 |
|
|
|
|
|
||
| ســاحـة مــفــتــوحـــة المواضيع الجادة ، والنقاشات الهادفة -- يمنع المنقول |
 |
|
|
أدوات الموضوع | طريقة العرض |
12-02-2002, 10:47 PM
|
#1 |
|
عـضـو
تاريخ التسجيل: Oct 2001
المشاركات: 1,061
|
سلسلة البحث عن الذات بين المنتديات : (1) منتدى قـرمـبـع
هذه السلسلة برعاية محلات برجس وشركاءه لبيع المواعين :D:D
** = = = = = = = ** مسكت معي في يوم من الايام اني اهجول بين المنتديات الموجوده على الشبكه واشوف العالم اللي فيها . جهزت أغراضي وربطت عفشي وعبيت بنزين لموتري وتوكلت على الله . مسكت الخط ( وهذي غير مسكت الاوله  ) وانا كافخ الا واشوف مبنى قديم وفوقه لوحه كبيره مصدّيه مكتوب عليها ( منتدى قرمبع ) شدني الاسم بصراحه، كونه غارق في التراث والتشليح .قلت ياولد وقف وشف وش عندهم، يمكن عندهم شي يجوز لك . دورت موقف قريب مالقيت واضطريت اني اجدع موتري قدام باب المنتدى . في مدخل المنتدى كان فيه درج متكسّر ومحطوط عليه بساط بلاستيكي اخضر، وعقبه يجي باب المنيوم منخلع ومسندينه على الجدار، الارض كانت مليانه غبار . بصراحه الموقع كان مرعب . سميت بالله ودخلت برجلي اليمين .. اخذت لفه على غرف المنتدى واللي كان اغلبها قراشيع وزيوت وصواميل واسيام . شوي .. والا يدخلون عرابجه ما ادري منين طلعوا !!!!  تجمّعوا عليّ وسالوني : أنت جديد هنا؟ . قلت : ايه . قالوا : حياك الله بيننا اخو وعزيز . ثم تكلم واحد منهم وقال : تعال نورّيك الموقع ونعرّفك على باقي الشباب . كان اللي يحتسي اكبر المجموعه .. والظاهر انه مشرف بالموقع . جرني مع يدي وطار بي لغرفه بوسط المبنى وقال : هذي غرفة الجديدين اللي مثلك .. خل ندخل عشان نعرّفك على الشباب . سحبت يدي وانا اقول : اول شي أنا ماتعرفت عليك انت؟؟!!! قال : معك اخوك المنشحط . [ أفا .. وش هالاسم اللي يوحش؟! .. يالله .. اهم شي انه مايعض وشكله حبيب واخلاق ] طبعا انا اطمن نفسي ، لان عليه شكل لو تشوفونه تسان تبلعون العافيه وتدعون ربكم ان مايجيكم عيال مثله . عليه وجه عريض تقل واطيه راعي فلفو محمل صعايده .. وله شنب تقل نسر امريكي فاردن جنحانه وطاير بالجو .دخلت الغرفه اللي هو يقول عنها ، والقى مجموعه صافين بجمب بعض ويسولفون باصوات مزعجه ومرتفعه . مسكت ( هذي غير مسكت الثانيه ) أنا وياه الصف من اليمين وبدأ يعرفني على الشباب :- هذا محقان .. وانا اقول : ونعم والله . - هذا عمود كردان .. رديت : حياه الله . - بوجي .. وكالعاده اقول : هلا وغلا . - الاخ بوري .. مرحبا به . - هذا الاخ جنط .. حياه الله . طلعنا من الغرفه واتجهنا الى غرفه ثانيه لكن المنشحط مادخل مع الباب، وقف عند دريشه مقفله وطقها .. ردوا عليه اللي داخل : وش تبي؟ .. قال : عطونا كشف الاسماء . مدوا له كشف فيه اسماء عضوات منتدى قرمبع  .قرّبه لي وهو يقرأ الاسماء : (1) نسافه .. عضوه نشيطه . (2) صاجه .. عضوه مستلجه . (3) ظفيره .. عضوه مهمّه . (4) كتاوت .. عضوه لها ثقلها . بغيت اكع ضحكه على نوعية الاسماء وغرابتها، لكن تعوّذت من ابليس يوم تذكرت اللي واقف بجمبي المنشحط هو وشنبه .دف الدريشه وجدع الكشف داخل الغرفه . كملنا الدوران على باقي غرف منتدى قرمبع واللي كانت تجمع بين الغرابه والبساطه في نفس الوقت . يوم خلصنا من الجوله ودعّته وقلت : من بكرا ان شاء الله ابجي هنا . قال : الله يحييك وشد حيلك معنا . اثناء خروجي من المنتدى سمعت اصوات وازعاج عند موتري وشفت كم واحد متجمعين حوله ويحاولون ينقزون قفل الباب، كان معهم واحد جلف وكبير تقل باب كراج قربت لهم وانا طاقتن ام الركب من اشكالهم، واثر الجلف الكبير يتوعّد ويتهدّد وهو يقول : وين الزلابه راعي الموتر الله لا يحييه؟؟!! سلمت عليهم وقلت بكل براءه : فيه شيء يا اخوان؟ التفت على الطعر وناظرن بنص عين من فوق لتحت وقال : الموتر لك ؟!! قلت : أي نعم . رد وهو مطير عيونه : الله لاينعم عليك .. لنا ساعه ندورك  .ثم واصل كلامه : مالقيت توقف الا قدام الباب؟؟!!!! قلت : معليش يالطيب أنا جديد وضيف عندكم [ على بالي ابكسر خاطره :D ] .. وبصراحه مالقيت موقف واضطريت اوقف هنا على اساس انها دقايق وطالع . رد بعصبيه اكثر : طلّع موترك ولاتكثر بربرتك . ركبت موتري وريوست ثم لبقت بمكان ثاني ونزلت ابشوف وش عندهم . اثرهم توهم شارين ايقونات مستعمله من التشليح، وقفت اناظر الدينّا وهي تريوس علشان ينزلون الايقونات . قرّبت اكثر قلت ابشوف وش نوع الايقونات .. وكانت كالتالي : * ايقونه على شكل مفتاح عجل * ايقونه على شكل عفريته * ايقونه على شكل رفرف منعفط * ايقونه على شكل بطاريه * ايقونه على شكل كفر مبنشر قلت بيني وبين نفسي : ومزعجنا علشان هالايقونات اللي مثل وجهك في اليوم الثاني جيت من بدري عشان اضمن موقف قريب .. خفت يزعجنا الطعر اللي امس دخلت المنتدى وعلى طول رحت لغرفة قرمبع العام، كنت طول الليل سهران اكتب موضوع بعنوان ( الفرت بين الامس واليوم ) وعصرت مخي علشان اطلع هالموضوع لعله يعجب المنشحط وربعه اعضاء المنتدى .. حطيت الموضوع بالغرفه وطلعت للغرف الثانيه . مريت بجمب غرفه مكتوب عليها ( قرمبع للشكاوي والاحتجاجات ) . استغربت تكون هالغرفه مفتوحه للاعضاء؟؟!!! قلت اكيد انهم ناسينها من امس، دخلت بشويش على اساس اشوف وش نوعية شكاوي الاعضاء، قعدت اقلّب بالشكاوي والقى واحد كاتب شكوى ( اوقفوا التسجيل ترى ملينا من الاعضاء الجدد الزلايب ) . قلت بنفسي : يارجال انطم وكل تراب، الزلابه انت واشكالك، لولا الله ثم الاعضاء الجدد والا كان ما انتعش قرمبعكم . شوي والا اشوف الطعر الجلف اللي امس جاي للغرفه من بعيد وهو يزبد ويلجلج ويصارخ : من اللي تارك باب غرفة الشكاوي مفتوح؟؟!!!! قلت بيني وبين نفسي : هذي والله البلشه .. وش اللي جابه ذا؟؟؟؟؟؟؟!!!!!! ورطنا تغبيت وراء واحد من كراتين الشكاوي وبدون أي نفس قعدت اراقبه من بعيد . دخل للغرفه وهو مولع وناظر يمين ويسار بشكل سريع ومتتابع، يوم ما شاف احد رجع للباب وطلّع من مخباته سيم طويل علي شكل دائري وفيه تقريباً 40 مفتاح ، ثم صفق بالباب وسمعت صوت المفاتيح تقرقش من برا يجربهن واحد واحد . شوي واسمع صوت طرررقع <= = صوت القفل جاني احباط وجدعت جسمي على جدار وراي وانا اردد قول المتنبي يوم يهجو جرير : على نفسها جنت براجس . المبيت وضمناه بهالغرفه لكن المشكله العشاء، وشلون ابتعشى [ هذا اكبر همك ] بدأ القلب يرجف ويقرقع، والكراعين تصافق، وشعر سيقاني وقف تخيلوا ظلام دامس + كراتين مغبّره + هدوء مميت = ؟؟؟؟؟!!!!!! يعني لا تلوموني اذا طلع مني شيء :D اشغلت نفسي بقراءة بعض سور القران القصيره اللي احفظهن، وكل شوي اعيدهن مره وثنتين وثلاث ووو .... والوقت يمشي ببطء . حاولت ادوّر دريشه اطلع معها لكن الظاهر انهم سادينها ببلك!!!! ساعه ساعتين ثلاث اربع .. وانا في حيرتي ورعبي ، يوم جت الساعه خمس الفجر واسمع واحد يفتح الباب .. جلست وراء احد الكراتين ابشوف من اللي جاء، اثره واحد من المراقبين . ولع اللمبات وفتح كم كرتون وسحب منهن بعض شكاوي الاعضاء وطلع . عقب ساعتين من طلعته سمعت الاصوات بالموقع تتكاثر وتزداد والاعضاء بدوا يجون . فتح الباب واحد من المراقبين وكان معه اثنين من المشرفين وقعدوا يفرزون الشكاوي . سمعت المراقب وهو يقرأ بصوت عالي احد الشكاوي : اسمعوا وش يبي هالعضو ( نرغب في شراء برادة ماء ووضعها عند باب كل منتدى ولكم الشكر ) .. جعلك تموت من العطش . واسمعوا الثاني وش يبي : ( عطونا مواقف لمواترنا والا ترانا نبي نروح ندور غيركم ) .. اذلف باللي مايحفظك . وكل ماقرأ شكوى قطّعها وجدعها بسطل الزباله . قلت بيني وبين نفسي : هلا والله بالاهتمام بالاعضاء والنظر بشكاويهم !!!! بيني وبينكم عقب هالموقف قلت ابخربها قمت على حيلي بسرعه .. تفاجئوا بوجودي واندهشوا . قال المراقب : وش جابك هنا؟؟!! رديت : لقيت الباب مفتوح ودخلت ثم قفلوا علىّ قال : ومن اللي قال لك ادخل من الاساس؟؟!!! قلت بكل برود : لقافه :D رد عقب ما طيّر عيونه وهو يردد كلمة لقافه .. لقافه باستهزاء : إعتبر نفسك من اللحظه هذي موقوف وممنوع من الرد او كتابة أي موضوع .. ويالله الحين ورنا عرض اكتافك واطلع برا . يوم شفت المسأله وصلت لهالمواصيل قلت : طز فيكم وفي موقعكم .. ما دامك انت مراقب فيه فالله يخلف على الاعضاء . طلعت وانا مولع وفجاءه تذكرت موضوعي ( الفرت بين الامس واليوم ) واستخسرت اني اتركه عندهم، واقوم وارجع للمراقب واقول : عطوني موضوعي اللي كتبته امس . قال : تلقاه مع عفشك عند باب الموقع . قلت : حطوه بكيس علشان مايجيه غبار من منتداكم يالمغبرين . طلعت من الموقع رايح لموتري ، يوم انتصفت بالشارع والتفت على المبني واناظر اللوحه الكبيره المصدّيه واقول : - - - - - - - - - - - - - - - - - - - - - - - - - - - - شف وجه العنز واحلب لبن . :D:D
__________________
    انتبه .. سيتغير التوقيع بين كل فتره واخرى .. كن معنا :)  |
|
|
12-02-2002, 11:59 PM
|
#2 |
|
عـضـو
تاريخ التسجيل: Sep 2001
البلد: BURAYDAH
المشاركات: 1,106
|
برجس
اول شئ الحمد لله على السسسسسسسسسسسسسسسلامه :o
ثاني شئ ..... سلسة رهيبه .......... تسلم هالاصابع الذهبيه  بس انا ودي اعرف شئ واحد بس .......... وش اللي وداك لم هالمنتدى ........... لو اني محلك للحين ماطلعت ........ او اصبر لين يحجب  اتوقع اني قد مريت من عنده ........... لاتقولي اللي لوحته مربوطه بسيم لكن اذا ودك تروح مره ثانية ... قلي ............. مايدق الحدي الى الحديد ........اي هين  على العموم تسسسسسسلم يالغالي |
|
|
|
13-02-2002, 01:42 AM
|
#3 |
|
عـضـو
تاريخ التسجيل: Oct 2001
المشاركات: 1,061
|
هلالالا وغلالالا بساري
الحي يحييك والميت يزيدك غبن :D الله مير يسلمك ويبقيك لعين ترجيك اللي ودان لهالمنتدى هو زماني الله يذكر المنشحط بالخير .. عليه صوره سبحان اللي خلقه خلق الله حسن .. ما اقدر اقول شي الواحد ماوده يقطع جلد الضعيف .. لكن الله يحلله ويبيحه هو وخويه الجلف باب الكراج مارية المنتدى ترى لوحته مرفوده ببلكه والميزانيه لك عليه .. يالله يصرفون رواتب المشرفين .. فلذلك ماصلحوا اللوحه الله يعطيك العافيه اخوي ساري
__________________
انتبه .. سيتغير التوقيع بين كل فتره واخرى .. كن معنا :) |
|
|
|
14-02-2002, 05:11 PM
|
#4 |
|
عـضـو
تاريخ التسجيل: Oct 2001
المشاركات: 1,061
|
:D
__________________
انتبه .. سيتغير التوقيع بين كل فتره واخرى .. كن معنا :) |
|
|
|
| الإشارات المرجعية |
|
|
النمط المتتابع
