[Shawly]

السلام عليكم ورحمة الله وبركاته

أتمنى من البلدية والمرور أنهم يتفقون على وضع مخالفات للسيارات الديزل المدخنة والسيارات الغير نظيفة

إلى متى نمشي بالشارع ورى سيارات بريدة المعروفة باترول ديزل أو بيك أب هيلوكس والدنيا تصير سوداء قدامك

طيب إذا هو فلتر غيره وريح صدور العالم اللي بالشارع أنا وش ذنبي أطلع من البيت وأوقف ورى هالسيارات بحجة أنه يبي يوفر فلوس

أعوذ بالله فيه ناس تعز الريال معزه مو طبيعية

أنا من ناحيتي عساني أتحمل أشوف الهايلوكس حقت البزران عشان أشوفها تدخن ووصخه يبي لها نظافة هي أو الباترول

سبحان الله مادري كيف يشتهون يركبونها

فيه ناس تفكيرهم صفر مادري وش اللي يدور بروسهم يستكثر 10 ريال كل أسبوع بلاها كل أسبوع خلها كل شهر

فيه ناس والله مايدخلها مغسلة عادي 6 شهور

الأردن مطبقين نظام للسيارات اللي مايغسلها مخالفة إذا كان فيها غبار أو غيره والسيارات اللي تدخن

المنظر العام عندنا صفر ليييش عشان مايخسر فلوس طيب متى تبي تفرح بحياتك إذا كان هذا تفكيرك أعووووذ بالله

والهيلوكسات أغلب شي تلقاه بزر مجمع فلوس الفسحة وماخذ من ماما وبابا ورايح يشتري له بيك أب هيلوكس غمارة مايركب فيها إلا أثنين حتى الصندوق يلمع مايستخدمه

[غريب احساس]

وعلومك طيب ‎‏!‏

وش اخر اخبارهم

[الـعـابـر]

نعم لمثل هذا تفرض المخالفات
موضوعك جدا واقعي و نحتاج من يهمه الامر الى الالتفات لنقاطه الحساسه
شاكرا لك تطرقك الى هذا الاتجاه

[Shawly]

اقتباس المشاركة الأساسية كتبها غريب احساس وعلومك طيب ‎‏!‏ وش اخر اخبارهم

نضحك ؟

نسيت يا جماعة أقول ممنوع الرد للي تحت عمر 20 سنة !!

[Shawly]

أخوي من الجماعه

الله يحييك ويبقيك كثير اللي نشوفهم عندنا بالشكل هذا

خاصة أن مناطق القصيم معروفة بكثرة المزارع ماشاء الله وكثرة إستخدام الديزل

لكن لا يمنع أن تسوي للسيارة صيانة وتحافظ على البيئة وتسوي لها غسيل وتنظيف

مثل ما منعوا التدخين الحمد لله بالأماكن المغلقة أتمنى يمنعون دخان السيارات نقول إن شاء الله

مشكور على مرورك

[عصير مشوي]

اقتباس المشاركة الأساسية كتبها shawly نضحك ؟ نسيت يا جماعة أقول ممنوع الرد للي تحت عمر 20 سنة !!

يعني اللي عمره 17 يرد

والله شف مشكلك انك علطول قلت المفروض مخالفه ومدري وشو
طيب وراه ماكتب موضوع تنصح راعي الديازل انه يغيرون فلاترهم او ينظفون سياراتهم
يعني انت قلت العقوبه
ولا قلت الحل او النصيحه لهم
وبعدين تراه موهب يضر الديزل

[تألق بريداوي]

وراه ما تروح تعيش الحالك احسن

[راجــيــل]

هههههههه

راعي الموضوع انصحك تطالب الاداره وتقفل موضوعك

انت بين اعضاء بريده ستي ... يدخلون المنتدى يدورون أدنى غلطه وموضوعك الحين

صار ضحيه ههههههه الله يعينك عليهم

[Shawly]

عصير مشوي

والله من ثقل الدم بعد


تألق

ياخي يا أني أنكتم أو أعيش لحالي ؟

تكفى رد رد مثل الناس مسوي فيها أنك حجرتي لي الله يصلح أمرك قل آمين


راجيل

والله مالقيت أحد يسوى أني أرد عليه رد رجل كلهم داخلين وصايرين المحقق كونان

إذا صارو هذولا أعضاء المنتدى يا راجيل فأكتب عليه السلاااااام

لأن البلاء أن اللي برا بريدة يبي يشوف الردود ويحسب كل بريدة عقولهم صغيرة وبزران

[@سموالذوق@]

السلام عليكم

اخوي ممكن نوافقك ببعض نقاط موضوعك

لكن طريقتك واسلوبك بالرد على الاعضاء للاسف غير لائق

اتمنى تعدل اسلوبك بالرد وعلى فكرة الهايلوكس والبك اب اللي تقول عنها حقت بزران ساقوها رجال وطلعت من تحتهم اجيال ينشد فيهم الظهر

[Shawly]

سمو الذوق

هههههههههههههههه اييييه صح أثر الهايلوكس البيك أب هي اللي تطلع الرجال

والله ماشفت منهم إلا الإستشوارات والنعومة

مشكور ياذيبان على مرورك

وإذا شفت واحد راد علي رد محترم رديت عليه أحسن منه وحبيت راسه لو يبي

[@سموالذوق@]

لا يابعدي الهايلوكس حديد مثله مثل اللكزز
اقصد بالرجال اللي ساقوها هم اللي طلعو اجيال

فديت راسك على فكره لاتفكر ان معي هايلوكس لا والله بس حبيت ارد على الموضوع واتمنى تتقبل مرور بصدر وسيع واسف على ازعاجك وتقبل تحياتي ومروري السريع

سلاااااام

[كاره الظلم]

بسم الله الرحمن الرحيم

شكلك فلوسك كثيرة ، أجل تبي يفرضون علينا غرامة على تغسيل السيارة،
ومثل ما قالك بعض الأعضاء نوافقك في بعض النقاط ولكن تصل إلى غرامة على النظافة لا أبداً ما نقبلها يكفينا مكوس وضرائب ما أنزل الله بها من سلطان فرضت على العباد .. بدلاً من ذلك طالب بالتخفيف عن خلق الله .. فيه ناس ما معها قروش توظب ماكينة السيارة لذلك تشوفها تدخن ، مثل ذولي ادعيلهم ربك إنو يرزقهم سيارات نظيفة مثل سيارتك ..

وتحمل اللي يجيك من الموضوع بارك الله فيك

[Shawly]

اقتباس المشاركة الأساسية كتبها @سموالذوق@ لا يابعدي الهايلوكس حديد مثله مثل اللكزز اقصد بالرجال اللي ساقوها هم اللي طلعو اجيال فديت راسك على فكره لاتفكر ان معي هايلوكس لا والله بس حبيت ارد على الموضوع واتمنى تتقبل مرور بصدر وسيع واسف على ازعاجك وتقبل تحياتي ومروري السريع سلاااااام

حياك الله أخوي سمو الذوق

لا بالعكس ردك عقلاني وكلامك موزون مو مثل الأعضاء الثانين ردود همجية بحتة

تسلم لي والله