[المقهوره]

السلام عليكم:
انا عضوووة جديده اسمي(المقهوره) وانا فعلا (مقهورة جدا جدا من عادات رجال بريده واولهم زوجي)
بصراحه(رجال بريده) مايرحمون الحريم ولايهتمون فيهن ولايعطونهن قيمه ولااحترام

انا وحده ممن تزوجت من (رجل بريداوي) بينما انا من(الدمام)
وانا معلمه وقد تقدم زوجي يخطبني وهو يعرف اني معلمه وموافق على الوظيفه

ونقلت من الدمام لبريده الى مدرسة قريبه من بيتي بحيث اروح مشي وارجع مشي
واستمريت على هالوضع 9سنوات ومافيه اي مشكله

إلى ان نقلنا لبيتنا الجديد والذي يبعد كثيرا عن مدرستي
هنا بدأت المشكله:
زوجي لايريدني ان استقيل اواترك الوظيفة.. ولايريد ان يذهب بي الصبح للمدرسة ويرجعني الظهر للبيت..ويرفض رفضا قاطعا فكرة استقدام سواق .. ويغضب غضبا فادحا لو طلبت منه ان اذهب مع (نقل خاص بالمعلمات!!!
برأيكم ماالحل؟؟ واذا قلت له ايش اسوي؟؟؟
قال: دبري امرك لكن بدون الاستعانه بي ولابالسواق ولاالنقل الخاص!!!!!!وبدون ماتتركين الوظيفه لأن البيت مازال يريد أثاث وغيره.

وانا مالي اقارب في بريده .. وحتى لو صار لي ماهم فاضين لي وانا عندي زوج؟؟؟
برأيكم ايش اسوي؟؟؟\
وللأسف هذي مشكلة اغلب الحريم اللي اعرفهن مع ازواجهن سواء في مشاوير المدرسة او البيت.. مايبغى يودي زوجته لاي مكان ولايبغى نقل ولاسواق .. فتضطر المسكينة تطلب من ابوها او اخوها يوديها للي تبغى..
لكن انا مالي ابو ولااخو في هذي المدينة... فماذا افعل ؟؟؟
جاوبوني بحكم انكم رجال بريدة مثل(زوجي) لاعرف ماذا يريد مني ان افعل بالضبط؟؟؟؟؟؟؟؟؟؟؟

[حجر]

والله مشكلة هذه
لايريد سواق !!!!!!!
ولايريد أن يوصلك الصبح ويرجعك الظهر !!!!!
ولا يريدك أن تستقيلي أو تتركي الوظيفة
هذا عناد
الله يهديه بس !!!!!!
فما فيه إلا أن تتفاهموا بينكما على هدوء وتفهميه الواقع
وقبل هذا الدعاء له بالهداية

[قمردين]

حاوري زوجك بلتي هي احسن
نسئل الله إن يفرج همك عاجلاً غير أجل .

[عابق الذكرى]

أصابع يدينك مب وحده أختي الكريمه

فلا تحكمين على أهل بريده بزوجك

دمت بخير

[دبيب النمل]

أختي ((أنتي معلمة وتحطيمن كل القهر)) بإذن الله

وهذه نقاط عنوانها ((وما أريد إلا الإصلاح ما استطعت))

أولاً: التفاهم والتروض أول طريق الإصلاح
ثانياً: إستعيني بمن تثقين به ممن يحبون الإصلاح ويقبل زوجك منه
ثالثاً: محاولة طرح الفكرة بأساليب متنوعة، وفي جو (العيشة الزوجية) و (ووقت وناسة الزوج)
رابعاً: لا تتكرر الطلب بكل كبيرة وصغيرة
خامساً: حاولي تتصلين بأحد المصلحين كالشيخ عبد العزيز الأحمد وإبراهيم الدويش ومركز رؤى للإسشتارات
سادساً: الرجال ليسوا على وتيرة واحدة ورجال بريدة بريدة متفاوتون وفيه رجال أشدّ من زوجك ببعض الطلبات، ومنهم العكس، فلا بد تفهم الوضع البيئي

[أم فيصـل]

و عليكِ السلام يا فاضلة (( و لن أقول المقهورة ))
أولاً أستغرب منكِ أستخدام لغة _ الجمـع _ في عنوانكِ أعلاه رغم أن المشكلة هذه لا أراها في القصيم فقــــط .
فــ....صديقتي أم الخمسة أبناء و مدرسة أيضاً و تعاني مثل معاناتكِ من قمع زوجهـا و حرمانها من زيارة أهلها في القصيم ! و ليس و حده بل طالت المشكلة لـ...أهلة من أهانة و ......؟
و زوجهـا ليس قصيمي
الفاضلة لا نتفقد عيوب الأخرين قبل أن نرى عيوبنا !
تفقدي قد تكوني أكثرتي من (( الحنة )) أمامه فــ...الرجـال دوماً يرهقهم كثر (( ترديد )) الزوجة لــ...حادث مـا حتى و أن كانت تمـدح فــ...ذاك دوماً يرهقهم




[align=right]دوماً أقول العالم النتي عالم مخفي و لا نعلم من الواقف أمامنا..؟!!!!

[/CENTER]

[swelem]

وعليكم السلام ورحمة الله وبركاته
لعلي افيدك بشيء لأن لي شقيقه مشكلتها قريبه من مشكلتك
أولا .. لا أنصحك أبداً بإسقدام سواق حتى وإن وافق زوجك نظراً للمشاكل المترتبه عليه
ثانياً .. لاادري مالذي يخشاه زوجك من ذهابك مع نقل المعلمات لأني أرى أن هذا الحل هو أسهل الحلول وأخفها مضرة
وأرى أن الحل الوحيد بما أن زوجك اغلق كل ابواب الحلول هو أنك توكلين المهمه له ليبحث هو عن حل مناسب له
وأستغرب وقوفه مكبل الأيدي وعدم التحرك للبحث عن حل فحسب كلامك انه هو الحريص على عدم تركك للتعليم !
بالنهايه ليس هناك أجمل وأفضل من الحوار الهادئ والتفاهم بين الزوجين فهو المفتاح السري لكل مشكله
أعانك الله على حل مشكلتك
واسعدك مع زوجك وجعل الحب والألفه شعار لحياتكما وأبعد عنكم الكره والفرقه

تنبيه لبعض الأعضاء
لاتزيدون الحطب على النار
المشاكل العائليه لاتحل الا بالتفاهم

عليكم بالنصح والإرشاد واتركوا عنكم ( الــشــب )

[غشمشم]

صدق حرنا به هالرجال!!!!!!!!!
انا اقول مالك الا تشيلي بيتك وتحطيها جنب المدرسة وبكذا ترتاحون كلكم
لانه اصلا مافيه حل الا اللي ذكرتيهن والزوج المصون رافض؟؟؟؟؟؟؟؟؟؟؟

وبالنسبة ان هذا هو طبع رجال بريده
انا اشهد انه صدق ,,,الرجل عندنا مايبي يسوي شيء لكنه يبي من الحرمة تسوي له كل شيء حتى اللي ماتقدر عليه
مااقول الا الله يعينك

[عبدالرحمن الثاني]

الحل .. هو الرجوع للبيت القديم .. وخلاص ..

أو النقل لمدرسة حول البيت الجديد ..

يعني لو ترجعين للبيت القديم على ما فيه من عيوب .. وترفضين الانتقال أو تقومون بتأجير البيت الجديد حتى تستطيعين الانتقال حول البيت الجديد ..

والمهم :

هناك في المسألة عناد .. ويبدو أن الرجال طيب .. لكن يحتاج لأمرأة تعرف مفاتيحه ..

يعني سوي شيء زين وناقشيه بهدوء ..

صدقيني المصارخ والزعل والحنة وتقليب العيون ما ينفع ..

اللي ينفع فقط ..

السلام .. والتودد للزوج ..

لكن كالعادة المدرسات شايفات أنفسهن على أزواجهن ..

وهذه المرأة إذا صار لها راتب .. فكل شيء له ضريبة .

[ابن البدائع]

أختي المقهورة كان الله في عونك واخرجكي من أزمتك فلك منا الدعاء ولكن ياحبذا لو اسميتي نفسك المتفائلة وليس المقهورة أختي المقهورة من شاهد مصيبة غيرة هانت عليه مصيبته ووالله العظيم أن هناك زوجات يذوقن الأمرين قد يكون الزوج من القصيم وقد يكون من خارج القصيم فالنفس البشرية بتكويناتها لا تفرق بين منطقة وأخرى أختي أنتي في مشكلة وحلها في مواجهة المشكلة وحاولي أن تجدين من أقارب وقريبات زوجك من يؤثر عليه ودعوااااتي لك بتجاوز هذه الأزمة

[طايرتن بوهتي]

يووه الله يعينك ولله ,,
يعني الوحده تقطع نفسها ؟؟
انا اقول إجلسي في البيت لاتداومين لين يوديك هو !! ولايدبرك بحل ثاني
والله يعينك
و ترا كل اللي قالوا المشكله هذي موجوده عند ناس كثار اقول لهم صح
بس في بريده بزوود !!

[قِم بس قِم]

بريداوية أنتي توجهين السؤال لنا باعتبارنا حنا أهل بريدة ! ولأنك عندك حكم جاهز مسبق علينا بأننا نفس الطينة اللي أنتي تكلمين عليها وتوصفين به زوجك !
اقو لك :
بصراحة تصرف زوجك غريب لطريقة لاتقبل التصديق !
وشلون يبيك تستمرين بوظيفتك وبنفس الوقت مايبي يودّيك ولا يسمح بأي وسيلة توصّلك لوظيفتك ؟
فسريها أنتي ؟
قولي زوجي مجنون ولا قاصد يقفل عليك كل الطرق ويبي يطفشك من وظيفتك .......أقول يمكن.........
بس أنتي تقولين إنه يبيك توظفين !!
ماتجي بصراحة ......ماتدخل المخ .........
حتى لو كان انسان متسلط مايقدر يحطك بهالموقف !
أنا أحس إنك تبين تطرحين موضوع عن تسلط الرجال ولا عن عنجهيتهم .......... وجبتي هالقصة

طيب !! خل نقول إنك صادقة بس مانقلتي لنا موقف زوجك ورؤيته صح .........
تحياتي

[الحلم البعيد]

صدق ليش انتم كذا؟؟؟؟ليش ليش ليش؟؟؟؟؟
لا وابشرك يمكن هذا الجيل يقاله مطور واقل جلافه ويعني اني فاهم ياربيه بس
صراحه فيه نماذج عندنا صدق لاقالو شين وقوي عين
شي يفقع القلب لاتتضايقين اختي وتذكري ان طاعةالزوج واجبه يالله ان الشكوى لك
حاولي تاخذين الامور ببساطه <<يقالي جبت الحل
ويمكن تكون مشكلتك بسيطه مقارنةمع غيرك تبين احكيلك عن مشاكل غيرك بتنغثين وتقولين يارب لك الحمدوالشكر وكثييييييير غيرك يعاني بس منطمين وساكتين ومالقو غير الصبر

[مدحت شوقي بريده]

طيب فيه رجااااااااااااااال يودون حريمهم لمدارسهن على بعد 100 كيلوا يومياً ..

وعلى تعميم كاتبة الموضوع ..
نبي نعمم ونقول .. إن كل رجال بريدة حبيبين ويودون حريمهم ..

دائماً الحكم على العموم مجحف ..
فقليلاً من الانصاااااااااااااااااااااااااااااف ..

وسلاااام عليكم ..