[بـــ sunـــــريدة]

اقتباس السلام عليكم انا عارفة ان الموضوع قديم ومن زمان بس شدني وحابة ارد عليه الحين الاخوان اللي قالوا الله يلطف فينا وش شايفين على البنات اللي طلعوا عاريات ولا بحجابهم كامل وشو يعني عشان كاشفات وجههم وش يعني لكن كانوا ملتزمات الادب انا شفت اللقاء واللي طلعوا فيه كانوا يتكلمون باحترام

شوي شوي لا يطق عرق , شي طبيعي بيلتزمن الأدب ويتكلمن بأحترام
يعني تتوقعين بيطلعن بالتلفزيون يرقصن بس ألأنتقاد علشان الأختلاط
وكشف الوجه الإ اذا أنتي عادي عندك كشف الوجه هذا شي ثاني .

اقتباس وبعدين اللي قاعد يقول اوافق عمل المرأة في مجال نسائي زين طيب بس يالاخو انت تعرف انوا ما عندنا بنات في ذا المجال وجزاهم الله خير ذولي البنات انهم تدربوا وتخرجوا عشان يعلمون باقي البنات اللي اهاليه عندهم عقليات متخلفة ان المرأة ما تشتغل الا مع نساء

عارفين أن ما عندنا بنات في مجال الأمن والسلامه , وبعدين أنتي تقولين تخرجوا علشان
يعلمون باقي البنات اللي أهلهم عقلياتهم متخلفه أن المرأهـ ما تشتغل الإ مع نساء ..!
يعني صارت شغلتهن أنهن يعلمن بأقي البنات الأختلاط وأنها تجلس مع الرجل بدون اي حياء
يعني ما صارت مهمتهن أمن وسلامه صارت مهمتهن تعليم الأختلاط وأنها تشتغل عادي مع رجال بدون قيود؟

اقتباس انتوا الحين كل واحد يرسل بناته للمدارس ولا الجامعات والكليات وقاعات الزواجات ومدن الملاهي الترفيهية كلها اماكن فيها نساء بس زين لا سمح الله شب حريق وش بيسون شلون بيتصرفون يعني عبال يجي الدفاع المدني نصهم انحرقوا وغير الحوادث اللي تصير عشان يروحون ياخذوا عبايتهن عشان ما يصير تطلع على الرجال كاشفة

يعني تتوقعين أنه لو سمح الله لو صار حريق بيصير البنات اللي توظفن بالدفاع هن
المنقذ للي داخل الأسواق وبالملاهي الترفيهيه .!؟
يعني بيصر وصول البنات أسرع من رجال الدفاع المدني وبعدين الحين المفروض يعدلون
الرجال والكروش اللي بالدفاع المدني وبعدين يفكرون يحطون بنات بالدفاع المدني .

اقتباس المدرسة اللي انحرقت في مكة المكرمة الحوادث اللي صارت فيها ليش عشان ما رضوا يطلعون البنات بدون عبايات حبسوهم في المدرسة وشب الحريق فيهم لكن لو هم عندهم بنات في المدرسة مثل اللي شفتوهم ومو عاجبينكم كان ما صار اللي صار

ممكن أثبات أنهم أحبسوهم داخل المدرسه علشان عباياتهم أو بس مدرعمه مع الخيل يا شقراء..؟

بس بقولك لو يصير حريق داخل أي مدرسه وفيه بنات من الدفاع المدني داخل المدرسه يعني مستعدات
للحريق قبل يصير صدقيني رآح يكون فيه ضحايا شي طبيعي لأن نفس المدارس تصميمها غلط ولاهي
مصممه بطرق سليمه كلها مباني مستأجرهـ بس لو كان التصاميم خاضع لمواصفات الأمن والسلامه
كان ما يحصل وفيات ..وطبعا يكون لعلمك من الأشياء المهمه أنه يكون فيه تطبيق كل شهر لعملية الأخلاء
لكل مدرسه يسمونه تدريب أو (( حريق وهمي)) يعني المفروض كل مدرسه يكون فيها بشكل شهري
حريق وهمي علشان يكون فيه توعية للطالبات وكيف يتخذون اللآزم بحالة حدوث الحريق .
يعني المفروض أول شي يفكرون فيه المدارس التعبانه ويفكوننا من المدارس المستأجرهـ والآليه
للسقوط ويطبقون على جميع المدارس وبشكل شهري ((الحرائق الوهميه وطرق أخلاء المدرسه))
والمفروض اللي يقوم بالشي هذا نفس المدرسات ويكونن على أطلاع بالأسعافات الأوليه لأنه اذا حصل
حريق أول ناس رآح تكون مسئوله نفس الموظفات اللي بالمدارس أو اللي بالمراكز ويشددون على أجراءات
الأمن والسلامه ومخارج الطورائ أهم من أنهم يوظفون بنات بالدفاع المدني بصرآحه لأن التوعيه مهمه
وخاصه بالأمور هذي .

اقتباس بالعكس انتوا المفروض تايدوا ذا الشئ لانه فيه حماية للنساء ورقي بالمجتمع الا اذا عاد انتوا ناس عنصريين وتكرهون النساء وتبونهم ينحرقون اصلا هذا شئ ثاني يؤسفني ان نكون وصلنا لهذا المستوى من الوعي الفكر ولسة باقي في ناس تفكيرهم سقيم عن عمل المرأة

بالعكس أحنا نأيد يكون فيه بكل مركز ترفيهي أو مدرسه أو جامعه معدات أمن وسلامه
سليمه وتعمل ويكون جاهز نفس المبنى من ناحية مخارج الطوارئ ويكون بعد فيه طاقم
نساء خاص بكل مركز ترفيهي أو جامعه أو مدرسه بس بنفس المركز أو بالجامعه ويكون
فيه توعيه شهريه و تطبيق شهري لعملية الأخلاء وطرق السلامه بس وش الفايدهـ اذا
البنات اللي توظفن بيكونن بمراكز الدفاع المدني يعني اي حريق بيصير رآح يكون فيه ضحايا
والمصيبه اذا تعتقدين أن البنات رآح يكونن المنقذ اذا صار حريق لأنه نفس الدفاع المدني بكبرهـ
يبغى تغيير ويبغى ناس تفهم أيش يعني الدفاع المدني مو ناس بس تستدح بمراكز الدفاع المدني
واذا جاهم بلاغ ما يوصلون الا بعد ساعه من الحريق يعني ما رآح نستفيد شي من البنات اللي
وظفوا.

أنتي تعتبرين رقي المجتمع بالأختلاط واللي ما يختلط سقيم ..!؟

ويؤسفك بعد أن تفكير المجتمع وصل لكذا وأننا عنصريين من قالك الشي هذا ..!؟

اقتباس ومسوين فيها ان بناتكم احسن بنات وتقولون شوفوا بنات جدة والرياض مساكين ما تدرون ان بناتكم بيسون المصايب من وراكم وانتوا ما تدرون وين ربي حاطكم وما خفي كان اعظم هذا بالنسبة لكم الحمد لله كلن يعرف نفسه

كل مكان بالعالم فيه الزين والشين عارفين الشي بس الضاهر عندك حساسيه
من بنات الديرهـ .!؟

اقتباس للاسف كل ما حاولنا نتطور لا زم فيه تفكير رجعي سقيم

أنتي الحين تعتبرين نفسك متطورهـ وتفكيرك مو رجعي ولا سقيم وهذا أسلوبك .!؟

اقتباس ينظر للمرأة بانها خادمة وجارية ما ينفع تسوي شئ لكن الله كرم المرأة واعزها

يعني كل السنين من طلعتنا على الدنيا ونعتبر المرأهـ خادمه و جاريه ولا أقتنعنا بأن الله
كرم المرأهـ وأعزها وأخيرا أنتي طلعتي تعلميننا أن المرأهـ مكرمه من الله سبحانه .

مشكله والله يا أخت إنعام من وين نفهمك أو من وين نبدأ النقاش اذا كنتي جايه تعلميننا
أن الله مكرم المرأهـ وأننا ما أقتنعنا بكلام الله .

تحياتي وأرجو أن الأفكار وصلت علشان ما يصير تفكيري رجعي أو سقيم يا دافع البلاء .