[زائر لبريدة]

السلام عليكم جميعا
...
حقيقة سبب تسجيلي في موقعكم الرائع هو رغبتي في زيارة بريدة بعد كم أسبوع لغرض السياحة والاستجمام فقلت أبحث عن موقع لأهل بريدة أسألهم عن بعض الأشياء.
...
عاد لقيت موقعكم الذي يحتوي على أكبر عدد من الأعضاء فقلت هذا غرضي وأكيد أبلقى من يفزع ويتعاون.
...
1- في البداية قررت أسكن في فندق لكن يوم فكرت قلت ليش فندق في بريدة وهي بلد المزارع، خل الفندق في ديرة ثانية والمزرعة أحسن للآستجمام والراحة وشم الهواء النقي.
المهم أنتم ويش رآيكم ألقى عند أحدكم مزرعة مناسبة للاستيجار كم يوم أو تعرفون أحد عنده مزرعة ... بس بشرط تكون المزرعة في منطقة مأهولة وآمنة وفيها سكن مناسب ومكمل مثل الشقق المفروشة لأني مانيب جايب معي شي ... ويكون فيها بركة للسباحة.
...
2- ويهمني أيضا أزور الأماكن المتميزة في بريدة فيمكن ألقى عندكم نصايح!
...
3- وأبغى أشتري تمر وكليجا فما أدري عندكم سوق خاص في هالشيين؟
...
أرجو تفاعل الجميع من باب رغبة تحصيل الأجر أولا، ثم تشجيع السياحة المحلية.
...
وتقبلوا تقديري وشكري والسلام عليكم

[زائر لبريدة]

وينكم يالفزعة

[شخت البؤس]

تبي الصراحة بريدة بلدة غير سياحية يعني ما اتوقع تعجبك إذا لم تكن هي مسقط رأسك او هي مدينة اهلك

لكن إن شاء الله يفيدونك الاعضاء

[من بريده]

http://www.buraydahcity.net/vb/showthread.php?t=211785

ممن يفيدك موضوع سابق

بالتوفيق إن شاء الله

[زهرة اللأوند]

مزرعه ماعتقد يمكن شاليه تلقى اجااار


اما التمور فيه محلات بس ماعرف اوصف للاسف

[بريدةnext]

بالنسبه للمزرعه خذ أحسن استراحه متكامله تكون في الارياف الغربيه لمدينة بريده تحصل عند أي مكتب احسن

اما الكليجا لاتدورغير أم الزويد واسمه (الشعبيه)في شارع القناة

والتمر في مدينة التمور بعدشهر انشاء الله

[الصباخ]

أنت تحتاج إننا نسوي لك بكج سياحي .
بالتوفيق ياخيي، لكن لا تعتقد بأن بريدة هذيك الديرة اللي وااااو غريبه.
تراه مثله مثل باقي الديار بس فيها بعض المميزات اللي تميزها عن غيرها.

[قصمنجاوي8465]

أهـــلاً وسهلاً أخي الكريم

فقد نورت بريدة بتواجدكـ من ضمن أبنائها وحياك الله وبياك لاكن من جهت أنك تبي مزرعه أيجار والله ماعتقد ذالك
أما استراحات أو غيرها تبي تحصل ولاكن تجينا تقهوى معنا في المزرعه بالهديـــة ههه

[ماشي وين؟؟]

حياك الله وعندك قسم استعلامات بريده به كل ماتريد

[زائر لبريدة]

اقتباس المشاركة الأساسية كتبها شخت البؤس تبي الصراحة بريدة بلدة غير سياحية يعني ما اتوقع تعجبك إذا لم تكن هي مسقط رأسك او هي مدينة اهلك لكن إن شاء الله يفيدونك الاعضاء

هلابك شخت يا رجال وين تلقى مدينة سياحية داخليا علشان كذا أنا قلت أسكن في مزرعة للإستجمام والراحة من صخب المدنية

[زائر لبريدة]

اقتباس المشاركة الأساسية كتبها قصمنجاوي8465 أهـــلاً وسهلاً أخي الكريم فقد نورت بريدة بتواجدكـ من ضمن أبنائها وحياك الله وبياك لاكن من جهت أنك تبي مزرعه أيجار والله ماعتقد ذالك أما استراحات أو غيرها تبي تحصل ولاكن تجينا تقهوى معنا في المزرعه بالهديـــة ههه

الله يعطيك العافية وما قصرت واعتبر عزيمك تمت فيكفينا الشهامة والقلب الكريم

[زائر لبريدة]

الأخوة والأخوات الأعضاء : من بريده ، زهرة اللأوند ، ياحبيلتس يانا ، الصباخ ، ماشي وين؟؟
شكرا على تفاعلكم مع الموضوع وتقبلوا تقديري

[زائر لبريدة]

اقتباس المشاركة الأساسية كتبها بريدةnext بالنسبه للمزرعه خذ أحسن استراحه متكامله تكون في الارياف الغربيه لمدينة بريده تحصل عند أي مكتب احسن اما الكليجا لاتدورغير أم الزويد واسمه (الشعبيه)في شارع القناة والتمر في مدينة التمور بعدشهر انشاء الله

أخوي شكرا على تفاعلك مع الموضوع.
...
أخوي أنا زائر لبريدة وما أعرفها ولا أدري شرقها من غربها ، فكانك تبي تفزع معي فجب لي رقم كم مكتب عقار توصي عليهم علشان أتواصل معهم

[Chocalain]

حياك الله
بس الله يعينك على الحر
ومن رايي خذ استراحه وخل عيالك يطافشون
وما اتوقع تعجبك لانه ماتعجب الااهله
اما التمر خذ من محل العوس وهضيم بس بصراحه مااعرف اوصف