريت الرسالة

قلت : مالك إلا ترد عليها برسالة تهز كيانه

( لا أعلم لماذا يخالجني شعور غريب عندما أرى إسمك في كل مكان )
الشرهة على اللي قالت لك : أحبك والله من عقب هالرسالة بدت العلاقة بيني وبينه تكبر

وعسى الله يرزقن عدد الرسائل الخاصة اللي بيني وبينه لكن العلاقة اللي بيننا محدودة
وماتتعدّى الرسائل الخاصة عاد قلت : ماهي حالة ملّينا من الرسائل الخاصة , لازم نتعمّق شوي

عاد من ضمن رسايلي الخاصة أرسلت له ايميلي وتحته قلب حب ( )

عاد أرسلت لي : إذا تبي إضافتي بالمسن

ناقز لين يصبخ راسك سقف الغرفة , وإذا صبخ راسك عطني خبر عشان أضيفك بالمسن

لعلّه صار راسه يابس ولا يمكن تقنعه

عاد أنا على نصيحة عمّي الغالي لأنه كان دائما يقول لي : لاتيأس , فلا يأس مع الحياة

فعلا سويّت اللي قالي عمّي , وأبصم بإصبعي الدبي لو كان عمّي شايف هالبنت

كان ماقال هالحكمة , ( انفقع راسي مدري وش أكتب بباقي السطر؟)

عاد أنا يوم طاب خاطري منه , وملّيت من المناقز بغرفتي

قلت : مالك إلا تكرشه , واللي خلقها خلق غيرها

ولعلّه بدت ترسلّي رسائل كله إساءات ومافيه كلمة مسبة ماقالتها

قلت : مالي إلا أفضحه قدّام الناس وأرد الصاع صاعين

بس احترت وين أكتب لها لأن الرسائل الخاصة مايشوفها إلا هي والمدير

وأنا ماراح يشفي غليلي إلا لين يقرون كلامي كل الأعضاء

جتني فكرة جهنّمية إني أكتبها بشريط الإهداءات

بس قلت : صعبة الشريط للإهداءات وليس لتراشق الكلمات !

ومع مرور الأيام نسينا بعض

فحنّيت لأيام الحب اللي بيننا , عاد قلت مالك إلا تسيّر للقسم وتقرأ الكلمات اللي يذكرّنك بالحبيب
وفعلا , صرت أدخل كل المدونات وأقرأ من هالكلمات الحلوة

وإذا وصلت لجملة ( إن صمتي لايعني جهلي بما يدور حولي ... إلخ )

أنقل للمدوّنة الثانية , وهلّم جرجر

مايستفاد من القصة وفوائد عامة :

1_ ينبغي أن تكون رؤيتك للصورة الرمزية واحدة , سواء كانت لميس أو لطيفة المجرن

2_ ينبغي أن تكون إستخدامك للرسائل الخاصة بطريقة إيجابية ..

3_ تراشق الكلمات تختلف من شخص لأخر , فيكبر الخطأ كلّما كبر منصب المخطئ ..

4_ ينبغي أن يكون الشخص أكبر من أن تؤثر فيه كلمة ( أحبك) من شخص يندّس تحت القناع !

5_ الردود هي التي تبيّن لك الأعمار الحقيقية , فليس كل مايقال صحيح !

( همسة :. القصة ليست من واقعي بل من نسج الخيال )

أرق التحايا والتقدير :. مجنون بريده ’,

[في داخلي قلب طفلة]

شكرا لك

[الكساندرا]

،،،



موضوع متوسع .. وحساس ..
كيف يمكن للشخص أن يعجب بشخص لايراه إلا بسطوره ..!!
ولا يعلم شخصيته إلا بما يظهره ..!!
بإمكاننا الإعجاب بالأقلام .. لكن لايجب علينا أن نتعداها .. فالأقلام تظل أقلاماً ..
لاتكتب إلا مايريده صاحبها منها .. ولاتظهر لنا إلا الجزء اليسير من شخصيته ..

سطور مرحة وممتعه .. تتسم بالبساطة وصدق الطرح للفائدة ..

دمت كما تحب ..

~~ ألكساندرا ...


,,,

[loquacious]

فيوز خيالك ضاربة معك , الظاهر موقفه على 2002
أجل ترسل رساله خاصه على طول أحبك , أقول كيف الحال بس ..
بس الأهم المغزى " الفوائد " ..

فعلاً .. يوزرات تحمل معاني مدري وش تبي , وتلاقي العكس بالشخصية الحقيقية ..
اللي مسميه نفسها الدلوعة والمزيونه والمملوحه والممشوقة
وإذا اكتشفت الحقائق تلاقي الضد والضد , أما الدلوعه لها حاله خاصة أعتقد انها مدقومه أشد الدقم عند أهلها
لذلك تحب الظهور لغير حقيقتها ..
أما الممشوقه هذي تحلم ينزل وزنها كيلوا واحد فصار هاجسها وحلمها تكون ممشوقة القوام
أما المملوحه فهي لا تمت بصله لآكلات الملح , ربما تندرج تحت آكلات البيض
وهلّم جرى على باقي اليوزرات , ومنهم يوزري

أما الشباب حكاية ثانية ..
أنا اللي حارق معدتي اللي يسمي نفسه الوسيم ؟ ويحط صورة جورج كلوني ولا يهون توم كروز
مصدق انو راح نتخيل انه حلوو !!
ارحم النوعيه هذي كثييير ..


عالعموم مشكور على هذي النصائح / والله يكثر من أمثالك ..
وأتمنى أن لاتندرج تحت مسمى المتمالحين .. !

[LOVELORN]

:: أحبك ::

صدقت بعض الناس خفيّف وتراي ما أقصد أحد ..
اذا شاف معرف بنت بدا يتميلح ويختار أزين الألفاظ .. وهو ما يدري وش اللي ورى هالمعرف ..؟؟

قصة جميلة ..

[الـعـابـر]

الله يعين من لديه بعض السوايا مثل هذه القصه
يحس انه هو المقصود
...
شكرا لك

[أبو رُبـــــى]

طرح جميل جداً ..

من السذاجة أن تكون المعرفات هي مقياسنا للشخص .. !!


لي تعقيب على أختنا الفاضلة .. ( الكساندرا )

اقتباس بإمكاننا الإعجاب بالأقلام .. لكن لايجب علينا أن نتعداها .. فالأقلام تظل أقلاماً ..

في اعتقادي بأن الأمر قد يتطور شيئاً فشيئاً .. !!

حمانا الله وإياكم من كل سوء ..

شكراً مجنون بريدة .

[للصمت ضجيج !]

رووعه جدآ النصيحه وأسلوبـ حلو .. خشيت جو مع القصه >> صدقت السالفه

من جد تسلم الايـادي عالطرح الراقي ..

للصمت ضجيج .

[روسانا]

الله يعين من لديه بعض السوايا مثل هذه القصه
يحس انه هو المقصود
...
شكرا لك

[الكساندرا]

اقتباس المشاركة الأساسية كتبها أبو رُبـــــى لي تعقيب على أختنا الفاضلة .. ( الكساندرا ) في اعتقادي بأن الأمر قد يتطور شيئاً فشيئاً .. !! حمانا الله وإياكم من كل سوء ...

,,,



حياك الله أخاً ناصحاً ..

نعم قد يتطور .. اذا سمحنا له بذلك .. لذلك قلت " لايجب علينا أن نتعداها"
لأننا ندرك أنه يوجد من السذج من يرسم شخصية وخيالات بمجرد قراءته للسطور ..

اذا كنا لاندرك شخصية مع نعيش معه إلا بصعوبة ..
فكيف بإمكاننا ادراك شخصية من لاترى منه إلا مايريد منك رؤيته ..!!

شكراآا لك على التعقيب الجيد ..
هذا جعلني هذا أوضح مقصدي ..

دمت كما تحب ..

~~ ألكساندرا ...



,,,

[بنت غير]

اقتباس لطيفة المجرن

هــذا اسمي



جمــــــــــيل جدا

بس مافهمت هو اسلوبك ولا ناقله عموما اذا اسلوبك

فهو رائع يعطيك العافيه

نصيحه ولاهيب نصيحه

جزاك الله خير

[الداهيه]

عجيب ....

هل هناك أقلام خداعه ..... !!!!

بأعتقادى ... أنه (((((((( ينكشف زين الأقلام إذا حمي الوطيس ))))))))

مهما بلغ قلمه .....

سوف تنكشف .... اللغه التى بها يتحدث ....

ولك في الحياة .... مصنع تجارب لمثل هذه الماركات ...!!

[مجنون بريده]

اقتباس المشاركة الأساسية كتبها في داخلي قلب طفلة شكرا لك

عفوا لك

[مجنون بريده]

اقتباس المشاركة الأساسية كتبها الكساندرا ،،، موضوع متوسع .. وحساس .. كيف يمكن للشخص أن يعجب بشخص لايراه إلا بسطوره ..!! ولا يعلم شخصيته إلا بما يظهره ..!! بإمكاننا الإعجاب بالأقلام .. لكن لايجب علينا أن نتعداها .. فالأقلام تظل أقلاماً .. لاتكتب إلا مايريده صاحبها منها .. ولاتظهر لنا إلا الجزء اليسير من شخصيته .. سطور مرحة وممتعه .. تتسم بالبساطة وصدق الطرح للفائدة .. دمت كما تحب .. ~~ ألكساندرا ... ,,,

حياك الله أختي ألكساندرا


كلامك جميل ومقنع ,, ولكن المسألة تتعدّى الإعجاب بالقلم إن لم نحكمها بإتقان !


شكرا لمرورك