[الطيــــر]

إننا في الغالب ( كسعوديين ) فينا مواصفات خاصة عن بقية الشعوب ، ومن أهمها أننا فينا عجز ونبي كلش شيء نصلحه بسرعة ، وأنانية مفرطة لدرجة اننا نطبق مبدأ ( أنا والطوفان من بعدي .. ) بدري عليكم ياسكان الشميسي تعرفونه ..... يعني الواحد مننا أهم شي عليه نفسه ومصلحته وان شغله يخلص ولا عليه من خلق الله بالطقاق ............. ونعتبر القفز على الحواجز ,,, وعدم الالتزام بالسرا والمساقط على الآخرين ( من المزايا الحسنة ) قوية الكلمة بس وش اسوي .... فيه كم واحد بيعرفها والباقين بعدين ....
وقد أنعم الله علينا بنعم توفر المال في ايدينا ( طبعا ما نتختلف عند قضية تحديد مستوى الفقر ... ) خلوها بعدين بس الغالب كل معه فلوس والأكثرية موظفين وإلا عيال نعمة ومطخطخين ....
وسوت خير الدولة فينا تمشيا مع تركيبتنا النفسية ومستوى العجز فينا ... وأصدروا نظام أن الرواتب تتحول على حساباتكم في البنوك ..... يعني المشوار العظيم اللي تعاني منه الأمرين بذهابك لأمين الصندوق خلاص انتهى وانتهت معه ( أهمية )أمين الصندوق في حياة الموظفين ماعاد نحتاج له ولا نناظر خاطره كن الراتب من جيبه .... خلاص يوم 25 من الشهر تلقى الراتب في حسابك وفكنا ....... ولأننا فينا حرص غريب وعدم ثقة لازم نشيك يوم 25 على البنك سواء بالهاتف أو ببطاقة الصراف .... واللي من الجيل القديم ( يدق مشوار ويسأل مدير البنك بذاته ) .هو الراتب وصلكم والا لا ؟
وبعض البنوك اللي زباينهم من الطبقة الوسطى غالبا ، سووا حركة حلوة يبون يفتكون من خلق الله صاروا يرسلون رسالة باالجوال ( ترى راتبك وصل .. لو سمحت لاتغثنا وتشغل تلفوناتنا وكمبيوتراتنا )...ضف وجهك ........
الناس تعودت على الصرف .. ومن حيث لايشعرون ( اصرف مافي الجيب ياتيك ما في الغيب ) او أن الراتب شوي يخلص في تاريخ 15 من الشهر ويجلس الواحد مامعه ولا حق الخبز الين يجي الراتب الثاني .... وما يصدق خبر تطلع الشمس يوم 25 من الشهر الا وتلقاه مرابط عند اقرب صراف ....يخرط الراتب ويفنيه قبل يقضي الشهر ....
المهم اللي صاير ان الناس طلعت لهم مشكله عند ـ مكاين الصرف الآلي ـ يوم 25 وتلقى العالم ماسكين سرا ..... وأحسن شي أن المكينة ما تقفل وقت الصلاة ......بس المشكلة في استخدامنا للمكاين ... تأمل في تعامل الناس عند مكاين الصرف الآلي : وستشاهد هذه الصور :

يجي واحد موسوس ولا يتكل على أحد ويمسك سرا مع الناس واذا جاه الدور .... كن الوقت كله له . . والا كن المكينة قاط فيها ... ما هموه هالناس اللي واقفقين في البرد والا الشمس في الحر ... المهم يدخل بسم الله :
1 ـ يفصخ النظارة ويلبس النظارة الثانية ـ للقراءة ـ ويمسحها قبل ما يلبسها طبعا يرطبها بشي من بين شفتيه ...
2 ـ يبحث في كل مخابيه عن البوك وأخيرا يجده بصعوبه في مخبات الجاكيت العليا ...
3 ـ يفتح ـ البوك ـ ويبدأ مارثون البحث عن بطاقة الصراف داخل البوك ...
4 ـ بصعوبة يجد البطاقة ويجلس يقراها مع أنها معه من زمان وما عمره فكر يقرأ لو اسمه أو تاريخ الصلاحية .
5 ـ ينظر للمكينة ويبدأ في البحث عن الفتحة اللي تدخل منها البطاقة .... وقبل ما يدخل البطاقة يتأكد من اتجاه السهم ..... واتجاه الأعلى والأسفل ....
6 ـ دخلت البطاقة ـ الحمد لله تبدأ خيارات المكينة ويقرأها بتمعن كأن عنده اختبار .. لازم يغيبها ... وإلا كأنه أول مرة يشوفها ..... يبدأ في إدخال الرقم السري .. وكل رقم يدخله يلتفت ليا أحد يعرفه ....ويمكن يغلط ويرعص أحد الأرقام قوة ( من الوسواس ) ويتضاعف الرقم ويصير الرقم السري خطأ .
7 ـ تبدأ الخيارات على الشاشة ويتكرر ـ سيناريوـ المذاكرة والقراءة بتمعن .... يتوكل على الله ويقول بسم الله ويضغط على معرفة الرصيد وطباعة الايصال .... يطلع الايصال مطبوع والرقم ايضا على الشاشة .... بس ولو لازم يتأكد .
8 ـ يأخذ الايصال ويقربه لعينه ويقرأة بعناية ... ويمكن الخط صغير او ( الريبون حق الآلة ضعيف ) وتصير الطباعة باهته مما يعيق القراءة السريعة .
9 ـ يخرج الايصال القديم ويطابقة مع الايصال الجديد ... ويمكن يطلع الألة الحاسبة لمراجعة الجمع .
10 ـ يرجع مرة ثانية ويجري جميع الحركات اللي سواها بس يختار سحب نقدي .
11 ـ يسحب مبلغ يمكن 400 ريال ..... ويطلع المبلغ ويعده ثلاث مرات ويطلع البوك ويحطه فيه في مكان لوحدة .... وياخذ الايصال ... ويقارنه بالأول ويطرح ويجمع ويتأكد من صحة العملية ..... ماعنده أدنى ثقة في كمبيوتر البنك ...
12 ــ يأخذ البطاقة ويرجعها في مكانها ويلتفت يمينا ويسارا ماطاح منه شي ثم يرجع ويستبدل نظارة القراءة بالأخرى ... ويطلع من البنك مزهوا بنجاح عملية الصرف .
وتراه ماجاب خبركم ياللي واقفين برا ولو انكم حوالي عشرة .. ماهميتوه شغله أهم شيء ينجزة .. وانت بسلامتكم .... مع أن عملية الصرف من المكينة في الغالب تستغرق حوالي دقيقة إلى دقيقتين حسب ضغط الشبكة ..... بس ربعنا يتفلسفون نتيجة عدم الثقة ، والوسواس الزايد ،ولو أن معهم حق بعض الأحيان ، لأن الاتصالات الهاتفية التي تعتمد عليها شبكات الصرف الآلي تخربط أحيانا وتوقع الناس في حرج ومشاكل ما لأمها داعي ....مثل :
1 ـ تلقك تبي تسحب تقول المكينة .... عملية الايداع فاشلة وتخصم من حسابك نفس المبلغ ...
2 ـ والا تبي تسحب وتطلع لك رسالة : راجع البنك ....
3 ـ او البطاقة منتهية الصلاحية مع انها جديدة ...
4 ـ واسوأ تصرفات مكائن الصرف ( تأخذ البطاقة ) ولا تطلع فلوس وتنشب .... تبدأ في مشكلة مع البنك ،،،، أحسن شي قل بطاقتي ضاعت ابي غيرها .. والله يعينك كان بطاقتك من الراجحي .
هذه الصور تراه صارت مع ربعي ولا ألفتها من عندي .....

وعندي لكم نصحية أخوية ..
1 ـ لاتستخدم مكينة الصرف يوم 25 من الشهر نتيجة الضغط الهائل على الشبكة
2 ـ لاتستخدم الا مكينة البنك اللي فلوسك فيه .. اضمن .
3 ـ لاتستخدم المكاين اللي طاقتها الشمس في الشوارع او عند محطات الوقود لأنها غالبا تخربط من شدة الحر .
4 ـ لاتسحب واجد يمكن يصير خطأ ولا تطلع فلوس ، وتخصم من رصيدك .... خلها اذا صارت مشكلة تصير في مبلغ بسيط ... لو ضاع ما عليه حسوفه ...

هذه صور توجد في كثير من افراد مجتمعنا وتسبب لنا تلك التصرفات ( أنواع ) من ضيقة الصدر .. بس وش نسوي مالك إلا خشمك ولو اعوج ..
وأغرب شي أن بعض الناس يدخل يشوف الرصيد في اليوم أكثر من مرة ويطبع ايصال .... ويناظره ثم يرميه عند المكينة ... ما تلاحظون أن مكاين الصرف عندها سلات زبالة .. طبعا مهيب للفلوس ... لللايصالات اللي نستخرجها من المكينة ونرميها ....


...
قنمول

[الخاطف]

عاشت أيااامك على هالمواضيع المتميزة ..

بس لي طلب .. الله لا يهينك ..

ليش ماتكون مواضيعك مختصرة ..

بحيث الكل يقراها .. ويتمتع فيها .. ويكتشف سر المتعه في مواضيع المشرف الطير ..

سلالام ...

[الطيــــر]

والله يالخاطف ... أمور الحياة تطول وتطول وتطول على وزن تدوم وتدوم وتدوم ...

والله الإختصار شئ جميل لكن بعض القصص لازم التفصيل ...

لأن القارئ العربي (( ذهين )) ويسأل عن كل شئ ...

فأنا أوفر عليه السؤال ...

مشكووووور يالخاطف على هالخطفه الحلووووووة ...