[شيخ بريدة]

السلام عليكم ياشبّابات>>يحسبهن اسلحة الشيشانية:D .

قصدي شباب وش الاخبار عساكم متلهمدين مع هالصبحية ومتشمرقين تراي مصفــّر عقب الفجر:D >>انواع الكلك ياشكش.



المهم دوكم سالفتي بس انا اخاف يزعلون اللي معي هماهم حنوس مثلي:D :


المهم يقول لك الراوي شكش: انه كان به ناس متولمين يبي يروحون للظهران ماادري الدمام المهم كلهن واحد حقات الشرقية ذولي.....الوكاد>>لاقطاه من ساحة الاقلاع .

المهم يوم راحوا يوم الاربعا للدمام مشوا العصر ولاوصلوا إلا عقب الاخير....وعاد تعرفون المسافة طويييييييلة من نجد للدمام>>يااخي هالنجدية ذولا ماش>>نجدية وإلا المراعي:D .

المهم وصلوا للدمام عقب الاخير اومير يتبطحون ويتسدّحون وقالوا باتسر الخميس ان شا الله الساعة سبع ننطلع للكشنير>>كشنير قصدي كرنيش:D ....لكن الكرنيش وصخ ومقرف كله قراطيس>>اسكت بس كل عمرك تبطح بالرمل:D ....المهم هوّنوا قالوا نبي نطلع لشاطي نصّ القمر>>تسذا يسمّيه خويّنا الحنسي.

المهم المسيكين خويّنا الحنسي متحقرصً وبلش ومعتلدز حتى انه سبحان الله موقــّت القحصة للساعة سبع:D اومير يوم تمّت سبع بالتمام والكمال قحص الحنسي>>تحس انه ماناب هالتسذوب:D .

يوم قحص اومير يرقص من الفرحة وراح لاخوياوه الآخرين وقال لهم قوموا بسرعة الساعة سبع سبع سبع سبع>>من الحماس بدا يكرر........اومير يقومون ويقمزون للسيارة ويشخطون تركوا حدا اخوياهم....اومير ينكسون يبي يجيبونه وراحوا
ادزعدوه(اقعدووووه يعني قوّموه).....اومير ينطلون لهم بعض القريشات ويشخطون للشاطي....


عند الشاطي:

كان الاخويا ثلاثة على عادة العرب لازم الارفدزاء ثلاثة.....اومير به اثنين اشوى عليهم يعرفون البحر شوي...اومير يقمزون للبحر ويبعدووووون...وخويّهم الحنسي يحوم بالشاطي ويلقط له من هالقواقع>>بحل بالشاطي مايدري وش يختار:D .
اومير يلقى قنديل البحر هاللي تسنه كريمةٍ ترجّ من الخوف....اومير يلقطه هالذهين وقال ابنزرق قدام اخوياي بهالصيدة....لكن جاوه خويّه يصارخ ويزاعق قال هذا يجيب الحساسية احلتووووه اومير يتخرّع الحنسي ويحلت القنديل(قنديل البحر:حيوان من هالحيوانات البحرية) اومير يحلت القنديل مع الباغة بالبحر.....اومير عاد قعدوا يبربسون بالشاطي وراحوا يناظرون الدمام وقال الحنسي:غريبة ذولا عندهم نفد....شلون تسنهن نفد الزلفي يوهقــنـــّك بالطيحات والهويات:D ....وقال غريبة عندهم مسجد مابه روافض اشوى اشوى>>متولم للهوشات:D ........ اومير هالحنوس اثرهم غريبين عن العالم كله.....هذا لباسهم:
قميص مع شماغ وواحد خوينا هالحنسي لابسً ثوب مع شماغ>>اشوى تطور شوي..
واثرهم هالمهابيل يبي يروحون للبحرين ويقطعون الجسر ومادريوا اثر الدخول بجوازات سفر لازم جوازات سفر رفيق....المهم قعدوا بين السعودية والبحرين مالقوا لهم شغلية غير الحومان بهالشوارع والدوجان يهبــّلون بهندي راعي سيارة اتصالات بغوا يقشــّونه كل دقيدزة يعاكسون طريقه ويلاحقوه اكا الهندي تخرّع وهج...

المهم الحنوس نكسوا للسعودية وراحوا للدمام مرة اخرى....اومير يقول لي الحنسي خويي: هذولا يقهرونك اهل الشرقية تصدق ياشكش اني ماشفت ولاعربجي بهم قهرووووون كلهم خكاريا إلا من رحم الله......وياحوووول الهلي(الهايلكس) حاقريناااااه حقر يعني تشوف هلي شكلاه هباااال واثر اللي يسوقاه بنغالي.....والثانية يسوقاااه مصري...والثالثة يسوقااااه سوري>>تخيل سوري يطاعس بهالنفد معه هايلوكس:D .

المهم جا المغرب اومير يودّون اهلهم واومير يلقون خكاريا بدبابات يسوقونهن عاد هالحنوس طلعت منهم ضحكات شيطانية نجسة تنمّ عن شيطنةٍ نجدية:D اومير يلاحقون الخكاريا بالفان الديزل>>خخخخخخخخخخ انواع الكربنة يدوس بالدوّاسة ويطلع دخـــّان وكرابين.....وهالخكري اللي رادفٍ خويّه بالدباب بغى يمصط عقب ماقمزوا المطب هماوه ينزرق قدام العالم....بس انقهروا الناس قالوا ليته مصط ليته مصط.

المهم جا يوم الجمعة: وراحو صلوا الجمعة وقضت السالفة بحمد الله.


نستنتج من هالقصة والسالفة:

1-عدم البزعة والذهاب للشرقية بهذه الهدوم العربجية:D .
2-وجوب ملاحقة الخكاريا والقضاء عليهم بكل متسانً وعاير.
3-ان العرب لابغوا يطرشون(يسافرون) افضل المخاواة عندهم ثلاثة اخوياء بلياليهن
4-عدم لمس قنديل البحر لأنه يجيب الحساسية>>الظاهر ان ذي تبي تغدي اشاعة.
5-أن اهل نجد مهمب حنس ولكن الحنس هم اهل الشرقية إلا من رحم الله لأننا على الفطرة>>صدقت.
6-الاستنتاج المهم: هو أن الحنسي هو الشكش شيخ بريدة والباقين اخوياوووووووه.



ونبي تعليقات يهبّلن ويخرّعن.

مع تحيات مراسلكم من اول بالظهران والدمام والثقبة والخبر:

تشيك بيوريداااه(شيخ بريدة الشكيشي من خب الشكاشا)>>لازم ابتسامة زي المراسلين>>طاح سوقك يامصيول.:D

[الحليل]

قصتك ذي جابت لي الحساسية !!!

إلا مير أقولك ذكرتنا بمدرس الأحياء يا حبيله !!

إلا صح

قنديل البحر من مملكة الحيوان شعبة اللاسعات طائفة الفنجانيات..
يسبب حكة شديدة عند ملامستك له ..

وشكراً لك كتيييييييييييير

يا شكشوكة ,,,,



محبكم بقوووووة
أبو مهند
طبعاً
الحليل دايم حليل ,,

[شيخ بريدة]

الحليل الشين أبومهنــّد البُصْري:

اقول انت يااويلاااااه ياالبصري..هههههههههه تشبهن بمدرس الاحياء واووووووتس انا شكش بن أبي شكش تشبّهن بمدرس الاحياء حقكم....تراوه مهو بمقامي تشبّهن به هههههههه امزح لاتعلمه علي ياالبوق.

مشكور على هالرديد ياالبيض>>وحدة بوحدة هماك تقول لي شكشوكة الله يخس ابليسك جتن الخويخبا ابروح ألهط لي قنيزات بيض.


تشكرااااااتٍ تسثيرةٍ لسمو الحليل.

[شيخ بريدة]

واتسبدي تسبداااه وحزني:D وكل هالتعب والشقا والكتابة وآخرتاااااه ردٍ واحد.


ياناس ياعقلاء خطبٌ جلل>>تحس انه يتنقى تسلمات.


ردوا اولاااااه وورّونا رايكم بهالموضوع.

[الضرغام]

مهبوووووووولة

[شيخ بريدة]

شعاع الإسلام((وبينه نجمتين)))>>كسل اكتبهن خخخخخخخخخخ.

الله يعافيكووون كتيروووون مرة اوي اوي بالحيل>>ماش لازم تخطم اللهجة الشيبانية.

اهم شي ياشعاع الاسلام انك رفعت الموضوع الله يعدي عنك وانا اخوك.

بس عاد مرةٍ وحدة القصة مهبولة..............اغدينا نحلتاه بشهار>> افلقن تسانهم ضحكوا ياالمالغ.



جزاكم الله خير على الرديدات الصغنطوطيات اللي ماهنا املح منهن.